في ليله
كامله
في ليلة كنت قاعد قدام التليفزيون ع الأرض.. وساند ضهري على كنبة الأنتريه وببص لساره مراتي واللي مندمجه أوي وهي بتشوف المسلسل التركي بتاعها.. مديت أيدي بهدوء وفضلت أقربها بشويش من الريموت عشان متحسش بيا.. وخلاص لسه همسكه نزلت بأيدها على ضهر ايدي وخطفت الريموت وقالت
انسى يا حبيبي.. مش عاوزه اشوف ماتشات كوره خالص
ايه يا ستي هو انتي مستوليه ع الريموت كدا ع طول
دا انا برضو!! انا مش بشوف الا مسلسلين
و3 برامج طبخ وبس
وبس!! لا كتر خيرك.. انا اتخنقت من مسلسلاتك دي
وياريت اصلا بتتعلمي اكلات جديده من البرامج دي
هنلبخ ولا ايه.. مش عاجبك أكلي ؟
هو انا قولت حاجه.. وبعدين هو التليفزيون
دا بتاعك ولا بتاعي
بتاعي.. انا جايباه في الجهاز
بقى كدا ؟
بس بقى خليني اتابع المسلسل
طيب.. هاتي الريموت بقى
لا بعينك انسى.. حاولت اخد منها الريموت
وهي بتبعد ايدها عني.. كانت الاضاءه مطفيه في الصاله
ومفيش نور جاي الا من ناحية المطبخ ونور الtv
مسكت ايدها وحاولت اشد الريموت
وقعت ع الارض والريموت وقع منها ..حاولت تجيبه
سحبتها من رجلها ومديت ايدي ومسكناه مع بعض
بقولك سيبي بقى..
لا مش هسيب
أكتر من 5 دقائق وانا بحاول أخده منها
وبعدها ضغطت على زرار والقناه اتغيرت
وسمعنا صوت جاي من القناة بيقول
خلاص سيب الريموت من ايدك انت وهي وركز معايا
بصينا للشاشه مع بعض واتفاجأنا لما لقينا
عليها حد شكله مخيف…
كنت فاكر انه فيلم رعب في الأول.. حاولت اغير القناه
لكن الريموت مغيرش !!
ايه دا يا احمد هو في ايه؟
مش عارف !
الصوت رجع وقال
مش قولتلكم سيبوا الريموت
ساره مسكت دراعي وقالت
احمد انا خايفه…
متخافيش انا هقفله خالص
حاولت اقفله برضو متقفلش !!
لو مسيبتش الريموت هولع فيك وفيها
وشخط فيا وقال
سيبه بقولك… رميته من ايدي وانا بقول
حاضر.. خلاص اهو
ساره كانت بتعيط وهي بترتعش وخايفه
ممكن اعرف انت مين وعايز ايه ؟
قال بصوت مخيف
بأختصار ..انا روح لشخص اتقـ,ـتل في الشقه دي
من عشر سنين.. يعني قبل ما تشتروا الشقه
وتتجوزوا فيها بخمس سنين
عنيا وسعت وانا بسمع كلامه ..
كمل بعدها
انا عايش معاكم من سنه او أكتر..
انتوا ناس طيبين عيلة جميله وابنكم سيف
بيفكرني بابني حبيبي
انا اسف لو هقاطعك.. احنا ايه دخلنا بكل دا ؟
هكمل وافهمك انا ليه ظهرت دلوقتي
طيب بس بسرعه مراتي هتموـ,ـت من الخوف
لو نطقت بحرف تاني هقـ,ـتلها قدامك واريحها من خوفها
خلاص اسف بجد
انا في حد حاول يستحضر روحي عشان
يسألني عن امور متعلقه بتجارتي.. الشخص دا
كان ليه علاقه مش مباشره بقتـ,ـلي.. انا شكرته
انه رجعني للحياه عشان انتقم من اللي قـ,ـتلوني
تحب تعرفوا شكرته ازاي ؟
خوفت انطق.. فهزيت راسي فوق لتحت .. يعني اه
قال
قـ,ـتلته
هزيت راسي شمال ويمين وانا مستغرب
ازاي شكره وراح قتـ,ـله. هو دا شكره ليه يعني!!
