رواية كامله.. 2

رواية بصائر تغشاها الثرى.
بقلم دفنا عمر.
الفصل الخامس.
________

عاونته على ارتداء قميصه بحرص متذمّرة.
_ معرفش ليه مصمم تروح الشغل.. يا حبيبي انت لسه تعبان ومحتاج راحة.
اخبرها بهدوء وعيناه تُطمئتها.
_ يا ضحى انا مبحبش قعدة البيت وزهقت.. فعلا بقيت أفضل كتير من الأول متقلقيش.
انتهت من غلق أزرار قميصه ثم أحاطت وجهه براحتيها تغمغم بعين دامعة.
_ ازاي مش عايزني اقلق عليك؟ ده أنا كنت هموت وأنت في المستشفى.. كل اما ابصلك و الاقيك غايب عن الوعي بتتألم أبكي عشانك.. ريان انت مش مجرد زوج.. انت حياتي كلها.

اشفق عليها مما عاشته الأيام الماضية ليعانقها برفق.
_ حبيبتي كلنا معرضين لأي حاجة تحصل معانا.. والحمد لله إن ربنا سترها.
ثم شاكسها.
وبعدين منا كنت حاسس بيكي وكل شوية اطبطب عليكي واطمنك.. حصل ولا لأ؟.
ابتسمت وهي تجفف دموعها.
_ فعلا.. كنت بستغرب ازاي سامعني وانت تقريبا غايب عن وعيك.
منحها نظرة تفيض حبًا.
_ لو غبت عن الدنيا كلها قلبي يحس بيكي ويسمعك.
ليستطرد وهو يغمز لها.
_ حتى لما حاولتي تبو،،سيني حسيت بيكي، ولما لقيتك بعدتي مسكت إيدك بوستها..مش فاكر حصل أيه بعدها.
ضحكت تنفي يا قاله بثقة.
_ أبوسك في المستشفى ازاي؟! محصلش.. ده الباب كان مش بيلحق يتقفل من كتر الزوار..
ثم تدلّلت عليه.
_ أكيد اتهيئلك عشان كنت مشتاقلي.
قرب خصرها إليه هامسًا أمام شفتيها.
_مستحيل أكون غلطان..أنا حسيت بأنفاسك.
ليميل قُرب شفتاها بذات الهمس.
_ يلا كملي اللي بدأتيه هناك.
لمعت عيناها برغبة حانية تقترب تمنحه ما يريده بشغف قبل ان تبتعد وتعانقته مع تنهيدة هاتفة براحة.
_ ربنا ما يحرمني منك ابدًا يا ريان.
_ ولا منك يا حبيبتي.
ارتدى بحذر سُترة بدلته وهي تتسائل.
_ تحب تتغدا ايه أنهاردة يا حبيبي.
_ أي حاجة من إيدك..المهم كارما تكون بتحبها.
تهكمت.
_ لو على بنتك مش هناكل ولا نشرب..عموما هتصرف واختار صنف بتحبوه انتم الاتنين.
ثم راحت تملي عليه وصاياها.
_ريان أنت قلت هتشتغل نص يوم بس.. لو حسيت بتعب لازم ترجع البيت فورًا.. بلاش تتعب نفسك عشان خاطري.
ابتسم يعدها لتطمئن.
_ حاضر أوعدك..
_ طب هتعرف تسوق؟
_ لأ..هتعامل مؤقتًا بأوبر لحد ما دراعي يخف.
وقبل رأسها.
_ هو خلاص جه تحت العمارة.. عايزة حاجة قبل ما امشي؟
_ عايزة سلامتك يا حبيبي.
___________
بعد أن فرغ من تلقي سيل الترحيب له فور ولوجه الشركة.. جلس خلف مكتبه يلتقط أنفاسه محدثًا أصيل.
_ وحشني الشغل أوي.. قعدة البيت دي ملل.
ابتسم له.
_ طبيعي مفيش راجل بيحب يفضل في البيت بدون شغل.. بس كان لازم تاخد راحة بعد الحادث.. وبجد حمد الله على سلامتك يا صاحبي.. والله كنت بقيّم الليل كل ليلة وادعيلك تقوم بسلامة.
_ عارف يا أصيل ومتأكد إنك دعيتلي كتير.. ربنا يديم المودة والمعروف.
ثم هتف بحماس.
_ ندخل بقى على الشغل.
ضحك أصيل.
_ مستعجل على الشقى ليه يا عم.
_ هو في أحلى من الشقى والتعب.
وقبل أن يبدأ أصيل بعرض ما لديه، قاطعهم طرقة سكرتيرة مكتبه.
_ في ضيف بيستأذن يدخل لحضرتك يا فندم.
زوى ريان ما بين حاجبيه.
_ ضيف مين اللي جاي بدري كده.
_ بيقول أسمه طَلال يا فندم.
تسائل بصوت مسموع.
_ طَلال؟

” معقول نسيت صاحبك يا ريّال؟”
وقف ريان بدهشة.
_ مش ممكن! طَلال؟
ثم تصافحا وتعانقت ليئن ريان بألم حين ضغط على كتفه المصاب بجهل لإصابته.
طَلال: إيش فيك؟
أصيل موضحًا.
_ ريان كان عامل حادث من فترة يا أستاذ طَلال ولسه كسر دراعة وكتفه مش مُتعافي مية في مية.
قال بأسف.
_ ألف لا بأس عليك يا خوي.
ريان بتفهم بعد أن التقط أنفاسه.
_ ولا يهمك.. بس قولي إيه الغيبة دي كلها؟ ست شهور قاعد في الكويت منزلتش مصر ولا حس ولا خبر..لعل المانع خير.
بدا على ملامحه الحزن وقال.
_ الوالد عطاكم عمره من تلات شهور.
اغتمّ وجهي أصيل وريان مُلقيان عليه كلمات تعزية مناسبة.. ليلومه الأخير.
_ طب مش كنت تعرفني حتى اتصل بالوالد اسمع صوته؟.
تنهد طَلال مع قوله.
_ لا تواخذني يا خوي..الواحد ما كان داري وين الله حاطه.
أصيل بتفهم.
_ أكيد الظرف كان صعب والتركيز بيكون ضايع.. عموما ربنا يجعلها أخر الاحزان يا أستاذ طَلال.
واستأذن لمواصلة عمله تاركًا الرجل بضيافة ريان.

أرتشف من القهوة التي طلبها له ريان قبل ان يسأله الأخير.
_ بتقول عايزني في موضوع مهم يا طَلال.. خير؟
رفع نظره إليه يقول.
_ خير إن شاء الله.. باختصار كده عندي ليك عرض ميتفوتش يا ريان اتمنى تقبله.
اولاه كامل اهتمامه غير متعجب من المزيج الذي يُتقنه طَلال للّهجة الكويتية والمصرية معًا، فرغم كونه كويتي الجنسية لكن والدته مصرية.. لذا هو بارع في اللّهجتان ويتنقل بينهما بسلاسة.
_ عرض إيه ده يا صاحبي شوقتني.
غمغم بعد ان ترك فنجانه جانبًا.
_ طبعا بعد وفاة أبوي كله أخد حصته من الميراث..وانا طلع من نصيبي أنا وأخوي جمال مول تجاري ضخم.
_ ما شاء الله.. ربنا يبارك ليكم ويكبر حلالكم ان شاء الله.
_ تسلم يا خوي.. بس طبعا انت عارف المنافسة هناك قوية لانه مش المول الوحيد في المنطقة.. وللأسف مؤخرًا أرباحه ضعفت جدًا و وضعه تدهور..الإدارة والتسويق هناك مش أحسن حاجة..وأنا وأخوي مش هنقدر نحل مشاكله بدون مساعدة حد ثقة..خصوصًا اني استعانت فعلا بإدارة جديدة لكن شكله مش كفء زي ما توقعت.. ولأني عارف قدراتك كويس متأكد إنك لو مسكت المول ده كام سنة هتغير ترتيبة في السوق وأرباحه هتزيد.

