بعد وفاة ابويا

بعد وفاة أبويا بتلت أيام لقيت جوزي سايب شغله وبيقولي: ونشتغل ليه تاني؟ ورثك من ابوكي كفاية علينا إحنا الاتنين.

​دخلت على شريف في المطبخ الساعة 10:30 الصبح يوم الأربع كان قاعد بالترنج وبيشرب القهوة ومأنتخ كأنه يوم الجمعة.

​بقالنا 22 سنة متجوزين متعود ينزل شغله قبل الساعة 8 مج القهوة في إيده وموبايل الشغل في جيبه.. نفس الروتين ما بيتغيرش.

​وقفت عند الباب واستغربت:

إنت قاعد ليه وليه ما نزلتش شغلك؟

– أنا استقلت.

​​– استقلت؟! من غير ما تقولي حتى؟

​سند ضهره لورا وقال ببرود:

– يا شرين أنا شغال بقالي 33 سنة جه الوقت اللي أريح فيه وأعيش حياتي.

– ونصرف منين إن شاء الله؟

​رد بسرعة وبدون تردد:

– ونشتغل ليه تاني؟ ورثك من ابوكى هيدلعنا إحنا الاتنين.

​بقيت بصاله ومش مصدقة!

أبويا مالوش 72 ساعة تحت التراب وشريف قلّب الورث اللي ممكن يطلعلي لخطّة خروج على المعاش ليه!

​– “ورث إيه ده اللي بتتكلم عنه؟”

– “جرى إيه يا شرين! هو باباكي مش بايع شركته بالملايين؟ وبيته ملك ومعلهوش ديون وغير الاستثمارات!

– وإنت عرفت منين طالعلي كام ؟؟؟

– ببرود رد علي: مش عارف الرقم بالمليم.. بس بالميت كده مش حتقل عن كام مليون.”

​”بالميت كده”.. الكلمة دي حسستني إنه قاعد يحسبها بالورقة والقلم من ورايا وأنا حتى ما فكرتش فيها!

​أبويا الله يرحمه عمره ما اتكلم معايا في فلوس ولا تركة.

كنت عارفة إنه مستريح، وعارفة إن بيعة الشركة جابت قرشين حلوين.. بس أكتر من كده معرفش.

​بالليل، جُم حَماتي ماجدة وأخته مروة عشان يتعشوا معانا. ماجدة جابت معاها صينية بَشاميل، ومروة جابت حلويات.

​أول ثلث ساعة كنا بنتكلم عن العزا، القرايب اللي جايين من السفر، وهل الجراج هيقضي عربيات الناس ولا لأ.

​وفجأة.. ماجدة قالت إن صاحب الشقة زود عليها الإيجار.

​تنطح شريف على طول وقال:

– “ولا تشيلي هم يا أمي.. أول ما الإجراءات تخلص، هشتريلك شقة ملك باسمك.”

​إيدي اتسمرت في الشوكة.

ماجدة بربشت بعينيها وقالت: “يا حبيبي ما ينفعش تقل على نفسك كده..” بس كملت بسرعة: “على فكرة، في عمائر جديدة طالعة في التجمع شكلها حلو قوي!”

ضحكت مروة وقالت: “يا سلام! دي ماما مجهزة المنطقة من بدري بقى!”

شريف ضحك معاهم وبلع الطُعم، وبص لأخته وقال:

– “وانتي كمان هظبطلك دنيتك.”