لما جوزى ينطق

زلة لسان بقلم الكاتبة نرمين عادل همام لما جوزها ينطق باسم عشيقته بدل اسمها.. الدنيا تقلب غابة! من قلب حارة شعبية، وفي بيت دورين مستغلينه للغدر، زلة لسان واحدة كشفت المستور وعرّت المستخبى.. في لحظة، العروسة المكسورة قلعت ثوب الطيبة: قعدت «نور» على حرف السرير، ماسكة راسها بإيديها وتسترجع كل اسم مر على ودنها من يوم ما اتجوزته.. تفكر وتفتكر: مين من قرايبه، ولا بنات عماته، ولا خالاته، ولا حتى واحدة من الجيران في الشارع الكبير اسمها «هويدا»؟ تلف وتدور في دماغها، تفتكر العيلات كلها عيلة عيلة، مفيش.. الاسم ده مش موجود عندهم خالص! ولا حتى في حد من بعيد يمت لهم بصلة بيلعن بالاسم ده! كانت الدماغ بتاكل في نفسها، والنار عمالة تقيد جوة صدرها وهي باصة للفراغ. في اللحظة اللي نطاق فيها باسم «هويدا»، كان كبرياءها هو اللي بيرد. ما صوتتش، ولا صرخت في وشه، ولا عملت هيصة ولمت عليه الشارع والمحلات اللي تحت البيت.. لا، سكتت خالص، والسكوت في المواقف دي بيبقى أشد وأعر من أعتى صريخ! سكوت يوجع القلب ويهد الحيل. رجعت لورا خطوتين وهي باصة له بنظرة مكسورة، خطوة ورا خطوة من غير ما تنطق بحرف، ودخلت أوضتها وقفلت الباب على نفسها بشويش. أول ما الباب اترزع بهدوء، اترمت على السرير وقعدت تعيط كأن روحها بتطلع، مكتومة الصوت عشان محدش يسمعها ولا يحس بوجعها، تعيط على حلمها القديم وعلى السنين اللي عاشت فيها بتحبه من طرف واحد. سنة كاملة مرت على جوازهم، سنة كانت فاكراها هتبقى الجنة اللي اتمنتها طول عمرها. أصل «نور» كانت طايرة بيه من قبل ما يتجوزوا.. كانت بتحبه حب مش عادي، عشق وسرحان طول الليل والنهار، طبعاً هو ولا كان داري ولا حاسس بوجودها أصلاً، كان بالنسبة لها ابن الحارة الوسيم اللي يتقال عليه «يطيح الطير من السما من كتر جماله وحلاوته»، ابن ناس طيبين ومن قرايبهم بس من بعيد لبعيد. كانت تشوفه طالع ولا نازل من على ناصية الشارع، تقف ورا شيش الشباك قلبها يدق زي الطبلة، وتدعي ربنا في سرها يكون من نصيبها. ولما جيت أمها في يوم، دخلت عليها والضحكة من الوذن للوذن وتقول لها: «يا نور، عمك الحاج متولي بيتكلم عليكي لابنه عمر»، نور وقتها كان حيها يروح من كتلة المفاجأة! ما صدقتش ودانها، وقالت خلاص، الدنيا ضحكت لي والحلم اللي في خيالي هيبقى حقيقة. بس الحقيقة طلعت صدمة عمرها! من أول ما دخلت بيته، واكتشفت إن لسانه طويل ومتبري منه، مبيفوتش فرصة إلا ويهينها ويتريق عليها وعلى شكلها ولبيسها. يعني مثلاً، لبست مرة قميص نوم جديد وحلو، بدل ما يقول لها كلمة ثناء تطيّب خاطرها كأي ست بتتمنى تسمع كلمة حلوة من جوزها، لقيته بيبص لها بقرف ويضحك بتهكم ويقول لها: «إيه ده يا نور؟ مالك طالعة شبه شغالات البيوت القديمة كده ليه؟ هو القماش خلص من السوق ولا إيه؟». ولما حبت تجدد وتلبس بنطلون جينز وشيرت مظبوطين، قعد يضحك ملء شدقيه ويقول لها: «لا والله؟ إيه الصبياني ده؟ طالعة كأنك عيل في إعدادي رايح يلعب كورة في الشارع! ناقصك كاب وتقفي على الناصية!». وحتى لما لبست جيبة طويلة ودمها خفيف، برضه ما سلمتش من لسانه السليط: «إيه يا بنتي الجيبة دي؟ طالعة زي البنات بتوع الابتدائي وهما رايحين المدرسة الصبح!». كل كلمة كانت بتطلع من بوقه زي الدبوس اللي ينغز في قلبها، الست طبعاً بتحب الكلام الحلو، بتحب تحس إن جوزها شايفها أحلى ست في الدنيا، لكن «عمر» كان ديماً يرمي الكلام البارد اللي يكسر النفس. صُغرت في عين نفسها، وبقت تقول بينها وبين روحها: «الراجل ده مبيحبنيش.. أنا مش في باله خالص». لحد ما جيت الليلة السودة دي.. كان قاعد بيلف في التليفزيون، وهي رايحة تديله كوباية الشاي، بتنادي عليه مرة والتانية، وفجأة وبدون مقدمات، التفت لها وقالها ببرود: «نعم يا هويدا.. عايزة إيه؟». الكوباية كانت هتوقع من إيدها، والاسم نزل عليها زي المية السخنة! هويدا؟! مين هويدا دي؟! أتاري الأستاذ عقله وربنا مع واحدة تانية خالص، واحدة سالبة عقله ومخلية لسانه ينطق باسمها من غير ما يحس! ولما شافها اتنحت وتجمدت مكانها، قعد يتلعثم ويحور ويقول لها: «والله آسف يا نور، أصل كنت بتفرج على فيلم مصري والبطلة كان اسمها هويدا فالاسم علق في لساني!». بس كدبه كان باين وزي الشمس.. مفيش فيلم ولا زفت! في واحدة اسمها «هويدا» ، واخدة عقله وقلبه، ومش سيبالها هي إلا اللسان الطويل والتريقة كل يوم! الكاتبة نرمين عادل همام موضوع «هويدا» ده كان حارق دمي، مخلي النار مسكوبة في صدري ومبتطفيش! طب مين دي؟ ووصلت له إزاي؟ دخلت على تلفونه، فتشته حتة حتة، قلبت الرسائل والواتس والمكالمات.. ملقيتش أي حاجة تودي ولا تجيب، غير شوية صور وحاجات قديمة كده ملهاش قيمة، ومفيش أي أثر لاسم هويدا. قلت لنفسي: «يمكن الشك بيتهيأ لي؟ يمكن أنا اللي بافر أو بأفور الموضوع؟» وحاولت بالعافية أتغاضى وأطنش، أصل هعمل إيه يعني وأنا مفيش في إيدي دليل أترس بيه عينيه؟ بس سبحان الله! ربنا لما يعوز يكشف المستور، بيكشفه بطريقة تموت من الصدمة! عشان تبقوا فاهمين طبيعة بيتيا.. البيت بتاعنا كان عبارة عن دورين. الدور الأولاني ده كان شقة واسعة وكبيرة واخدة المساحة كلها، عاملينها للضيوف والمناسبات والعزومات. لما تبقى فيه عزومة عيلة، الكل بيتجمع تحت؛ الستات ينزلوا في المطبخ الكبير اللي تحت يطبخوا ويجهزوا الأكل سوا، والقعدة تحت كانت على أصلها، فيها تليفزيون كبير، وأوضة نوم واحدة للراحة، وبقية الشقة مفتوحة على بعضها ريسبشن واسع على أبوه، فيه كنب عربي أنيق ومحندق مع أنتريه شيك. وعمر كان دايماً مخصص الدور الأرضي ده لاستقبال زمايله وأصحابه. لما يجيله حد من زمايل الشغل أو أصحابه في الحارة، كان يقول لي: «خليكي