اول مره اعرف فيها
طارق قام نص وقفة وقال بخوف:
اقعدي يا حبيبتي.
بصيتله بحدة وقلت:
اقعد إنت مكانك.
رجع قعد، وأنا فضلت واقفة قدامه، وبكرر الكلمة كأني بحاول أفهم معناها.
سنة!
حاول يتكلم وقال:
بصي، الموضوع بدأ…
قاطعته بسرعة:
لأ.
سكت، وأنا بلعت ريقي بصعوبة. زوري كان واجعني من كتر ما كنت بحاول أمنع نفسي من العياط.
قلتله:
أنا مش عايزة أسمع النسخة المتزوقة من الحكاية، اللي هتحكيهالي عشان تحاول تطلع نفسك منها بأقل خسائر.
رد بسرعة:
أنا مش بحاول أعمل كده.
بصيتله وقلت:
أيوه، بتحاول. كنت لسه هتقول الموضوع بدأ بطريقة تبين إنه حصل بالصدفة، أو إنك ماكنتش قاصد، أو إن الظروف خلتك تعمل كده.
لف وشه الناحية التانية.
أنا عارفاه كويس، وعارفة إنه كان هيدخل من الباب ده لو كنت سبتله الفرصة.
قال بصوت واطي: …يتبع للجزء الثاني والاخير
قال بصوت واطي:
هي حصلت كده.
ضحكت ضحكة قصيرة، لكن صوتها طلع غريب وموجع حتى بالنسبالي.
قلت بسخرية:
طبعًا.
حاول يبرر وقال:
أنا ماكنتش مخطط لأي حاجة.
المرة دي ماقدرتش أتمالك نفسي.
صرخت فيه:
إنت اشتريت ورد عشان تحتفل بمرور سنة كاملة مع واحدة تانية، ولسه بتقولي ماكنتش مخطط؟!
سكت وبص في الأرض.
كملت وأنا بحاول أسيطر على صوتي:
يمكن أول خمس دقايق بس اللي ماكنتش مخطط لها، لكن كل حاجة حصلت بعد كده كانت قرار منك. كل مرة قابلتها فيها كانت قرار، وكل مرة كلمتها فيها كانت قرار، وكل مرة رجعتلي البيت وعملت نفسك جوزي المخلص كانت قرار برضه.
طارق ضم شفايفه وسكت.
حسيت بالدموع بتتجمع في عيني، لكني رفضت أمسحها.
كنت عايزاه يشوف الوجع اللي تسبب فيه.
عايزاه يعرف إن قراراته اللي كان بياخدها بسهولة، كانت بتكسر فيا حتة كل يوم، حتى وأنا مش عارفة.
سألته:
مين رانيا دي؟
رد:
واحدة عرفتها من الشغل.
سألته بسرعة:
عميلة عندك؟
لأ.
زميلتك؟
لأ.
الكاتبة نرمين عادل همام
أومال إيه بالظبط؟
اتنهد وقال:
هي بتشتغل في شركة من الشركات اللي بنتعامل معاها.
هزيت راسي ببطء.
أهو كده فهمت ليه اسمها عمره ما جه في كلامه.
كانت قريبة كفاية من شغله عشان يشوفها ويتعامل معاها، وبعيدة كفاية عن حياتنا عشان ماعرفهاش.
سألته:
هي عارفة إنك متجوز؟
رد من غير تردد:
أيوه.
الإجابة دي وجعتني بطريقة مختلفة.
بصيت لتحت ناحية إيدي، ولقيت دبلتي بتلمع تحت نور المطبخ.
وفجأة افتكرت يوم ما كنا بنشتري الدبل.
