هل انا غلطانة

قالتلي نفس الكلام ده تاني لما قولتلها إني بحوّل المصروف لستايسي، بس المرة دي الهانم بجّحت وسألتني وهل عيالي هياخدوا نفس المصروف ده بعد ما نتجوز؟
رديت عليها بكل هدوء إن بنتنا اللي جاية في السكة أكيد هيجلها يوم وتاخد مصروف زي ستايسي، لكن مفيش أي احتمال يخليني إني أدفع 400 دولار زيادة كل أسبوع عشان أصرفهم على عيالها التانيين!
هنا أليس اتقمصت واتعصبت. قالتلي إن ستايسي بتضيع فلوسي على الجزم والمكياج وهي أصلاً قبل كده انتقدت ستايسي على لبسها للكوتشيات الغالية والكعب العالي والمكياج، وقالتلي إني كده بفرّق في المعاملة وإن دي صورة من صور الإسا…ءة لعيالها!
واشتكت إني إزاي أسمح لستايسي تشتري حاجات بالفيزا بتاعتي وأخليها تسجل بيانات الفيزا على موبايلها، في حين إني مش مخليها هي شخصياً تعمل كده! دي كمان عايزة الفيزا يا جماعة!
وختمت كلامها بإن أي فلوس هتتصرف على العيال لازم تتقسم عليهم كلهم بالتساوي وهو ده العدل.
ولما هزيت كتفي وقولتلها ببرود إن الكلام ده مش هيحصل وإني مش هقلل مصروف ستايسي مليم، الهانم جابت آخرها، وصرخت فيا وقالت راجل عايش لوحده مع بنته وبيدلعها الدلع ده كله، ده شيء مقزز وكأن بينكم حاجة حرام! كإنك استبدلت مراتك الميتة ببنتك، ولازم توقف القرف ده حالاً!
فأنا هنا قولت بس خلاص كده لحد دلوقتي.
أنا تجاهلت ريد فلاجز بالكوم لحد اللحظة دي، بس دي كانت القاضية.
بدأت تكمل هرتله وتقولي إزاي إن علاقتي القوية ببنتي دي مش صحية وإنها مش عايزة عيالها يحسوا بالإهمال، وإنها عايزة تتعامل كشريكة لو هنتجوز… قمت مقاطعها في النص، وقولتلها أنا شايف إننا مينفعش نتجوز أصلاً.
قولتلها إني مش عايزها تنقل عندي البيت، وإننا هنحتاج نلاقي طريقة تانية نمشي بيها أمورنا.
وعشان أكون صريح معاكم، أختي وأخويا وشوية من أصحابي كانوا لمحولي بنفس الحاجات اللي تقلق منها واللي قريتها منكم هنا عن أليس، بس هما كانوا ألطف بكتير في التلميح. أنا كنت واقع في حبها، أو بالأصح كنت مغمي عيني ومش شايف الحقيقة.
قولتلها إني دايماً وأكيد هضمن إن بنتي اللي جاية يكون فوق راسها سقف يآويها، بس أليس هتحتاج تتصرف وتشوف حل ليها ولعيالها الأربعة بطولها.
وطبعاً قامت خناقة للركب! صرخت فيا، وشتمتني وقالتلي إني سا…فل معنديش قلب. ورمت البلا على ستايسي وقالت إنها هي اللي بتخرب علاقتنا.
واشتغلت على وتر الإحساس بالذنب بخصوص مصاريف معيشتها الغالية وإن إزاي هسيبها تغرق وأنا قاعد في بيت فاضي بطولي! واشتغلت على نقطة خـ…طر الضغط العصبي على البيبي واللي أنا فعلاً حاسس بالذنب والقلق عشانها.
وفي النهاية انهارت من العياط وطردتني بره.
في الـ 10 سنين اللي فاتوا، دي كانت أول علاقة جادة أدخلها مع واحدة. أنا بحبها، والموضوع ده واجعني.. واجعني أوي بصراحة.
رجعت البيت وقولت لستايسي إنها مش محتاجة تتعب نفسها وتنقل حاجتها من أوضة الاستوديو، وإن أليس مش جاية تعيش معانا، وحضنتها.
سألتني بخوف لو كانت هي السبب، قولتلها لأ طبعاً. وقولتلها بصراحة إني حاسس إن جوازي من أليس كان هيبقى غلطة حتى لو هما الاتنين كانوا بقوا أعز أصحاب.
أنا كان دايماً نفسي أجيب عيال تاني، وكان واحشني إن يكون عندي زوجة، بس الدنيا مش دايماً بتمشي زي ما إحنا عايزين. أنا متأكد إن علاقتي بأليس انتهت، حتى لو هنفضل نربي طفلة مع بعض في المستقبل.
بنتي الجديدة تقدر تاخد أوضة ابني القديمة في أي وقت نتفق فيه على ترتيبات الحضانة. أنا مش ندمان إني هخلف طفلة تانية، حتى لو كنت بتمنى إن الظروف تكون أحسن من كده بكتير.
الريد فلاجز كانت دايماً موجودة قدام عيني.. بس أظن إن أحسن حاجة حصلت إني خدت بالي منها دلوقتي، بدل ما كانت الفاس تقع في الراس أكتر من كده بعدين.