جوزي كان عليه دين
جوزي كان عليه دين كبير لاخوه، فبقت مراته كل يوم تجيب اولادها وتقعدلي بيهم في شقتي وتقولهم ده مال ابوكم ،وكل ما اشكي لجوزي يحايلني ويطلب مني الصبر ،لحد ما امي جات عندي وشافت الوضع ده ووقتها قالتلي على فكره متخطرش في بال ابليس، وفي ظرف اسبوع واحد سلفتي حرمت تحط رجلها عندي تاتي !
!!! أنا واحدة من بنات الأرياف، اتجوزت راجل على قد حاله، بس شقيان وبيكسب لقمة عيشه بالحلال ومستورة والحمد لله. جوزي تعب وشقي عشان يعملي بيت من بابه، شقة على قدنا كده ومستقلة، بس بالنسبة لي وقتها كانت كأنها قصر، وكنت طايرة من الفرحة بيها وبيه.
قضينَا أول شهر بعد الجواز أيام ولا في الأحلام، هدوء وراحة وسعادة ملهاش وصف، وكل حاجة كانت ماشية زي الفل. لكن الحلم الجميل ده مكملش، وخلص الشهر الأول وجه وقت الجد، وجوزي نزل شغله الصبح بدري عشان لقمة العيش ومصاريف الحياة.
ومن أول يوم نزل فيه شغله، لقيت سلفتي جايبة عيالها الثلاثة وجات عندي من غير احم ولا دستور! في الأول افتكرتها جاية ترحب بيا وتزورني وتمشي زي اي قريبة، لكن اتفاجئت بيها واخدة راحتها على الآخر، ولا كأنها ضيفة ولا قاعدة في بيت غريب.
دخلت المطبخ عيني عينك من غير ما تستأذن ولا حتى تشاور، جابت أكل لعيالها من التلاجة، وطلعت أكلتهم وقعدتهم على السجادة النضيفة بوظوا الدنيا وبهدلوا المكان حواليهم. والأكتر من كده إنها كانت قاعدة تضحك ببرود وتقول معلش يا حبيبتي، أهم على طول كده، أنا حتى في بيتي مش ببطل مسح وراهم والپهدلة دي طبيعية.
كنت قاعدة مذهولة، مش مصدقة الجرأة دي جابتها منين ولا بتعمل كده ليه. بس اللي فاجأني أكتر ، لما لقيتها بتقول لعيالها بكل برود كلوا يا ولاد وخدوا راحتكم، ده مال أبوكم! هنا أعصابي فلتت ومستحملتش أكتر من كده، بصيت لها وقلت بحدة هو إيه اللي مال أبوهم؟
! أنتي بتتكلمي كده ليه وبتتصرفي بالطريقة دي في بيتي ازاي؟! ضحكت ببرود وقالت لي طبعا مال أبوهم، الأرض دي أرض أبوهم يا حبيبتي! أصل جوزي زمان كان شغال في السعودية وعنده أراضي وخير كتير، مش زي جوزك على قد حاله.
ولما جوزك جه يتجوزك، طلب من جوزي يديله حتة الأرض دي يبني عليها الشقة، وقاله هيوصله حقها على دفعات.. ومن وقتها لا وصل حق ولا نيل، وبالعافية جايب قوت يومه، يعني بالبلدي كده أنتوا قاعدين على ملكنا وفي بيتنا!.