بدا على الريان التفكير ليواصل طَلال دعم عرضه.
_ صدقني دي فرصة كبيرة يا اخوي.. أولا انا هوفرلك إقامة ليك ولعيلتك.. وسكن يليق بيكم في السالمية عشان تكون قريب من شغلك..وأي حاجة تحتاجها هناك انا حاضر.

حك ريان ذقنه مفكرًا ليقول.
_ مش عارف أقولك ايه يا طَلال.. العرض مغري فعلا لكن في نفس الوقت فكرة الغربة نفسها مش مريحاني.. حاسس لو خرجت من بلدي مش هكون مبسوط.
_ ويمكن العكس.
_ ومراتي أشك أنها توافق كمان.
_بلاش تسبق الأحداث كلمها وشوف..ريان أنا ممكن أشوف حد تاني يساعدني بس العرض ده فرصة كبيرة ليك وعايزك تستفيد منه.
ليقف بعد أن أنهى عرض ما لديه.
_عموما العقد هيكون بتلات سنين مبدئيًا..اعتقد ده وقت كافي لتغير وضع المول وإصلاح إدارته.. ولو حبيت تنهي العقد او تجدده انا تحت أمرك.. والراتب هيكون مجزى مليون مرة من اللي بتاخده هنا.. يعني كام سنة ممكن تأمّن فيهم مستقبل عيلتك وتوفر تعب سنين.
أطرق رأسه تتقاذفه الحيرة والعرض لا يُرفض ومع هذا شيء في صدره لا يروقه الأمر.

_ اسمع يا اخوي ريان.. خد وقتك في التفكير قبل ما تاخد قرار نهائي.. وبس تاخد قرار انا حاضر وهبدأ في إجراءات إقامتك فوارًا.

أوقفه ريان.
_ طب أستني يا طَلال نتغدا سوا أكلة مصرية من اللي بتحبها.. معقول تمشي من غير ما أعمل معاك واجب بعد الغيبة دي.

لوح له وهو يقترب من الباب في عُجالة.
_ يا ريّال خالتي تذبحني لو أكلت برة.. مسويالي محاشي وطواجن مصرية وكل الأكل اللي بحبه..سلام يا اخوي وألف لا بأس عليك.
ودعه ريان بابتسامة ثم عاد يجلس خلف مكتبه يتملكه الشرود بعرض طَلال المغري وكيف سوف تسير الأمور.
__________

“شوفتوا التريند الجديد يا بنات؟.”

ألتفتت إحداهنّ وتُدعى صفاء.
_ أي تريند فيهم يا سماح؟ ام ساجدة بتاعة الفواتشح ولا انهي؟ التريندات كتير وبقيت مهنة الأيام دي.
قالت الأخيرة بامتعاض نمّ عن استيائها.
_بتاع البنت اللي سرقت جوز صاحبتها.
ردت ولاء زميلهم الثالثة.
_ أيوة ده التيك توك مقلوب عليها بقاله يومين.
سماح بانفعال امتزج بنفورها.
_ البجاحة مبقاش ليها حدود الأيام دي.. ازاي واحدة تطمع في جوز صاحبتها بالبساطة دي؟ خلاص مفيش في الكون راجل غيره؟ الاخلاق راحت فين يا ناس؟!
صفاء.
_الأخلاق الله يرحمها يا سماح.
واستطردت تطرح تساؤلها.
_ تفتكروا العيب هنا على مين يا بنات؟ الزوج الخاين لا الصديقة الطماعة؟
سماح دون تردد.
_ طبعا الزوج.. أكيد هو اللي شجع صاحبتها تطمع فيه.. ماهو لو مشافتش منه ريق حلو كانت شالته من دماغها أصلا وشافت طير غيرو تصطادوا.
ولاء: وليه مش الصديقة اللي خانت العيش والملح وعرفت توقع الزوج في شباكها؟
سماح بسخط.
_ والله يا ولاء الاتنين ولاد تيت يستاهلوا الحرق.
واسترسلت.
_ تعرفوا يا بنات انا في رأيي مفيش راجل في الدنيا دي مش خاين..والخيانة مش بس في السرير.. ده ممكن يخون وهو قاعد جنب مراته بيتفرج على التليفزيون ويشوف بنت حلوة تعجبه ويتمناها.. وبينسى كرّشه وقرعته اللي بتلمع أكتر من صواني الشاي.. الوفاء عمّلة مالهاش سوق في الزمن ده.. وأي راجل هتتوفر له ظروف الخيانة مش هيتردد صدقوني ده طبع فيهم.
اعترضت ولاء.
_ لا بردو متسوديش الدنيا كده يا سماح.. في لسه ناس وفيّة لزوجاتها.. نادرة صحيح بس موجودة.
امتعضت سماح بحركة ساخرة من شفتيها.
_ نادرة ماتت من زمان يا طيبة.. آل نادرة آل.
_ طب يا بنات هو ازاي الواحدة تعرف ان كان جوزها بيخونها ولا لأ؟.
هكذا تسائلت صفاء لتوليها سماح اهتمام كبير مفضية برأيها الّذي تكون من خبراتها في الحياة.
_  هقولك يا ستي.. الرجالة بتكون خبيثة ولئيمة جدا لما بتخون..بعضهم اللي لسه عنده شوية إحساس  لما يخون بيحس بتأنيب ضمير..فتلاقيه يزود جرعة الحنية والاهتمام على مراته ويفضل يجيب هدايا وفسح ودلع يبقى منتهى الرقة معاها..كأنه اعتذار مبطن عن خيانته عشان يسكت ضميره.

ولاء.
_ معقول يا سماح؟ يعني كل واحدة جوزها يعاملها حلو وحنين عليها تشك فيه؟ مش منطقي طبعا الكلام ده يا بتتي.
_ وحياتك هو ده اللي بيحصل.. لأ ده ساعات كمان لو اللي بيخون مراته معاها واحدة قريبة ليهم.. بيتظاهر انه آل ايه مش طايقها عشان يبعد أي شبهه عنه.
صفاء ساخرة.
_ لا ذكي لو عمل كده..وقتها فعلا مراته مش هتشك فيهم.
سماح: لو ست ناصحة هتفهم.
ثم التفتت لضحى المنشغلة بتدوين شيء بدفترها ولم تشاركهم النقاش.
_ ايه رأيك في الكلام ده يا ضحى؟
تركت ما تفعله ونظرت لها بهدوء.
_ والله يا سماح انا شايفة إن وجهة نظرك مش صح مية في المية..في ازواج فعلا أوفياء وكويسين مع زوجاتهم.. لو كل واحدة هتشك في جوزها عشان بيهتم بيها لأي سبب البيوت هتخرب.
واسترسلت.
_ انا شايفة ان الموضوع كله بيتلخص في الثقة.. لو موجودة بين الزوجين مفيش داعي للقلق والشك.
ثم تابعت بفخر.
يعني أنا مثلا بثق في ريان جوزي ثقة عامية ومستحيل أشك فيه مهما حصل.. الحمد لله احنا واخدين بعض عن حب..ومستحيل يبص لغيري ولا انا يملى عيني راجل زيه.. ربنا يخليه ليا.
أمّن جميعهنّ على دعائها لتعلق سماح بتهكم.
_ انا بقى معنديش ثقة في جوزي، ولولا عيوني مفتحة معاه كان زمانه لعب بديله.. بس انا مظبطاه.
ضحكت صفاء.
_ أنتي هتقوليلي.. ده أخره على القهوة الساعة عشرة، لو اتأخر بتعمليله محاضر مش محضر واحد.
سماح: أومال اسيبه كده يرمح براحته؟ لازم امسك لجامه في إيدي عشان ميفكرش يفلت مني.