إنتي فوق يا نور، جهزي الأكل والعصاير والمسليات من بدري وحطيها على السفرة تحت، وإحنا هنخدم نفسينا بنفسينا، مش عايزك تنزلي ولا تلمحي حد». أنا طبعاً كان الغباء أكل دماغي، وأقول يا حلاوة! ده بيغير عليّ وخايف ظلي يلمحه حد من أصحابه! عشان كده، مكانش بيبقى غريب إني أسمعه نازل طالع تحت، أو أسمع الباب المصفح بتاع الشقة اللي تحت بيتقفل، أصل البيه مفهمك إن أصحابه معاه تحت! أثر البيه مستغل إن الشقة اللي تحت فاضية ومحدش بينزلها غير في العزومات، وكان بيجيب فيها «هويدا» الملعونة على أساس إنها واحد من أصحابه الزمايل! يدخلها الشقة اللي تحت بشويش من باب الشارع التحتاني من غير ما ألمحها ولا أحس بوجودها، وأنا قاعدة فوق في دوري أظن إنه قاعد مع زمايله الرجالة بيشربوا شاي ويلعبوا دومنة! في ليلة من الليالي، نزل الفضول في قلبي، وقلت أنزل بشويش على السلم الداخلي أعدي شاي ولا حاجة، ووصلت عند باب الريسبشن المقفول تحت.. حطيت ودني على الباب، ولقيت الدنيا اتسحبت من تحت رجلي! سمعت صوت ضحك ودلع وخفة، صوت واحدة بتتمايع وتتغندر، وصوت مرقعة ودلع وكلام حب وغزل ورغي بينه وبينها يهد الجبال! بغيت أتجنن! وحياة ربنا كنت هفرقع مكاني! الدم غلي في عروقي، وكان نفسي أكسر الباب بركبتي وأدخل عليهم، ألم عليهم الشارع وأفضحهم وأعرفهم مقامهم! أنا مسكت نفسي بالعافية، أعصابي كانت بتتفحم.. أقف عند الباب وأسمع القرف ده في بيتي وفي الشقة اللي بنتجمع فيها مع أهله؟! يا ربي للدرجادي الجرأة والحقارة وصلت بيه؟ يجيب عشيقته لحد بيتي واستغفلني بالشقة اللي تحت، ولا عمل حساب ليا، ولا لأهلي، ولا لسمعة الناس اللي عايشين وسطهم في الحي الشعبي ده؟! طلعت جري على أوضتي فوق وقفلت الباب عليّ بالمفتاح، اترمت على الأرض وقعدت أصرخ من غير صوت، أعيط عياط يحرق القلب.. دموعي كانت نازلة زي المية السخنة بتكوي وشي. صدمة هدتني، وقعدت أعاتب نفسي وأقول: «يا هبلة! بتعيطي على واحد رخيص وكلب زي ده؟ مدخل واحدة شمال في قلب بيتك وعلى ذمتك؟». في اللحظة دي، القرف والاشمئزاز كتموا على قلبي.. الحب القديم كله مات، اتبخر، ومبقاش فاضل غير كره أعمى ونار عايزه تتطفي. أول فكرة جيت في بالي إني أطول التلفون وأطلب أبويا وإخواتي ييجوا يطبوا عليه ويجيبوا حارة كاملة تفضحه.. بس رجعت قلت: لا! ده مش هيرد لي حقي ولا يبرد ناري صح، هو ممكن يهربها ويقول دي زيارة عادية أو يتبلى عليّ، والشرطة والقضايا عايزه دليل قاطع يخرس عينيه وعين أهله! مسحت دموعي بإيدي، وقمت اتوضيت وصليت الفجر.. دعي ربنا يربط على قلبي وينزل عليّ السكينة، وسبحان الله، ربنا نزل عليّ هدوء غريب كأنه الثلج، هدوء اللي ناوي على خراب ديار بس بذكاء! طلعت من الأوضة الصبح، ونزلت لقيته قاعد في الصالة اللي تحت ومبسوط وعينيه بتلمع! بيكلمني بكل بجاحة ويقول لي: «إيه يا نور؟ الشاي اللي عملتيه امبارح حطيته فوق السفرة كان خفيف ليه؟ صاحبي ده مبيحبش الشاي الخفيف، ظبطيه المرة الجاية!». قلت له بابتسامة صفرا كتمت وراها غل الجبال: «ولا يهمك يا عمر.. المرة الجاية هعمل لكم أحلى شاي يظبط الدماغ!». كان نفسي وقتها أرفع إيدي وأتف في وشه وأضربه بأي حاجة قدامي، بس مسكت نفسي بالعافية لحد ما سابني وطلع نام. قعدت أكتك مع نفسي: إزاي أنتقم من الكلب ده ومن الملعونة اللي بتجيله الشقة تحت؟ ملقتش غير حل واحد.. أركب كاميرات مراقبة مخفية تجيبهم بالصوت والصورة، وألعن أبو جدهم وأمسك عليهم دليل يوديهم في داهية! في نفس اليوم، نزلت وسط البلد، واشتريت كاميرات صغيرة جداً مبتتبانش، ورجعت البيت في غيابه، نزل الشقة اللي تحت وركبتها في الريسبشن وفي الصالون في مكان مظلم ومستحيل حد يفكر فيه ولا يلمحه، وفي نفس الوقت الكاميرا جايبة الزوايا كلها ومغطية الدور الأرضي من أوله لأخره. وفي نفس الليلة.. جيت الملعونة دي! أصل سهراتهم تحت بقت شبه يومية، صباح ومساء، قلة أدب ووقاحة ملهاش أخر! كنت قاعد جوة في أوضتي فوق، أعصابي مشدودة زي أوتار الكمانجة، بقعد أعد الثواني والدقايق: متى البيه يصرفها وينقلع عشان أروح أفتح الكاميرا وأشوف سجلت لي إيه من القرف ده! الكاتبة نرمين عادل همام أول ما طلعت الشمس والبيه دخل نجل في الأوضة ونام، قمت على أطرافي نزلت الشقة اللي تحت جري، ورحت على طول أفتح الكاميرا وأرجع التسجيلات. وشفت التسجيل شفت المنظر اللي يسود الوش! وضع ما يتقالش ولا يتكتب ولا ينوصف من كتر القرف والنجاسة! وقتها ما بكيتش دموع، أنا بكيت دم! من كتر القهر والحرقة، لقيت نفسي بمسك دماغي وأخبطها في الحيطة مش مصدقة! خيانة وفي نص بيتي وعلى عفشي وفي المكان اللي بنعد فيه مع العيلة؟! والمصيبة الأكبر لما دققت في ملامح «هويدا» دي.. لقيتها كبيرة، عدت الأربعين سنة، ووشها استغفر الله العظيم قبيح! لا فيها جمال يغري ولا جسم يشد ولا أي أنوثة! بس أقولكم السر فين؟ أسلوبها مع عمر جوزي.. أسلوب استغفر الله العظيم في قمة العهر والملاوعة، كلامها وطريقتها وهشتكتها له هي اللي سحبت عقله وجرته في السكة دي! أخدت الفيديو وعملت منه نسخة كاملة على تليفوني.. وقعدت في ركن الأوضة أكتك وأفكر. أنا لازم أبتزهم بالفيديو ده، بس من غير ما يعرفوا إن أنا اللي ورا الموضوع ده خالص! قلت في بالي: «جه دورك يا نور تلعبي بيهم.. والله لأوريهم النجوم في ظهر الجمعة، وأخليهم يعيشوا في كابوس ورعب زي الكابوس اللي عيشوني فيه، ده أنا لسه عروسة جديدة ملحقتش أتهنى بحياتي ولا أظبط عيشتي!». أول حاجة عملتها، فتشت في أرقام عمر وطلبت رقم الهانم «هويدا»، ونزلت على طول اشتريت خط جديد ببيانات مجهولة عشان ألعب بيهم بالمرتاح. مسكت الخط الجديد، وبعت لـ «هويدا» المقطع الفاضح بتاعها مع عمر بدون أي مقدمات