ست فقيره

انا واحدة ست فقيرة أوي، ولو عاوز تعرف فقيرة لأي درجة فاحب أقولك إن احنا اللي بنصحا من النوم مش ضامنين هناكل كام وجبة في اليوم، وهل هنلاقي اللي يسترنا ولا هنرمي لحمنا في الشوارع عشان تنهش فيه الديابة..

ايوة انا نعمة اللي اتربت في بيت لأب مخلف تسع عيال، بيت تقريبا عبارة عن اوضة مفيهاش عفش من كتر الفقر، وطالما فضلت عايش لحد سن عشر سنين فانت بقيت مسؤول عن نفسك، لو ولد تطلع تشتغل في أي حتة، حرام حلال مش مهم..

ولو بنت تروح تخدم في البيوت، حد ضايقها مش مهم، حد اغتصبها حتى مش مهم، المهم الفلوس اللي بتخلينا قادرين نقف على رجلينا..

وانا اللي كبرت بدري وفهمت، فهمت ان فيه ناس غنية ومرتاحة عشان احنا فقرا، وان الناس دول هما السبب في الحياة الصعبة اللي انا عايشاها..

وطلعت أواجه الحياة، واشتغلت أول مرة في شقة في المهندسين، كنت بروح انضف البيت كله بالنهار وامشي على بعد العصر..

وعشان اقولك انا كنت بتعرض لإيه تخيل كل أفلام السينما اللي كانت بتوريك البنات اللي بتخدم في البيوت بتتعرض لإيه، الست كانت بتتفنن في تعذيبي، ضرب وإهانة وتعذيب وشتيمة بكل الألفاظ اللي في الدنيا..

كانت بتستنا بفارغ الصبر أبسط غلطة عشان تمسك العصاية وتضربني، طبق يقع، كوباية تتكسر، شوية تراب نسيت اشيلهم، مش عارفة ليه المخرجين مخدونيش امثل معاهم ليه في الافلام اللي من النوعية دي..

وكان لازم اتعلم المسكنة، ابكي واستسمحها واعتذر لها، وطبعا ماليش أي ضهر، ولا حتى عمود فقري يحميني أو اروح اشتكيله، ابويا بياخد فلوسنا عشان يتكيف بالحشيش، وامي نشفت من كتر الفقر واخواتي كل واحد في وادي..