ابتسمت ضحى دون تعليق أخر مكتفية بما قالته.. لم يصيبها ذرّة قلق مما قالوه..راسخ في يقينها أنها أبعد ما يكون عن خطر خيانة مماثلة مما يقصوها.. وفاء زوجها وحبه لها يُضرب به المثل.. ليس مثلها من تقلق.. وعادت تنخرط بعملها دون أن يخطر في بالها مصدر الخطر الحقيقي الّذي يحوم حولها ولا تراه.. خطر ينتظر فقط فرصة لينفذ إلى جُحرها ويحتله ويلقيها خارجه.
________

“أنا مش موافقة يا ريان إنك تتغرب”

كان هذا رأي ضحى الّذي أعلنته بحسم وهما يتناولان الشاي بعد الغداء..طيلة عمرها لا تحب الغربة وتخافها..لذا لم تحتاج للتفكير حين سرد عليها عرض صديقه طَلال.

_ ضحى انا كمان مش متحمس لفكرة الغربة عن بلدي..بس بجد العرض مغري وهيختصر علينا تعب سنين زي ما قال طَلال..أنتي عارفة إني طموح وبحلم نوصل لمستوى أفضل.
_ وهو مستوانا دلوقت وحش يا ريان؟ احنا الحمد لله عايشين كويس اوي ومش محرومين من حاجة.
اوضح لها وجهة نظره.
_ ألف حمد وشكر انا مش معترض.. بس متنسيش احنا كل اللي حيلتنا بنت واحدة أكيد بأمر ربنا هيكون لها أخوات.. وانا عايز أأمن مستقبل ولادي حتى قبل ما يجوا يا ضحى.. نفسي اعمل شركة خاصة بيا لوحدي وولادي يديروها بعدي.
انزعجت تقول سريعًا.
_ بعد الشر عنك يا حبيبي ربنا يديك طولة العمر والصحة.
تنهد مع قوله.
_ ونعم بالله.. دي سنة الحياة وانا مش عايز ولادي يعيشوا اللي انا عشته يا ضحى.. انتي عارفة حياتي ازاي كانت صعبة.. عايز حياتهم تكون مرتاحة.. وانا شايف السفر كام سنة نبني نفسنا مش غلط.
_ ما هي بتبتدي كده يا ريان.. سنة تجر سنة لحد ما العمر يروح هناك.
ثم التقطت كفه تغمغم.
_ حبيبي هنا اهلنا وحبايبنا.. شوارعنا اللي بنحبها.. طعم أعيادنا اللي مختلف عن أي مكان تاني.. حاجات كتير أوي يا ريان هنفقدها مع الغربة..أرجوك بلاش تفكر في العرض ده وأنساه عشان خاطري.

ربت على كفها ثم ارتخى على ظهر مقعده وهو ينظر لها بشرود قبل ان يقول.
_مش غلط لو أخدنا فرصة نفكر كويس قبل ما ارد على طَلال.. واللي ربنا كاتبه لينا هيكون.

وافقته بإيماءة وداخلها الأمر محسوم.. لن ترضى باغترابهما هي وابنتها..سوف تعترض رغبته بكل قوتها إذا ما قرر الذهاب.
________

احتفال صغير أقاموه الزميلات حين تجمعوا وقت استراحة الغداء توديعًا لزميلة أخرى قررت ترك العمل معهم لأنها سوف تتزوج وتمكث في البيت.. تعجبت غزل أن تلك رغبة الزميلة وليست مجبرة عليها.. كيف تضحي تلك الحمقاء بعملها لأجل الزواج؟ تغاضت عن الأمر لتخبرها إحداهن همسًا بمعلومتها السرية عن قدوم زميل اخر بديلا عن زميلاتهنّ، معلومة لم تمثل لغزل أي أهمية، كما لم تحاول إخبار زوجها كي لا تلوح بينهما أزمة أخرى، هي تعلم أنه يغار وقد زارها بعملها عدة مرات واطمئن أن من يشاركها المكتب هم نساء ورجل عجوز لا قلق منه.
مر الوقت وهي مستمتعة بما تفعل، تحاول جاهدة في كل يوم أن تثبت نفسها في العمل كما لا تهمل بيتها حتى لا يغضب أصيل ويحرمها ما وصلت إليه..مر يومان وأتت لحظة استقبال الزميل الجديد.

_ رامي كمال.

هكذا عرف عن نفسه للجميع بتهذيب، ليرد الكل تحيته ومن بينهم غزل الّتي قيمته بنظرة خاطفة.. لا تدري لما شعرت أنها رأته من قبل لكن لا تتذكر أين.. نفضت عنها الأمر لتلتفت لأناقته الملحوظة واهتمامه الواضح بمظهره..كما بدا لها ودود مع الجميع منذ يومه الأول حتى أنه أحضر لهم شطائر تقبلها الكل بصدر رحب ومزاح معتدل.. هي الوحيدة التي رفضت أن تأخذ منه شيء معللة ذلك أن لديها طعامها ..وسريعا ما تغاضت عن كل هذا وصبت تركيزها بالعمل حتى حان وقت عودتها فاستقلت الحافلة لمنزلها..ورغم أن أصيل عرض أن يوصلها ويحضرها من عملها خوفًا عليها من الزحام.. لكنها رفضت بشدة مساعدته راغبة أن تخوض يومها بكامل مشاقه دون دعم منه وكي لا تتميز عن البقية.. خاصتًا الجارة التي كانت تصحبها ذهابًا وعودة قبل أن تأخذ أجازة وضع لقرب ولادتها..أعتادت غزل روتين عملها دون ملل تتلمس منه سعادة داخلية لا تشعرها مع أصيل رغم كل ما يفعله لأجلها.. هناك نقص داخلها يؤرق مضجعها دائمًا..نقص تتسع دائرته بروحها ولا تدري كيف توقف اتساعه.. حياتها تفتقد شيء ما تبحث عنه بين الطرقات دون هدى..وازداد هذا الشعور داخلها منذ لقائها بضحى زوجة رفيقه.. وحكايا رفيقاتها المشابهة عن قصص حب خاضوها واستمتعوا بها.. كأن الجميع يتآمر عليها لتتحسر على حياتها الباردة أكثر وأكثر..رغم حب أصيل لا تشعر بالدفء..حتى صغارها لا يشعروها بهذا الدفء ولا يكفوها لترضى بحياتها وتقنع.

توالت الأيام بها وحالها مستقر نوعًا ما..لكن متى دام شيء على حاله وذاك الزميل الذي لم تكترث له من وقت حضوره يختلس نحوها النظرات دون غيرها كأنه يعلن إعجابه بها.. هذا ما فضحته عيناه، ولا تسألون كيف تيقنت من ظنها، تلك أمور تُدركها المرأة ولا يُخطئها حدسها، هذا الرجل مجذوب لها، شيء من الغرور والرضا الخفي توهج بروح غزل لأن سهم فتنتها لازال نافذ يخترق القلوب، ليس بجديد أن ينجذب أحدًا لسيدة بفتنتها، لكن الجديد والخطير دون مبالغة أن تنساق هى لجاذبية هذا الرجل، وسامته لا تستطع تجاوزها، قوامه الرياضي، أناقته تثير الإعجاب حتى تتعجب داخلها كيف يكون مجرد زميل معهم وهو يليق أن يكون رئيس لهم،  كل شيء بهذا الرجل يسوقها لأحاسيس تخشى عواقبها لو رضخت لها بلحظة ضعف..وما أكثر لحظاتها الهشة.

“اعمليلي شاي يا غزل”.