ولا كلام رغي، وكتبت لها تحتيه: «لو المشهد ده مش عايزاه ينزل على اليوتيوب وتتبهدلي في المنطقة، تدفعي 200 ألف جنيه فوراً!». طبعاً هي ما ردتش عليّ بوقت، ولا تنطقت بحرف! كانت في حالة صدمة وشلل من المفاجأة! في نفس اللحظة، أخدت نفس المقطع، وبعته لعمر جوزي من الخط الجديد ده برضه، على أساس إن أنا هويدا وببتزه! وكتبت له: «ادفع 200 ألف جنيه عشان الفيديو ده ماينزلش على اليوتيوب ويفضحك وسط أهلك وناسك!». أول ما قرا الرسالة وشاف المقطع، لقيت الوش بتاعه اتخطف، والدم هرب من عروقه! رد عليّ على الخط وهو بيتنفض وبيسب ويسلع ويقول: «يا وسخة ! يا بنت الكلب! اصبري عليّ والله لأذبحك وأدفنك مكانك، ولا جنيه واحد هتشوفيه مني يا زبالة!». قعد يشتك ويسب، وأنا واقفة بعيد باصة عليه وبدوق طعم الانتصار، حاسة إن ناري بدأت تهدى شوية، بس كنت عارفة إن المشوار لسه في أوله والانتقام التمام لسه جايب ورا! «هويدا» بقى، بعد ما فاقت من صدمتها، بعتت لي رسالة على الخط الجديد بتقول لي فيها بكل بجاحة: «إنتي فاكرة نفسك بتهدديني يا روح أمك؟ والله لأقول لعمروأخليه ينزل يربيكي وياخد منك المقاطع دي. شفتوا الكلبة والنعرة الكدابة اللي فيها؟ بتهددني بجوزي! طبعاً أنا ما رديتش عليها ولا بنقطة، سيبتها بتاكل في نفسها وبتشتعل في نارها! في اللحظات دي، عمر كان قاعد في الصالة اللي تحت عزيل عن الدنيا كلها، الوش أصفر وشاحب، ومنشغل بالتفكير والدماغ عمالة تودي وتجيب فيه.. وأنا فوق من جوايا يا لهوي على الفرحة! مبسوطة إني شايفاه بيتدوق من نفس القهر والغل اللي عشته. فجأة، تلفون عمر رن.. طبعاً أنا عرفت إنها «هويدا» بتصل بيه. عملت نفسي مشغولة بلم الغسيل وطلعت برة الأوضة ألمح من بعيد. عمررد عليها وهو بيموت في جلده، بس هي ما ادتلوش فرصة حتى يتنفس! قعدت تسبه وتسب أهله، وهددته إنها هتفضح الدنيا وتبيع المقطع، وقالت له بغل ووقاحة: «ترى مرتك هي اللي صورتك ويايا وهي اللي ورا اللعبة دي كلها!». بس عمر من كتر الرعب والدوشة اللي في دماغه ما صدقهاش، وقال لها: «مرتي إيه يا هبلة إنتي! مرتي ماتعرفش حاجة ولا بتنزل تحت اصلاً!». رجعت أنا كملت اللعبة، وبعت لـ «هويدا» رسائل تانية ألاعب أعصابها وأخليها تلف حوالين نفسها.. وفي وسط اللعب ده، عرفت المصيبة الأكبر! عرفت إن الهانم متجوزة وعندها عيال! بقيت قاعدة باصة للسقف وأقول في سري: «يا ربي! الست دي بتربي عيالها إزاي؟ وعايشة مع جوزها إزاي وهي بتتسحب نص الليل تروح للرجالة في بيوتهم؟!». دخلت «نور» الأوضة فوق بخطوات سريعة، قلبها كان بيلعب وبيتنطط من الفرحة والانتصار، بس النار اللي جوة صدرها كانت لسه شايطة وتاكل في جسمها ومبتطفيش بالساهل. مسكت التليفون بإيدين بتترعش من الغل، ونزلت تطبيق تعديل فيديوهات، وقعدت تثبت عينها على الشاشة بتركيز يوزن بلد. بدأت تظبط المقطع حتة حتة، وشوشت تماماً على وش «عمر» جوزها وعلى جسمه عشان تستر اسمه واسم عيلتها وما تفضحش بيتها وسط خلق الله في الحي الشعبي. لكن «هويدا»؟ سابت وشها واضح زي الشمس، بملامحها وتفاصيلها الملعونة من غير أي تغبيش، عشان اللي يلمحها يعرفها على طول ويشاور عليها بالإصبع! أخدت الفيديو المعدل، وفتشت في سجل المكالمات القديمة عند عمر لحد ما جابت رقم جوز الهانم. أصل جوز «هويدا» ده كان صاحب «عمر» من زمان وشغال معاه في نفس المصلحة، يعني الخيانة كانت راكبة بعضها ونازلة في أصلهم ومغروزة فيهم لحد النخاع! مسكت الخط الجديد، وبعتت المقطع لجوز الملعونة من غير ولا كلمة زيادة، وسابت الفيديو هو اللي يتكلم ويقول اللي ما يتقالش. ما عرفتش «نور» بالظبط إيه اللي جرى لـ «هويدا» بعد ما الفيديو وصل لإيد جوزها، بس كانت متأكدة إن الدنيا قامت وما قعدتش في بيتها؛ يمكن اتجلدت علقة تموتها وتكسر عظامها، أو رمى عليها يمين الطلاق في وسط الشارع قدام الناس والحي كله، أو يمكن غسل عاره بإيده وخلص الدنيا منها ومن قرفها! مسحت «نور» إيديها في بعضها وقالت في سرها وهي باصة للسقف بغل ونار: — في ستين داهية.. جهنم وبئس المصير ليها وللي زيها، غوري داهية تأخدك إنتي وأشكالك اللي يعكروا العيشة! نرجع بقى لسي «عمر».. حالته النفسية بقت تحت الأرض، بقى يرقص من الخوف والرعب كأنه شاف ملك الموت واقف قصاده في الصالة! مقضيها ليل ونهار رايح طالع نازل في الشقة اللي تحت، بياكل في نفسه من الهم والفضيحة، مرعوب إن الفيديو ينتشر في المنطقة ويبقى أضحوكة الشارع والحي كله، وتترس عين أهله وناسه بالعار والكسرة. مسكت «نور» الخط الجديد بتاعها، اللي هو فاكر إن اللي بتراسل منه هي «هويدا»، وبعتت له رسالة سم هاري تنزل على قلبه تخلعه من مكانه: «يا عمر.. أنا مريضة بالإيدز وعديتك! وأكيد إنت دلوقتي عديت مرتك الغلبانة اللي فوق في الشقة!» الكاتبة نرمين عادل همام أول ما بعتت الرسالة وشهقت الرسالة في التليفون، سحبت الشريحة فوراً من الجهاز، ومسكت ولاعة وولعت فيها بالنار لحد ما بقت رماد وحرقتها تماماً عشان تطير أي أثر يوصلهم ليها! نزلت «نور» الشقة اللي تحت بشويش على أطراف صوابعها من غير ما تعمل أي صوت، ولقيت «عمر» قاعد في الريسبشن على الكنبة بيبكي زي الأطفال الصغار! بكا حار طالع من أعمق نقطة في قلبه، بكا يهد حيل أعتى راجل في الحارة. كان كل شوية يرفع قبضة إيده ويضرب بها على صدره بقوة وهو بيشهق ومسهوك من كثرة العياط والحرقة والندم! قربت منه «نور» وخطت خطواتها بهدوء، وعملت نفسها مش فاهمة حاجة وبتتكلم بالراحة وبرائة كأنها ملاك طاهر: — مالك يا عمر؟ في إيه يا حبيبي؟ مالك بتعيط كده وتقطع في نفسك؟ هو فيه حد من أهلك جرى له حاجة ولا مات لا قدر الله؟! رفع «عمر» راسه بالعافية، وبص لها بعيون حمرة دم، مليانة دموع ورعب وقهر، وفضل يشهق ومش قادر ينطق بحرف واحد يتفهم.. مسح وشه بكفوفه اللي بتتفض، وسابها وقام جرى خرج برة البيت كله زي المجنون، وما رجعش غير على أخر الليل وهو مش شايف قدامه. دخل عليها الأوضة فوق بخطوات مكسورة وجسمه بيتطوح شمال ويمين، ومسك راسها بين إيديه وهو بيترعش كأنه سلك كهربا عريان، ونطق بصوت مبشوح وميت: — اسمعي يا نور.. يا بنت الناس، أنا وإنتي لازم نتطلق! دلوقتي حالا! في اللحظة دي، حسيت «نور» إن ربنا خد لها حق صبرها، وإن روحها اترممت بعد الكسرة والوجع. عملت نفسها مصدومة وعينيها اتسعت على أخرهم: — نتطلق؟! ليه يا عمر؟! إيه اللي حصل للدنيا؟! إحنا لحقنا نعمل حاجة؟! رد عليها وهو بصص للأرض ومش قادر يحط عينه في عينها من كتر القرف والذنب: — مفيش.. مفيش كلام يتنطق خلاص. لمي هدومك وشنطتك وارجعي بيت أهلك دلوقتي، والله يستر عليكي وعليّ من اللي جاي! لمت «نور» شنطتها بهدوء، وطلعت من الشقة وهي باصة عليه للمرة الأخيرة، سايباه يحترق بناره، يأكل في نفسه وشايل هم صحته وسمعته اللي حاسس إنها ضاعت في الوباء والفضايح. مشيت ورجعت بيت أبوها، وهي حاسة إن قلبها ارتاح واستشفى فيهم هما الاتنين بعد كل القرف اللي عملوه فيها! وبالفعل، رمى عليها يمين الطلاق عند المأذون.. والشيء ده مكانتش «نور» عمله حسابه أوي، لأن على الرغم من خيانته وقرفه والتنمر اللي عاشته معاه، إلا إن حب زمان والعشق القديم كان لسه ليه أثر مكسور جوة قلبها مبتعرفش تمحيه في يوم وليلة. مرت الأيام والأسابيع، ونور قاعدة في بيت أبوها صابرة وساكتة، لحد ما جيه أخر أسبوع في العدة.. الباب خبط في بيت أبوها خبطات متقطعة وخايفة. فتحوا الباب، ولقيت «عمر» داخل مع أمه، شكله يصعب على الكافر! خس ونزل النصف، ووشه شاحب، بس في عينيه توسل ورجاء عمرها ما شافته منه قبل كده. جايين يترجوها ورجليهم فوق رقبتهم عشان ترجع له وبيموتوا على رضاها! عمر قعد قدام أبه ونور، وطأطأ رأسه للتراب وهو بيحكي بصوت مكسور إنه عاش أسود أيام حياته، وأنه حس إن ربنا بياخد منه كل حاجة بسبب ظلم وقسوة قلبه. اللي فهمته «نور» وقتها إن البيه جرى على المستشفيات والدكاترة والعيادات، وعمل كل التحاليل الطبية اللازمة مرة والتانية والتالتة، واكتشف إن جسمه سليماً مية في المية ومفيهوش أي مرض ولا إيدز ولا حاجة، وأن الموضوع كان ملعوب عليه من أوله لأخره! وده السبب اللي خلاه يتنفس الصعداء، ويرجع يطلبها تاني ويموت عشان ترضى عنه وترجع لبيته. أمه مسكت إيد نور وقعدت تبكي وتقول لها: «يا نور يا بنتي، عمر عرف غلطه وتدبس في أفكاره، وهو شتات من غيرك، سامحيه عشان خاطري ونبدأ صفحة جديدة». وقفت «نور» قصاد أمه وعمر، وبصت له بعين قوية وثابتة وقالت بثبات وشموخ يوقف الحارة كلها: — أنا مش هرجع بالساهل يا طنط.. كرامتي مش لعبة في إيد حد يرميها وقت ما يحب