امريكا

اتعمل عنها فيلم كامل في أمريكا ضِمن نِطاق أفلام (آكلي لحوم البشر) بل وفضلت حديث المجتمع الأمريكي لفترة طويلة جدًا واتعمل عنها كم كبير من الأبحاث في عِلم النفس عشان يدرسوا سلوكها ويعرفوا ازاي إنسانة ممكن تعمل الفِعل ده وبكل بساطة وبدون ذرة تأنيب ضمير، ازاي تقتل جوزها وتطبخ.ه وتاكله مع صوص الباربكيو بكل الهدوء والثبات ده، هكلمكم عن البنت المصرية (أُميمة نيلسون) أو آكلة لحوم البشر..

أميمة اتولدت سنة 1968م في مصر وبالأخص في أسرة متوسطة الحال كعادة أغلب الأُسر المتوسطة اللي بيكون تفكيرهم في إنهم ازاي يرعوا أطفالهم رعاية سليمة ويعلموهم تعليم كويس، وبالفِعل اتعلمت أميمة ودرست بس مكنش طموحها إنها تدخل كلية من الكليات اللي بيحلم بيها كل الأطفال اللي في عمرها، ولا حتى كليات القمة زي الطب والهندسة..

أميمة كان عندها هوس وشغف كبير بمجال الأزياء وكانت بتحلم إنها تكون في يوم (عارضة أزياء) كبيرة ومشهورة جدًا، وكانت بتحب الموضة والملابس وكانت متابعة كبيرة لأحدث صيحات الموضة، وفضل الطموح ده يكبر معاها سنين طويلة رغم إنه طموح غريب جدًا وقتها عن البنات اللي من عمرها لحد ما وصل عمرها ل18 سنة وبالأخص سنة 1986م..

وبدأت أميمة تفكر جديًا إنها تحقق حلمها وتكون عارضة أزياء مشهورة ومعروفة، وبما إن المجال ده في مصر كان محدود جدًا فكانت شايفة إنها ممكن تحقق حلمها ده بس مش في مصر وإنما في أمريكا، وبالفِعل قدمت على سفر وقدرت من خلال إصرارها ومعافرتها إنها تهاجر لأمريكا وهي في عمر 18 سنة بس..

وصلت أميمة أمريكا وبدأت تعرض نفسها على أكتر من مكان كعارضة أزياء لحد ما قدرت فعلًا تشتغل في مكان ما عارضة أزياء، بس الصدمة بالنسبالها إنها لقت العائد اللي بيجي من الشغلانة دي بسيط جدًا لدرجة إنه ميكفيهاش إنها تاكل وتشرب بس، وكانت صدمة كبيرة لأميمة اللي لقت الواقع مختلف تمامًا عن الحلم اللي هي عاشت فيه طول السنين دي..

وبما إنها مضطرة فبدأت تشتغل أكتر من شغلانة عشان تقدر تصرف على نفسها بجانب الشغل اللي بتحبه واللي هو عرض الأزياء، ومن ضمن الأعمال اللي اشتغلتها أميمة في الفترة دي كانت (مُربية أطفال) وفضلت على الحال ده 5 سنين لحد ما وصلت لعُمر 23 سنة، في الفترة دي وبالصُدفة البحتة اتعرفت على راجل أكبر منها اسمه (ويليام نيلسون) وكان عنده وقتها 56 سنة..

ويليام كان طيار سابق ومن أسرة ثرية غير إنه عنده ثروة كويسة جدًا، ورغم إنها عرفت إن كانت له سابقة قديمة واتقبض عليه في قضية مخدرات إلا أنه أول ما أعجب بيها وعرض عليها الزواج وافقت على طول، أميمة كانت شايفة إن (ويليام) هيحققلها اللي هي مقدرتش تحققه بنفسها، وإنها ممكن تتنازل عشان ده وتتجوز راجل أكبر منها وعمره ضعف عمرها أو أكتر..

وعشان المجتمع الأمريكي بيلقب الست بلقب زوجها فاتعرفت بعدها باسم (أميمة نيلسون) وفعلًا يتجوز ويليام من أميمة سنة 1991م ولكن زواجهم ده استمر تقريبًا لمدة شهر واحد بس لا أكتر..