اطاعته شاردة منذ عادت من عملها تفكر بأمر الزميل رغمًا عنها.. وسريعا ما وضعت قدح الشاي أمام أصيل على طاولته الصغيرة، جلست تتأمله ودون شعور راحت تُقارن زميلها الوسيم بزوجها فقير الوسامة، ذوق ملابسه العادية دون أناقة ملفتة، خيالها يشرد عنها مثل جواد جامح فقد صاحبه اللجام، ذهنها مشوش وذاك الزميل يفرض سيطرته على أفكارها الخفية طيلة الوقت، تشعر بالخوف لانحراف خواطرها، تحاول مبارزة مشاعرها الخطيرة هذه بسيف التجاهل، لكنها من جديد تفشل وتظل أسيرة أفكارها اللّعينة.
…….

ترجلت غزل خارج بناية الشركة بعد انتهاء عملها، لتقف تهمهم بسباب ساخط وهي تنظر لكعب حذائها المكسور: أوف على النحس ده وقته ياربي، هرجع البيت ازاي.

حاولت السير بصعوبة وفردة الحذاء المكسور تجعل خطوتها غير متوازنة، فكرت أن تهشم كعب الفردة الأخرى كي تستطع السير، همت بتنفيذ خاطرها لتسمع أحدهم ينادي عليها.

_غزل.

التفتت لتجده هو “رامي” يقترب نحوها حتى وقف قُبالتِها وهو يرمق حذائها بأسف.
_شكل في مشكلة معاكي.
تنحنحت لتخفى أثر ارتباكها منه.
_ عادي أنا هتصرف.
_هتتصرفي ازاي يعنى؟
ثم أشار لسيارته: اتفضلي اوصلك.
_لا شكرا يا استاذ رامي انا هعرف اشوف حل و..
قاطعها: غزل من فضلك بلاش الرسميات دي واتفضلي معايا، انا هوصلك مش هخطفك يعني.

شعرت بالضيق لتباسطه معها لتصيح بحدة نبعت من تأثرها به.
_ على فكرة أسمي مدام غزل.
ابتسم يرمقها بنظرة غامضة قبل أن يقول بهدوء.
أنا أسف.. حبيت نتعامل مع بعض بطريقة بسيطة لأننا زملاء عمل في الأخر.
_ ولوّ.. بردو يبقى فيه حدود يا أستاذ رامي.
أومأ معتذرًا.
_ تمام وأسف يا مدام غزل مش قصدي أتعدى حدودي.. ثم أشار لسيارته.
_ ممكن تتفضلي اوصلك؟
رفضت بحسم.
_ شكرًا..هاخد تاكس.
_ وليه منا ممكن أوصلك لأقرب محطة تركبي منها.
صاحت بضجر.
_ قلت لحضرتك شكرًا..عن أذنك.
وابتعدت دون إعطائه مجالًا لمجادلته.. تهرب من تأثير نظراته الغريب نحوها..هذا الرجل يرمقها كأنه يعرفها.. والعجيب شعورها أنها قابلته في مكان ما يلح عليها.. لكن لا تتذكر أين ومتى..وأثناء شرودها هذا ألتوت قدمها لتسقط أرضًا تصرخ من الألم.. أسرع نحوها يُغيثها.
_ مدام غزل أنتي بخير.
أغمضت عيناها وملامح الوجع جليّة عليها ليمد لها يده بتلقائية قائلا.
_ أمسكي إيدي وقومي معايا.
نظرت لكفه الممدودة لها دون استجابة..حاولت النهوض لتفشل وهي تسقط من جديد.
_مدام غزل خليني أساعدك و أوديكي المستشفى بسرعة.. احتمال رجلك تكون اتكسرت.
هكذا كانت تشعر والألم الرهيب ينم حتما عن تهشم عظام قدمها.. اضطرت الاستعانة بكفه لتنهض.. شعرت بتوتر شديد ما أن تلامست أيديهم ونغزة من تأنيب ضميرها لفعلتها حتى لو كانت مجبرة.. فلا يجوز بأي حال من الأحوال لمس رجل أخر.

_ثواني أقرب العربية منك عشان مش هتقدري تمشى.
نظرت حولها بارتباك وهو يقف أمامها ويفتح باب السيارة يدعوها لتستقل جواره.. بعد تردد عاجزة عن الوقوف على قدميها رضخت اخيرا لدعوته واستقلت سيارته تدعوا ألا يراها أحدا من زملائهما، فلن تسلم من الأقاويل حينها.
_شوفتي بقا طلعت مش وحش هياكّلك ويفترسك لو ركبتي العربية معايا.
ابتسمت ابتسامة باهتة دون تعقيب ليستطرد:
_ في مستشفى هنا قريبة ربع ساعة ونوصل عندها.
غمغمت.
_ لو سمحت وصلني عند باب المستشفى وامشي وأنا هتصرف.
اعترض بقوله.
_ أزاي اسيبك في الحالة دي وانتي مش قادرة تمشي.
_ معلش أنا هتصرف.. هتصل بجوزي يجيني.
أومأ متفهًا قلقها ليتمتم بإحباط.
_ عندك حق.. الأفضل جوزك هو اللي يبقى معاكي.. عموما اللي يريحك.

توقف أمام المشفى لتغادر سيارته بصعوبة من فرط الألم ثم جلست جانبًا فوق الدرج عاجزة عن صعوده.
_ طب خليني أساعدك لحد ما تدخلي الأستقبال.
وجدت نفسها تحدثه بحدة مما تشعر به من ضغط.
_ من فضلك يا أستاذ رامي أمشي وكتر خيرك لحد كده.. هتصل بجوزي وهو اللي هيساعدني.
استقبل حدتها بحزن وغمغم بحرج.
_ أنا أسف كان قصدي أساعد.. مش هاين عليا أسيبك في الحالة دي لوحدك.
_ شكرا لحضرتك.. اتفضل وأنا هتصرف.

لم يبقى له سبيلًا إلا الرحيل لتهاتف زوجها وتخبره بما صار معها..استشعرت خوفه الشديد وهو يقول في عجالة.
_ خليكي مكانك يا حبيبتي دقايق واكون عندك.

لم يمضى القليل إلا و وجدت سيارة أصيل تقف أمامها يغادرها بلهفة مهرولًا نحوها يتحسس قدمها المصابة بحزن.
_ ايه اللي حصل يا حبيبتي.
_ كعب جزمتي اتكسر..حاولت امشي رجلي اتلوت من غير ما اقصد.
حملها بين ذراعيه يمنحها نظرة دافئة وهو يصعد بها الدرج المفضي لردهة أستقبال المشفى.
_ سلامتك يا حبيبتي.. إن شاء الله بسيطة.
أخفت وجهها بكتفه تشعر بالخزي لمواجهته..هل لو علم أصيل أن رجل غيره لمس كفها وساعدها لتصل إلى هنا سوف يمرر الأمر؟
_ جيتي ازاي هنا لوحدك؟
توقعت سؤاله وأعدت الإجابة مسبقًا.
_ طلبت أوبر وصلني لحد هنا بس مقدرتش اطلع السلم لوحدي.
لثم رأسها لتشعر بحرج مما ينظرون لهما وهو يعبر بها ردهة الأستقبال وسريعا ما تعامل المختصين معها.

