مش عارف كام واحد

قفلت الباب وراهم بالمفتاح والترباس وبقيت واقف لوحدي في الصالة

مشيت ناحية التليفون وطلبت رقم المحامي

رد عليا المحامي بصوته الجاف

ايوة يا جرجس خير فيه حاجة في الاوراق

قلتله بصوت بيرعش وبدون أي تردد

يا استاذ ميخائيل انا مش عايز الفلوس ولا عايز الشقة انا عايز اتبرع بكل حاجة للجمعيات الخيرية وللملاجئ باسم مريم

سكت المحامي شوية كأنه مش مصدق اللي بيسمعه وقال

انت بتقول ايه يا جرجس انت فاهم كلامك ده معناه ايه انت كده هترجع للشارع تاني مفيش حيلتك ملليم ولا سقف يلمك

قلتله وانا بعيط بحرقة

الشارع ارحم بكتير من السجن اللي انا عايش فيه جوة عقلي يا استاذ ميخائيل اكتب كل حاجة باسم الغلابة والايتام وخليهم يدعولها بالرحمة انا مستاهلش قشية واحدة من اللي هي سابتهولي

تاني يوم نزلت مكتب المحامي ومضيت على كل التنازلات تنازلت عن الشقة والفلوس في البنك وعن كل حاجة مريم سابتهالي

مكنتش سايب لنفسي غير هدومي اللي على ج/ثتي والاجندة السودة والجواب بتاع مريم

خرجت من مكتب المحامي وانا حاسس ان جبل شيلته من على صدري بس البرد كان بياكل في جسمي

كنت ماشي في الشارع وشهقت الشتا بتنزل عليا وتغرقني

بصيت للبالتو اللي كنت سايبه في الشقة ورجعت افتكرت كلماتها

لما تلبس البالتو افتكر ان فيه وحدة حبتك بجد

قلت لنفسي انا حارم نفسي حتى من البالتو ده لاني مستاهلوش

قعدت على الرصيف جنب الكنيسة القديمة اللي مريم كانت بتروح تصلي فيها كل حد

كان الجو ليل والشارع فاضي ومفيش غير صوت الهواء والمطر

طلعت الاجندة من جيبي وفتحتها على اخر صفحة مريم كتبتها

قريت الكلام للمرة المليون

أنا مش زعلانة منك يا جرجس ربنا يسامحك ويريح قلبك

غمضت عينيا وحطيت الاجندة على صدري ودموعي نازلة بتختلط بمية المطر

بقيت بترعش من البرد ومن الخوف ومن الذنب اللي بياكل في عظامي

الناس اللي ماشية في الشارع كانت بتبصلي وقاكريني راجل مجنون ولا شحات مرمي على الرصيف

مكنوش عارفين ان الراجل ده كان عنده كل حاجة بس خسر نفسه وخسر الأدمية بتاعته عشان شوية طمع ورخص

دلوقتي انا قاعد هنا مش خايف من الفقر ولا من الشارع ولا من البرد

انا خايف بس من اليوم اللي هقف فيه قصاد ربنا وقصاد مريم وهسأل نفسي هقولها ايه لما تشوفني

هقولها اني عرفت قيمتها بعد ما ماتت

ولا هقولها اني فهمت الدرس بس بعد ما كان الوقت فات خلاص