كأنه فهم سؤالي من غير ما انطق
اه شكرته فقتـ,ـلته …بسهوله من غير عذاب
عكس باقي اللي قـ,ـتلوني.. عذبتهم لدرجة انهم
ارتاحوا لما ماتوا من عذابي ليهم
ساره كانت خلاص جالها تبلد من كتر الخوف
والرعب اللي عايشه فيه.. فضلت مبرقه وساكته
كمل وقال
كان المفروض ان روحي تهدى واختفى
بعد ما خدت انتقامي.. لكن للأسف
عرفت ان ابني الصغير.. اتعرض لحادثه
ودخل العنايه من سنه.. مراتي كانت هتتجنن
وصرفت اللي وراها واللي قدامها عليه
عمل 3 عمليات وفاضل له عمليه أخيره
ويقدر يمشي بعدها ويرجع يعيش حياته بشكل طبيعي
اتأثرت جدا وانا بقوله
ربنا يشفيه ويطمنكم عليه…انا متعاطف جدا مع اللي حصل
ليك ولأسرتك من بعدك
شكرا لمشاعرك دي.. بس التعاطف مش كفايه
يعني ايه ؟
انا محتاج مبلغ مالي ع الأقل 50 ألف جنيه
وواثق انك هتقدر تساعدني
اساعدك !! ازاي مش فاهم ؟
انا اصلا محتكمش ع المبلغ دا
انا عارف انت عليك اقساط عربيه غير مصاريف
ابنك والحضانه.. انا عايش معاكم من سنه
وعارف ظروفكم كويس..
طب ازاي هقدر اساعدك
دهب مراتك
ولأول مره ساره اتكلمت من ساعتها
دهبي ..لا محدش يقرب من دهبي
قال بصوت غاضب
كان ممكن اسرق الدهب بسهوله ومحدش كان عرف
او اعترض.. بس انا حبيت اقولكم الحقيقه
واعرض عليكم الأمر.. عشان تساعدوا في عمل الخير
دا وتاخده الجزاء..وكمان انا مش هقبل اني اعالج
ابني بفلوس حرام ..ياريت تقدروا موقفي
وصدقوني لو ساعدتوني انا هختفي من حياتكم تماما
طب ولو رفضنا نساعدك ؟
ساعتها بقى هخلي ابنكم الجميل
يحصله اللي حصل لابني.. مش هخليه يتحرك
واشوفكم بتتحسروا عليه كل يوم وانتوا شايفينوا
كدا قدامكم..
ايه!! لا كل الا ابني
انا مش عايزه الدهب.. انا هجيب له الدهب يا احمد
كله الا سيف
دخلت مراتي جوه تجيب الدهب
وفضلت انا قاعد وانا متوتر ومش مستوعب اللي بيحصل
بعدها بصيت لحاجه لفتت انتباهي وفكرت ثواني
وقولتله.. ممكن اقوم اشرب ..معلش
ماشي روح
دخلت المطبخ وشربت.. وبعدها
كانت مراتي طلعت دهبها وقلعت الحلق والدبله
وهي حزينه وبتتحسر عليهم
اخدته منها.. وقربت من شاشة التليفزيون
وانا بقوله..طيب هو انا هبعت الدهب لمراتك
واقولها اني فاعل خير ولا هتاخده انت
فكر شويه وبعدها قال
انا هقولك ممكن توصلها الدهب ازاي
فجأة طلعت سكين من ورا ضهري
وغرزتها بسرعه في رجله اللي كانت ظاهره
من ورا الشاشه ..وقولت
افتحي النور بسرعه يا ساره
ساره ارتبكت من اللي حصل ومع صوت
صرخته نتيجة اصابته
ولعت النور وانا مسكته من رقبته
وقولتله اطلع من عندك يا حقير
ساره قالت
هو في ايه يا احمد.. مين دا ؟؟
كان بيصرخ بقسوه والدم بينزف من رجله
شديته وخلعت القناع اللي كان لابسه