وياخدها وقت ما يحب، والرجوع ليه شروط جديدة خالص! وأول شرط إننا نطلع نعمل عمرة سوا نغسل فيها كل القرف والهم اللي فات ونبدأ حياتنا على نظافة من جديد أمام ربنا! عمر رفع راسه وبص لها وعينيه بتلمع بالدموع، وافق فوراً من غير ما يفكر ولا يتردد لحظة واحدة، وقال بصوت مخنوق: «اللي تؤمري بيه يا نور.. والله العظيم لو طلبتي نجمة من السما هجيبها لك، بس سامحيني وافتحي لي بابك تاني». ورجعت له الشقة.. ويا الله! لقيته إنسان تاني خالص غير اللي عرفته وعاشت معاه قهر السنين! إنسان مهذب، بشوش، النور طالع من وشه، مربي لحيته وتقلت على وشه، وكان واضح جداً إنه اتغير والتزم من أعمق نقطة في قلبه.. أصل الدرس القاسي اللي أخده والصدمة اللي عاشها وهزت كيانه كانت كفيلة تفوقه بقية عمره وتخليه يعرف قيمة النعمة اللي كانت في إيده ودمّرتها إهاناته. سافروا السعودية وعملوا العمرة، وكانت «نور» واقفة جنبه في الطواف حول الكعبة المشرفة، السكون يلف المكان وصوت التكبير يرج الحرم، وتسمعه يدعي بدموع خاشعة وصوت مهزوز يزلزل القلوب وهو ماسك في أستار الكعبة: — يا رب احفظ لي نوري ولا تحرمني منها.. يا رب ارزقني منها الذرية الصالحة، واصلح لي بيتي واغفر لي خطيئتي وظلمي ليها! بقى إنسان متدين بحق، بيصلي الصلاة في وقتها في الجامع مع الجماعة وبيصوم الاثنين والخميس، ووعدها إنهم السنة الجاية هيحجوا سوا ويقفوا على عرفات بإذن الله. رجعت الحياة لبيتهم بس بطعم تاني خالص. قعدت «نور» على سجادة الصلاة في أوضتها الهادية، تبص على الشارع الكبير من ورا زجاج الشباك بعد ما خلصت صلاة العشاء. سبحان من يغير ولا يتغير، سبحان من يقلب القلوب بين يوم وليلة! افتكرت ليلتها الأولى في البيت ده، وكيف كان الخوف والقهر بياكلوا في روحها، وكيف اتقلب الخوف ده لأمان، واللسان الطويل والتريقة لغزل وحنان يغرق أيامها، والاهانة القديمة لاحترام وشوق في عين جوزها. بص لها «عمر» وهو داخل الأوضة والضحكة الصافية مالية وشه، شايل في إيده كوبايتين شاي سخنين يظبطوا الدماغ، ريحة النعناع طالعة منهم. حط الكوباية قدامها على الطقطوقة، وقعد جنبها على سجادة الصلاة وهو بيمسك إيدها بحنية ويرفعها لشفايفه يبوسها، ويهمس لها بأحلى كلام وغزل كانت طول عمرها بتتمنى تسمعه منه: — يسلم لي الوش الحلو ده.. ربنا ما يحرمني منك ولا من دعاك يا نور عيني ويا كل حاجة حلوة في دنيتي. ابتسمت «نور» في سرها بكسوف ورضا، وحمدت ربنا اللي فضّل معاها وما ضيعش صبرها هدر، وهدى جوزها ورجعه لعقله وأصله الطيب، لتستقر عيشتهم أخيرًا ويعيشوا في أمان وراحة بال بعد العاصفة شديدة القسوة اللي كانت هتهد البيت وتخرب الديار. الكاتبة نرمين عادل همام تمت

مقالات ذات صلة

روايه كامله

يوم عيد ميلادى

في نفس اليوم

الولد

امى رمت شوربة

حماتى اتصلت

اترك تعليقاً إلغاء الرد