_ شرخ في الكاحل.. هتحتاج أسبوعين أو تلاتة متمشيش على رجلها لحد ما تخف تمامًا.
هكذا قال الطبيب الذي استكشف حالة قدمها وشرع في لف جبيرة حولها تحت نظرات أصيل الحزينة لأجلها..حملها بين ذراعيه متوجها لسيارته وأسكنها بحرص في المقعد الأمامي متخذًا موضعه جوارها.. التقط يدها وقبلها بحنان.
_ ألف سلامة عليكي حبيبتي.. معلش في ميزان حساناتك.
أومأت له شاعرة بالإجهاد والضيق معًا لتعبر عنه.
_ هعمل ايه في شغلي يا أصيل.
_ متقلقيش هروح بكرة اطلبلك إجازة ومعايا الإشاعة بتاعة رجلك.. مفيش حاجة أهم من صحتك دلوقت.
وعدل لها وضع ظهر مقعدها لترتاح في جلستها استرخت مغمضة عيناها تهرب من نظراته.. تشعر أنه لو دقق النظر إليها لكشف كذبها بشأن مجيئها إلى المشفى.. كما وخز ضميرها يؤنبها لكن ماذا كانت تفعل وهي عاجزة عن النهوض وحدها..ما كان أمامها إلا الاستعانة برامي.. الأمر بسيط لا يحتاج منها كل هذا الجلد من ضميرها..ليكف هذا الأخير عن لومها.. لا ينقصها لومه.
_________

في نفس لحظة مغادرة ريان البناية كانت هي مّقدمة عليه مفترشة ابتسامة تُخبِر عن سعادتها لتلك المصادفة.

_ استاذ ريان ازيك دلوقت بقيت احسن؟
وبجراءة كانت عيناها تمر على جسده الّذي استعاد كامل عافيته لتهتف بينما هو يرمقها بجمود.
_ الحمد لله على سلامتك.. متتصورش حضرتك أزاي كنت هتجنن عشانك.
تنحنحت حين شعرت بتجاوزها بوصف مشاعرها.
_ قصدي زعلت عشان اللي حصلك بس الحمد لله شكلك بقيت احسن عن ما كنت في المستشفى.
ضيق عيناه وهو يرمقها بغموض ليُحدثها للمرة الاولى.
_ هي ضحى عارفة إنك طالعة عندها؟
_ الحقيقة لأ.. انا كنت قريبة من هنا قلت اطلع اطمن عليك..
لتتلعثم ثانيًا متراجعة عن قولها سريعا.
_ قصدي عليكم كلم.. أصلها من وقت الحادث بتاعك مش بتكلمني خالص.. قلت اجي اسأل.. ضحى صحبتي وغالية عندي.
رمقها بتظرة فاحصة لا تخلوا من استهزاء مبطن ثم قال.
_ممكن نروح مكان نتكلم شوية ولا لازم تطلعي لضحى دلوقت؟
صاحت بلهفة لا تصدق انه يدعوها لتصحبه في مكان ما.
_ لا مش مهم اطلع لضحى.. قصدي عادي ممكن اعدي عليها وقت تاني.
غمغم بمزيد من غموضه.
_ هنشوف.
وتقدم ناحية سيارته وهي خلفه تركض مثل جروّ.. جاورته في المقعد الأمامي.. نفس المكان الّذي تحتله ضحى بالعادة.. شعرت بتلذذ ونشوة طاغية داخلها وهي تتخيل ولو للحظات أنها بالفعل مكانها.. هي من تجلس جواره..وتتحدث معه ويمنحها تلك الابتسامة الحانية التي يمنحها لضحى.

التزم الصمت يقود سيارته شاردًا يرتب أفكاره والقرار الذي اتخذه بينما هي تتأمل جانب وجهه بوله واضح.. منجذبة له حد الجنون.. لتتسائل بخضم نشوتها عن سبب اصطحابه لها؟ وأين يأخذها وفيما يريدها؟ لكن هل يهم؟ ألا يكفي انها اخذت فرصة لتكون معه دون زوجته؟.. مهما كان ما سوف يحدثها به لا يهم.. ما يصير الآن هو خطوة ولو صغيرة في طريق حلمها بهذا الرجل.

_ كنت خايفة عليك أوي.

قالتها وهي ترمقه بنظرة جريئة تحاول استقطابه دون ان تتراجع عما قالته تلك المرة… وقد قررت ان تُجاهر بلمحة من مشاعرها نحوه علّه ينتبه لها.. لكن للعجب لم يبدي ريان رد فعل لما قالته وظلت عيناه ثابتة گ الصقر فوق الطريق بتركيز.. أغراها صمته بأن ما قالته قد راقه.. فواصلت بوقاحة.
_تعرف.. عمري في حياتي ما خوفت على حد كده.. رغم اني كنت زعلانة منك عشان اخر مرة عاملتني بطريقة مهينة ونزلتني وسط الطريق.. لكن لما…..

_ شكلك هتزعلي مني المرة دي كمان يا أنسة جيلان.

ضيقت عيناها بغموض لما قاله متوجسة من نبرة صوته الباردة خاصتًا حين التفت لها ريان يرمقها بازدراء.
_ الحقيقة أنا ميفرقش معايا خالص زعلك.. أنتي كُلك على بعضك متسويش حاجة في نظري.

اتسعت عيناها عن اخرها بذهول لكلماته التي لم تتوقعها قط..ما الّذي يقوله؟ كيف يُحدثها بتلك الطريقة؟

_ طول عمري مبحبش الحاجة الرخيصة لأنها بتبقى مزيفة شكلًا وموضوعًا..وانتي كده بالظبط.. بتمثلي إنك بتحبي ضحى لكن انتي في الحقيقة مبتحبيهاش..علاقتك بيها مجرد علاقة بتحققلك مكاسب مش أكتر..رغم أنها للأسف بتعاملك بكل صدق وإخلاص ومعتبراكي فعلا صديقة مهمة.

تجرعت ريقها الّذي كاد يتجمد من دهشتها لهجومه.. وكأن رياح باردة صفعت جسدها بأكمله بعد أن كشف ريان عن ستائر خبثها بكل بساطة كاشفًا نواياها المتوارية خلف الستار.. ليسترسل متجاهلا تعابير وجهها.

_ أنتي متستاهليش تكوني صديقة مراتي.. أنتي مش شبهها ولا هتقدري تكوني زيها.. عشان كده أنا بحذرك تحاولي تكلميها أو تزوريها مرة تانية..أختفي من حياتها و أنسي إنك تعرفيها وإلا قسمًا عظمًا أفضحك قصادها ومش بس هي.. أمك المسكينة اللي فاكرة أنها ربت واحدة محترمة.. هخليها تحس بالعار لما تعرف إن بنتها بتبص لجوز صاحبتها اللي أحسنت إليها.

هجومه المباغت وتهديده وكشفه لبواطنها عقد لسانها لحظات لكنها تماسكت وحاولت الدفاع عن نفسها وصون ما تبقى من كرامتها وهي تنفي اتهامه.

_ ايه اللي حضرتك بتقوله ده.. أنا مسمحلكش تكلمني بالطريقة دي وتظلمني بالشكل ده.. أنت اكيد فاهم غلط يا استاذ ريان.. أنا مستحيل أعمل اللي اتهمتني بيه ده.. وضحي دي صحبتي وربنا يعلم أني.

_ إنك كدابة ومنافقة.. ولولا خايف على ضحى من صدمتها فيكي لو عرفتها حقيقتك كنت عرفتها..بس خسارة مراتي تزعل لحظة بسبب واحدة رخيصة زيك..أنتي أتفه من إنك تزعليها..وانا كفيل ابعدك عنها.

ضيقت جيلان عيناها ترمقه بكل ما تولد بها من حقد وغضب لإهاناته المتوالية لها وهو يواصل سحق كرامتها تحت مقصلة كلماته الجارحة..وكانت تظن بغباء أنها ربما تؤثر بها وتجذبه إليها وهو سوف يستجيب مثل سائر الرجال لغرائزه وغروره أنه مرغوب من أخرى.. لم تكن تعلم أنه وفيّ لزوجته بهذا القدر.. ويستحقرها لهذا الحد.

