احنا ثلاث سلايف
لكن الحقيقة إن فيه مؤامرة كاملة بتتعمل، وأنا وجوزي في قلبها!فضلت واقفة ورا باب أوضة نجلاء، مش قادرة أصدق اللي سمعته. سعاد عايزة تسيب حسن وتتجوز محمود جوزي، ونجلاء موافقة تساعدها علشان تتخلص منها كضرة!
يعني الاتنين اللي كنت فاكرة إن كل واحدة فيهم مش طايقة التانية، طلعوا متفقين عليا أنا!رجعت شقتي بهدوء، ودخلت أوضتي وقفلت الباب، وفضلت قاعدة أفكر في كل المواقف اللي حصلت من أول ما سعاد بدأت تستدعي محمود لشقتها.
افتكرت نظراتها ليا، وطريقتها وهي بتعيط في ح. ضنه، وإصرار محمود إني أنزل وأسيبهم لوحدهم. كل حاجة بدأت تتجمع في دماغي، لكن كان فيه سؤال واحد مش عارفة إجابته:هل محمود عارف إن سعاد عايزة تتجوزه، ولا هي بتخطط لوحدها؟
كنت نفسي أواجهه وأسأله، لكن خوفت لو اتكلمت من غير دليل، سعاد تقلب الموضوع عليا وتظهر قدامه في صورة الست المظلومة اللي أنا بغير منها. مسحت دموعي وقلت لنفسي: ـ لأ يا منال، مش هديهم الفرصة دي.
طول ما هما مخططين من ورايا، أنا كمان هعرف كل حاجة من غير ما يحسوا. تاني يوم الصبح، نزلت المطبخ أجهز الفطار، ولقيت نجلاء قاعدة مع سعاد وبيضحكوا كأن مفيش بينهم أي مشاكل. أول ما شافوني، سعاد قالت بابتسامة: ـ صباح الخير يا منال، تعالي اقعدي معانا.
بصيت لها وابتسمت: ـ صباح النور. قعدت معاهم، وفضلت أراقب كلامهم وتصرفاتهم. نجلاء قالت لسعاد: ـ إنتِ شكلك مرتاحة النهارده، أهو حسن بقى أحسن معاكي؟سعاد بصت لها بسرعة وقالت: ـ الحمد لله، ربنا يهديه.
وبعدين بصت لي وسألتني: ـ قولي لي يا منال، هو محمود بيحبك أوي كده زي ما إنتِ بتقولي؟السؤال جه فجأة، لدرجة إني استغربت. رديت بهدوء: ـ الحمد لله، إحنا عايشين كويس. ضحكت وقالت: ـ ربنا يخليكم لبعض يا حبيبتي، أصل الراجل مهما حب مراته، ساعات بيحتاج حد تاني يفهمه ويسمعه.
بصيت لها مباشرة وقلت: ـ أكيد، بس الراجل المتجوز المفروض يحافظ على بيته، والست المحترمة تعرف حدودها مع جوز غيرها. اتغيرت ملامحها للحظة، لكن سرعان ما ضحكت وقالت: ـ إنتِ فهمتي كلامي غلط يا منال، أنا قصدي على المشاكل العائلية بس.
نجلاء تدخلت بسرعة: ـ طيب يا جماعة، صباح الفل! هو إحنا هنبدأ اليوم بخناقة من دلوقتي؟قمت من مكاني وقلت: ـ لا يا حبيبتي، خناقات إيه بس؟ أنا عندي شغل في شقتي. طلعت وأنا متأكدة إن كلامي وصل لسعاد، وإنها بدأت تحس إني مش غافلة عن تصرفاتها زي الأول.
