احنا ثلاث سلايف
الجزء الخامس: سعاد دخلت بيتي!بصيت لمحمود وأنا مش مصدقة إنه رافض إني أطلع معاه أشوف إيه اللي حصل بين حسن وسعاد. قلت له: ـ ليه يا محمود؟ إيه المشكلة إني أطلع معاك؟ دي مرات أخوك، وأنا كمان من العيلة!
رد وهو بيلبس ساعته: ـ يا منال، مش ناقصة كلام دلوقتي. سعاد بتعيط ومش عارف إيه اللي حصل، وأنا لازم أتصرف. خرج محمود، وأنا فضلت واقفة مكاني، حاسة إن قلبي بيتقطع. كنت عارفة إن سعاد ممكن تكون بتكدب، لكن ما كنتش أقدر أثبت حاجة.
بعد حوالي نص ساعة، سمعت صوت حركة في السلم، فخرجت أبص من باب الشقة، ولقيت محمود طالع ومعاه سعاد، وفي إيدها شنطة هدوم. سعاد كانت بتعيط وبتقول: ـ والله يا محمود أنا تعبت، ومبقتش قادرة أعيش مع حسن بالشكل ده!
محمود كان بيحاول يهديها: ـ خلاص يا سعاد، اهدي، وإحنا هنشوف حل. وقفت قدامهم وسألت: ـ إيه اللي حصل؟ حسن طردك فعلًا؟سعاد بصت لي ومسحت دموعها وقالت: ـ معلش يا منال، أنا مش قادرة أتكلم دلوقتي.
محمود رد بدلها: ـ حسن اتخانق معاها، وهي مش هينفع تفضل لوحدها في الشارع. هتقعد عندنا لحد ما الأمور تهدى. بصيت له بصدمة: ـ عندنا إحنا؟ يعني هتقعد في شقتنا؟قال بمنتهى البساطة: ـ أيوه يا منال، دي مرات أخويا، ومش هسيبها من غير مكان تروح له.
كنت عايزة أصرخ وأقوله إن الست دي بتخطط تاخده مني، لكني تماسكت، لأن مفيش دليل أواجهه بيه. قلت له: ـ طب ما توديها عند نجلاء، أو تخليها تقعد في شقتها لحد ما تتفاهم مع حسن.
سعاد هنا رفعت عينيها وبصت لي بنظرة عمري ما هنساهـا، وبعدها قالت بصوت مكسور: ـ خلاص يا محمود، أنا مش عايزة أكون سبب مشاكل بينك وبين مراتك. أنا همشي وأشوف لي مكان تاني. محمود بص لي بعصبية: ـ إنتِ مش شايفة حالتها؟
بدل ما تقفي جنبها، بتقولي لها تمشي؟قلت له: ـ أنا مقولتش تمشي، أنا بقول إن فيه حلول تانية، ومش لازم تيجي تقعد في شقتنا إحنا. رد بحسم: ـ الموضوع انتهى يا منال. سعاد هتقعد معانا كام يوم، ومش عايز أسمع كلام تاني.
دخلت أوضتي وأنا حاسة إن بيتي بيتاخد مني حتة حتة. بالليل، كنت بجهز العشا، ولقيت سعاد داخلة المطبخ وبتقول لي: ـ محتاجة أساعدك في حاجة يا منال؟بصيت لها وقلت: ـ لا، شكرًا، أنا هخلص.
قربت مني وقالت بصوت واطي: ـ على فكرة، محمود طيب أوي، وبيخاف على الناس اللي بيحبهم. بصيت لها باستغراب، فردت بابتسامة: ـ ربنا يخليه لك، إنتِ محظوظة بيه. الكلام كان شكله عادي، لكن نبرة صوتها ونظرتها خلوني أحس إنها بتلمح لحاجة.