_ الراجل اللي قدامك ده لف ودار وياما شاف في حياته ويعرف يحكم على الناس كويس أوي.. وأنتي بت مش سالكة وقلبك أسود حقود..  وبجد غبية أوي.. فاكرة إنك كنتي هتقدري تأثري عليا أو مش هفهم مكرك.. لو تعرفي أصلا شايفك ازاي تدفني نفسك مكانك من كتر ما بحتقرك.

_ أخرس أنا مسمحلكش.
_ أنتي اللي تخرسي.. ويلا انزلي غوري في داهية.. وطيفك مش عايز ألمحه جنب مراتي وإلا هخليكي تندمي ندم عمرك.. فاهمة ولا لأ؟

غادرت السيارة تشيعه بنظرات حارقة تفيض حقدًا وغل وكره.. تُقسم داخلها أنها لن تتركه هانئًا بعد ما فعل معها.. لم يُهينها ويجرحها أحدًا مثله.. ولن تكون جيلان إن لم ترد له الصاع عشر أضعاف.. مهما خسرت في المقابل سوف تثأر لكرامتها التي مزقها بسيف كلماته..مهما كانت العواقب سوف تذيقه الندم قبل أن يفعل هو معها.. والأيام بينهما.
_________

يحاصرها بنظرات غامضة منذ عودته، لا يدري ماذا يقول لها ويبررر طلبه.. لكن هل يلزمه التبرير؟ هو لا يرتاح لتلك السمجة وكفى.. وعلى زوجته الطاعة.

_ ضحى أنا عايز اطلب منك طلب أوعديني تنفذيه لأن بالنسبالي مفيش فيه أي نقاش.. قرار أخدته وشايف أنه الأصلح.
تسرب إليها القلق لتتسائل بعجب.
_ قرار ايه يا ريان اللي مفيهوش نقاش قلقتني؟ معقول تقصد موضوع سفرك؟ يعني أخدت قرار بالسرعة دي؟
ثم تحفزت تراجعه في قراره.
_بس انا لسه مش موافقة و…
قاطعها.
_ أنا مش بتكلم عن سفري يا ضحي لأني فعلا لسه بفكر فيه ومأخدتش قرار.
_ أمال قصدك ايه؟
انتفخ صدره بتنهيدة يستعد لرفضها المحتمل.
_ جيجي.
_ مالها.
_ أقطعي علاقتك بيها.. وفورًا.

صمتت قليلا تستوعب ما قاله لتتمتم بدهشة.
_ ايه اللي بتقوله ده ريان.. يعني ايه اقطع علاقتي بجيجي مش فهماك؟!.
_ وايه مش مفهوم في كلامي يا ضحى؟ بقولك اقطعي علاقتك بجيجي.. ولا تكلميها ولا تردي عليها.. وطبعا ما تدخلش البيت ده تاني.
_ وايه سبب القرار ده ممكن اعرف؟
لتبدأ ثورتها بالاشتعال.
_ وبعدين هو أنت المفروض تاخد عني قرار زي ده؟ انا عمري اتدخلت في علاقتك بأصحابك؟ هو أنا طفلة قدامك يا ريان؟
_ ياريتك طفلة يا ضحى.. كان يبقى ليكي عذر إنك مش فاهمة.
_ مش فاهمة ايه يا ريان؟ ما توضح كلامك.. ليه غامض كده.
_ضحى أنا بفهم الناس أكتر منك..صدقيني البت دي مش سالكة ناحيتك.. مش بتحبك وبتغير منك وتحقد عليكي.
استنكرت قوله وناطحته.
_ ايه اللي بتقوله ده حرام عليك دي غلبانة وعمرها ما تحقد عليا ابدا.
_انتي اللي غلبانة وحرام عليا بجد لو سبت البت دي تقرب منك تاني.. وقراري أخدته وخلاص.. اقطعي علاقتك بيها نهائي يا ضحى ومتحاوليش تكلميها او تردي عليها.. وإلا صدقيني مش هيحصل طيب.
_ ريان!
_ ضحى خلاص خلصنا.. مفيش نقاش في الموضوع ده..قلت علاقتك تتقطع بيها نهائي.
وتركها شاعرة بالقهر من قراره.. للمرة الأولى يفرض أوامره عليها دون نقاش وهذا ما لم تعتاده منه. ويحزنها.
________
رواية بصائر تغشاها الثرى.
بقلم دفنا عمر.

يجلسون حول الجدّة أم هاشم في ردهة البيت يراقبونها وهي تصنع مشروب القهوة فوق تلك السبرتاية النحاسية التي تعلوها دلّة من نفس نوعها، ما أن اقترب سائل القهوة من فورانه حتى رفعتها الجدّة وصبتها داخل الفناجين..تلذذت غنى برائحتها ثم طعمها الذي ارتشفت بعضه لتغمض عيناها تغمغم بحنين.
_ الله يا طنط على ريحتها، أول مرة في حياتي أدوق قهوة بالجمال ده..لتنظر أمامها تواصل بانبهار.
_ خصوصا اللي بتتعمل على السبرتاية بمزاج..حقيقي ممتعة.
ابتسمت العجوز تتمتم بغموض.
_ خلاص يا غنى اعتبري السبرتاية النحاس دي ملكك.
اعترضت تقول.
_ لا طبعا يا طنط انا عارفة حضرتك ماتستغنيش عنها ومش بتشربي قهوة غير فيها وازاي بتعتزي بها.. كفاية جبتيها معاكي وشربت منها مرة.
شردت العجوز بشخوص.
_ كان أبويا الله يرحمه بيحب السبرتاية دي أوي  .. ولما كان يجي عندي يجيبها معاه وميشربش القهوة إلا منها.. كان كييّف قهوة وقعدته حلوة ودافية وكلامه كأنه حكم وأمثال الناس تاخد منها العبر.

انجذبت غنى لحديثها الشيق المفعم بماضيٍ جميل تخوض الجدّة بس بسراديبه.. صمتت دون ان تقاطعها تاركة لها المجال لتسترسل في حكاويها الشيقة، الفرحة تغمر قلبها لمكوث الجدة لديها ثلاثة أيام كاملة.. لم تصدق انها ستفعل إلا حين مضى يوم زيارتها الأول كعادة كل شهر، لتجدها تأخذ الصغار غرفتها وتنام.. دثرتهم غنى ترمي العجوز بنظرة حنان لا تقل عن نظرتها لأطفالها وعادت لغرفة هاشم الذي غاب حتى منتصف الليل.

_ كنت افضل قاعدة مع أبويا نشرب القهوة أسمع حكاويه الحلوة وامي في المطبخ بترتبلي كل حاجة جابتها في التلاجة عشان تريحني بعد كده.. كانت عفيّة لأخر عمرها.. المرض مسكها بس وقت الموت.
غنى بامتنان.
_ وانتي بتعملي معايا زي ما كانت والدتك بتعمل..لما جيتي امبارح وقفتي تظبطي في الحاجة اللي جبتيها وترصي في الفريزر.
لتلتقط غنى يدها تُلثمها بمحبة طاغية.
_ ربنا ما يحرمني من حنانك عليا.
ربتت العجوز فوق رأسها برفق.
_ أنتي بنتي يا غنى، عمري ما شوفتك مرات أبن.
لتغيم عيناها بذنب.
_ كفاية إني اختارتك لابني وبليتك بيه رغم اني عارفة عيوبة.. قلت يمكن بالجواز ينصلح حاله.
قالت محاولة طمس الذنب لديها رغم حزنها الدفين.
_ بس أمي وابويا وافقوا.. وانا وافقت على هاشم لاني كنت بحبك وعايزة اعيش معاكي.. وكله نصيب في الأخر متحمّليش نفسك الذنب.
_ وافقتوا إكرامًا ليّا وثقة في كلمتي انك هتكوني متصانة في بيت ابني..بس.
_ أنا اخدت نصيبي وربنا عوضني بولادي وبيكي.
رمقتها بنظرة غامضة لم تفهمها غنى لكن قبضة قلب تنغز قلبها لا تدري سببها.. المفترض أن الأجواء سعيدة مُريّحة بوجود الجدة، لكن داخلها تشعر بسوء قادم.

_ تيتة ممكن نشرب قهوة معاكم.
هكذا قال الصغير عمرو الّذي يجلس بينهم هو وشقيقته شهد.. لتمنحه الجدّة ابتسامة حانية.
_ عيون وقلب تيتة..هاتي يا غنى فناجين صغيرة للولاد.
اعترضت الصغيرة معربة عن رغبتها.
_ تيتة نفسي اشرب في الفنجان النحاس زيكم.
اتسعت ابتسامتها تحوطها بدفء ملبيّة طلبها.
_ بس كده؟ طلباتِك أوامر يا حتة من القلب.
_ يلاش يا طنط يشربوا قهوة هتسهرهم..انا مش معوداهم عليها.
اجابتها برفق وهي تضم الصغيران بذراعيها.
_ مرة واحدة من نفسهم. يا غنى.
لتغمغم بذات النظرة الغامضة.
_ مش عايزة اخلي في نفس أحفادي حاجة.
شعر الصغار بسعادة بالغة وهما يشاركان الكِبار قهوتهما للمرة الأولى.. تلك التي كانت بمثابة فاكهة مُحرّمة عليهما.. قبل ان تُلبي الجدّة رغبتهما الصغيرة.

فرغوا جميعًا من احتساء القهوة والحكاوي الدافئة، لتلملم العجوز جسدها تنهض وهي تقول.
_ كان نفسي هاشم يجي يقعد معانا القعدة الحلوة دي..من وقت ما جيت مقعدش معايا.
_ للاسف هاشم بيسهر على القهوة كل يوم مع اصحابه مش بيطلع دلوقت.
تنهدت بحزن.
_ الله يهديه ويصلح حاله.
صرفت غنى صغارها قائلة.
_ يلا يا حبايبي روحوا أوضتكم ناموا عشان الصبح بدري تصحوا تقعدوا مع تيتة.
تشبث الصغار بثوب الجدّة معلنين تمردهم بعناد وعدم تركها.. لتتثبث هي الأخرى بهما تقول برفق.
_ خليهم يناموا الليلة معايا يا غنى.. انا مشبعش منهم.
_ نومهم وحش يا طنط بالذات عمرو.. هيصحيكي ويقلقك.
_ والله ما هتحرك كتير وهنام هادي جنب تيتة.
شهد: وانا كمان يا ماما هنام في حضن تيتة ومش هضايقها.
تنهدت غنى بقلة حيلة.
_ والله يا طنط انتي بتدلعيهم جامد لما بتيجي  مبقدرش عليهم بعد كده.
ابتسمت وهي تمنحها نظزة راضية وقبل ان تبلغ غرفتها استدارت بغتة تقول لها.
_ غنى.. لسه فاكرة وصيتي؟
رمقتها بدهشة لذكر أمر كهذا الأن لكنها اجابت.
_ طبعا يا طنط فاكرة بس…
قاطعتها قبل ولوج الغرفة.
_ قلت أفكرك بيها واطمن.
واختفت خلف الباب الموصد لتقف غنى تنظر لبابها بخوف تملكها بشدة، لدرجة انها ارادت ان تنضم إليهم وتنام هي الأخرى جوار الجدّة لكنها تراجعت تنهر نفسها بخفوت.
_ استعيذي بالله يا غنى.. ده شطان عايز يقل راحتك كل اما تكوني مبسوطة.. مفيش حاجة وحشة هتحصل.. قلبك المرة دي كداب.
واختفت هي الأخرى خلف باب غرفتها تحاول النوم الّذي يزهد عيناها.

_ حافظ قرآن يا عمرو؟
الصغير بحماس.
_ أيوة يا تيتة حافظ جزء عمَّ.
شهد مشاركة هي الأخرى بإنجازها.
_ وأنا كمان يا تيتة حافظة قرآن زي عمرو.
ابتسمت وهي تمد جسدها بينهما.
خلاص كل حد فيكم يقرأ سورة.. أفضلوا كده لحد ما اروح في النوم.. بس لما انام محدش يصحيني..اتفقنا؟

وعدها الصغار ثم بدأ عمرو بقراءته لتتبعه شهد بسورة أخرى وظلوا هكذا يتناوبان على تلاوة القرآن وهما يراقبان ابتسامة الجدّة الصافية وهي تتنقل ببصرها بينهما كأنها تدخر ملامحهما الحبيبة بقلبها.. ثم أسبلت عيناها ولاتزال ابتسامتها كما هي مفروشة فوق شفتيها الرفيعة الشاحبة..بدأ النوم يداعب عيون الصغيرة لتنام على صدرها بهدوء.. ولم يمضْ الكثير حتى غفى عمرو على جانب صدرها هو الأخر يؤكد لنفسه في ضميره انه لن يُزعح الجدّة الحبيبة بنومه كثير الحركة.. سوف يكون هادئًا لتنعم بنوم هادئ بينهما وترضى ان يغفيان جوارها في الغد قبل رحيلها لبيتها..ولم يدرك الصغير أن الرحيل قد أتى ولم يبقى للغالية غدًا آخر تعيشه معهما.

صوت الآذان جعلها تفيق من نومتها القصيرة بعد طول أرق لم تدري سببه.. نهضت غنى تتمتم الأذكار وتستعد لصلاة الفجر.. توضأت ثم وقفت تُصلي وبينما هي ساجدة كانت تبكي مع دعائها الخافت لربها.. كانت ترجوه أن يشرح صدرها المقبوض ولا يأتي لها إلا بالخير.. فرغت من الصلاة ومكثت تُسبح وتحمد الله مرارًا قبل أن تجد زوجها يعبر داخل البيت متوجهًا لفراشه دون حتى تغير ملابسه.. بالكاد خلع نعليّه قبل أن يرتمي فوق فراشه.. هزت رأسها بعدم رضا واقتربت منه قائلة.
_ هاشم.. يا هاشم.
همهم بصوت خافت لتقول.
_ أصحى بدري شوية افطر مع أمك لأنها زعلانة منك عشان مقعدتش معاها خالص اليومين اللي فضلتهم معانا.. افطر معاها وابقى نام تاني.. دي خلاص ماشية انهاردة بالليل.

لوح لها دون اكتراث لترمقه بعتب وضيق ثم توجهت نحو غرفتها لتنقل الصغار من فراشها.

ابتسمت حين ولجت الغرفة وهي ترى كلًا من صغارها يحتضن ذراع من ذراعها بينما هي غافية بينهما تبتسم بسلام.. غمغمت غنى بخفوت.
_ شُطار يا ولاد شكلكم نمتوا بأدب وتيتة عرفت تنام
بهدوء وسطيكم لدرجة انها مبتسمة.

دنت تأخذ عمرو بحذر وهي ترفع ذراع الجدّة عنه لتجدها باردة مثل الثلج.. توقفت تنظر لها ونبضات. خافقها تتسارع مع هواجسها..چست يدها الأخرى لتجدها على نفس الحال..كشفت غن قدميها تلمسها لتجدها باردة گ سائر جسدها.. بدأت سُحب الدموع تتكون بمقلتي غزل والحقيقة المؤلمة تتأكد لديها مع كل شيء تفعله.. قربت كفها تضعه قُرب أنفها علها تشعر بأنفاسها.. لكن كانت ساكنة سكون الموتى.. لا شيء بها يتحرك فاقدة للروح.. كتمت غنى فمها بقوة تمنع صرختها كي لا تُفزع صغارها.. واستجمعت كل قوتها لتحمل الصغار تباعًا لغرفتهما ثم عادت لها تغلق الباب خلفها.. دنت إليها ودموعها مثل المطر تحاول التماسك تستنجد برب العالمين يمنحها قوته وحوله.. مكثت تنظر لها بعين لا تصدق ما تراه..مستحيل أن تكون فارقتها بهذه السرعة..مستحيل..نظرت للعتمة حولها ثم همست بصوت باكي يفطر القلب.

_متخافيش يا حبيبتي مش هشغل النور عليكي وانتي نايمة.. عارفاكي مبتحبيش حد يزعجك ويقل راحتك.. ثم مررت اناملها المرتجفة فوق وجهها المضيء كأنها تودعه.
_ انتي مش محتاجة نور.. وشك منور الأوضة كلها.. انتي جميلة أوي انهاردة كأنك.
وصمتت تمنع بقوة هائلة شقهاتها ودموع تتسرب من عيناها مثل النهر تغمغم بخفوت وصوت مختنق باكي.
_ طول عمرك مبتحبيش حد يبكي قصادك عشان كده مش هبكي.. ولو انك تستاهلي ابكي عليكي العمر كله..العمر اللي عشناه سوا مشوفتش منك فيه غير كل خير وحب ورحمة وعطف.. حبتيني أكتر من أمي وحبيتك أد ما حبيتها.
توقفت تخنق بكائها بحلقها تكتم بركان صراخًا يود ان ينفجر داخلها.. لن تبكي وتُحزن روحها الحبيبة..واسترسلت تُحدثها بأحاديث لا تدري لماذا تتذكرها الأن

_ عارفة ليه وافقت على هاشم لما جيتي طلبتيني؟ وافقت عشانك انتي.. كنت بحبك اوي من صغري.. كنتي بتيجي عند امي وتشتري ليا حاجات حلوة وتاخديني على رجلك وتقولي (غنى دي بنتي حبيبتي اللي مخلفتهاش..و يوم ما اموت هتغسلني بإيدها) ..مكنتش فاهمة ساعتها معنى كلامك وأمي بتدعيلك بطولة العمر.. بس كنت بوعدك إني هعمل اللي هطلبيه مني.. وانا دلوقت بوعدك إني.

ولم تستطع كبح نحيبها أكثر.. انكفئت بوجهها تبكي وهي تمسك كف العجوز بقوة تحاول ان تستمدها منها كنا اعتادت.. لكن كيف وجسدها فقد قوته و دفاه المعهود وأضحى قطعة من الثلج؟..حاولت السيطرة على شقهاتها لتستعيد صوتها من جديد تقص عليها ما في نفسها وكأنها تسمع.

_فاكرة لما كنتي بتاخديني معاكي الجامع وتحفظيني قرآن بنفس الطريقة اللي بحفظ بيها احفادك دلوقت؟.. كنت بحسك امي التانية.. بتحبيني وتعوضيني إحساس الغيرة اللي كنت بحسه عشان امي بتحب غزل اختي اكتر مني.. كنتي حاسة بيا وفاهمة كل حاجة لدرجة سمعتك مرة بتعاتبيها وهي ردت عليكي ان اختي صغيرة محتاجة دلالها واني بقيت كبيرة وفاهمة الصح والغلط.. ولما كبرت وبقيت شابة سمعت امي بتقول لابويا إنك عايزة تاخديني لهاشم.. وقتها اضايقت لاني مبحبوش.. هاشم من صغرنا كان بيضربني وياخد مني اي حاجة حلوة تشتريها ليا.. لكن انتي كنتي بتدافعي عني وتاخديها منه وتراضيني وتزعليه.. مكنتش هوافق اتجوزه ابدًا رغم حبي ليكي لان قلبي كان متعلق بحد تاني.. لكن لما قلبي انكسر وعرفت ان الشخص اللي حبيته طول عمري وحلمت اكون له وانتظرته يجي ياخدني بحصانه الابيض زي كل البنات.. طلع بيحب غيري ومش شايفني أصلا.. حسيت بيأس شديد وحزن ..هانت الدنيا في عيني وزهدت فيها..قلت خلاص مش فارقة.. هاشم زي غيره مادام مفيش حب.. اي راجل والسلام ويمكن بالعشرة يتغير وكفاية إنك أمه.
لتكفكف دموعها الغزيرة تواصل تخدع عقلها أن الغالية لاتزال حيّة تسمعها.
_ولما اتجوزت وحصل مواقف كتير تخليني اهرب من بيت هاشم.. انتي اللي كنتي بتصبريني وتحميني أد ما تقدري..لدرجة إني قررت اكمل عشانك.. استكفيت بيكي وبولادي..انتي كنتي مصدر قوتي.
لتعاتبها باكية مثل طفلة فاقدة كل تماسكها الواهي.

_ينفع تسيبيتي كده في الدنيا لوحدي من غير ضهر؟ أهون عليكي؟ مين هيدافع عني لو هاشم ظلمني؟ ليه مشيتي بدري كده؟ كان لسه بدري وداعك يا غالية.. مشيتي ومش هيفضل ليّا غير وجع القلب على فراقك اللي ربنا يقويني عليه.

أهتزت رأسها تبكي بصوت مكتوم وكل جسدها يهتز معها من قوة بكائها لتمسح دموعها وتواصل سكبها الكلمات على أذن الحبيبة الراحلة.
_ انا اللي هغسّلك بإيدي زي ما كنتي بتتمني واعطر جسمك الحلو بالمسك .. ولو إنك مش محتاجة.. ريحتك الحلوة ماليا الأوضة كلها كأنها بتشيعك للجنّة..مانتي أكيد هتدخلي الجنة بإذن ربنا ورحمته.
ليجري الدعاء الصادق على لسانها.
_بحق كل مرة جبرتي فيها خاطري ومسحتي دمعتي.. بدعيلك تدخلي الجنة من أوسع أبوابها يا غالية.. كل حاجة وصتيني بيها هعملها.. هصبر على هاشم أد ما اتحمل واربي احفادك زي ما حلمتي تشوفيهم شيء يشرف ويرفع الراس.. هحفّظهم كتاب ربنا عشان يحميهم من كل شر..ارتاحي يا غالية.. بنتك مش هتنساكي ولا تنسى كلمة قولتيها ليها في يوم.

وبيدٍ مرتجفة وبكاء خافت يعتصر قلبها جذبت فوق جسدها الغطاء وغادرت الغرفة بعيون منتفخة لتجد هاشم مستيقظ وعلى وجهه بقايا النوم يخبرها بغلاظة.
_ اعملي فطار عشان جعان.

وقفت غنى ترمقه بحزن امتزج بنفورها منه لجفاه لامه لكن للعجب شعرت بشيء اخر ..شعرت بالشفقة عليه.. ذاك البائس لم يأخذ فرصة لوداع يليق بوالدته..لم يناله نصيبًا لتخبره بكلمات ربما علقت بقلبه وغيّرت من نفسه..لم يحظى بذكرى يتذكر بها لحظاتها الأخيرة.. ضنّت عليه الدنيا بتلك المنحة لأنه حتمًا لا يستحقها.. ماتت والدته دون أن تنظر له نظرتها الأخيرة.

_ مالك واقفة بتبصيلي كده ليه؟ مسمعتنيش؟
بقولك روحي…..

_ أمك ماتت يا هاشم..روح حضّر لدفنتها.

قاطعته بما تبقى في صوتها من قوة ثم تنحت عن الغرفة لتترك له مساحة خاصة يودع والدته الراقدة بفراشها رقدتها الأبدية.
__________