عزه

سنة 2021 كانت (عزة حمادة) اللي في الصورة دي بتشتغل في بلدها التابعة لمحافظة الشرقية مُحفظة قرآن كريم، وكانت معروفة بالأخلاق الحسنة والأدب الشديد في معاملتها مع الناس وحتى مع أهلها في البيت، وكانت محبوبة وسط المحيط اللي هي ساكنة فيه سواء من الأهل أو القرايب أو الجيران، ورغم إنها كانت متجوزة من 3 سنين إلا إن مشاكلها مع جوزها كانت قليلة جدًا أو تكاد تكون معدومة تقريبًا، بس للأسف ده اللي كان ظاهر للناس، لأنها كانت محطوطة في موقف لا تُحسد عليه، وبسبب الموقف ده يتغدر بيها وتموت على يد شخص من المُقربين ليها..

عزة اتجوزت من 3 سنين تقريبًا، يعني سنة (2018) اتقدملها شاب اسمه (إسلام) من نفس القرية كان بيسافر لبلد عربي وكان شغال (نقاش) وبما إنهم من بلد واحدة وبما إن أهله معروفين يوافق أهل عزة على الجواز وترتبط عزة بإسلام وتبقا زوجته على سُنة الله ورسوله، وبعد سنة ونصف من زواجها ربنا يرزقهم بطفل جميل يسموه (أحمد)..

استمرت بينهم الحياة مع وجود خلافات بسيطة زي أي زوجين، لحد ما تحصل مشكلة بين عزة وزوجها إسلام وبسببها تسيب عزة البيت وتروح لبيت أهلها وهي حزينة جدًا، ورغم كدا محكتش أي حاجة لأهلها وفضلت ساكتة، عشان بعد أيام تروح أخت ووالدة إسلام لعزة ويتكلموا معاها عشان ترجع لجوزها وبالفِعل ترجع عزة لجوزها، وبالفِعل ولأن عزة بنت أصول وبنت ناس محترمين قدرت أهل جوزها ورجعت معاهم..

بس بعد أيام تحصل مشكلة تانية وبسببها ياخد إسلام الموبايل من عزة مراته ويكسره وياخد شريحة الموبايل بتاعتها ويحطها في موبايله عشان يحرم عزة من إنها تقدر تتواصل مع أي حد، ورغم إن أكتر من حد عِرف بالمشكلة بس قالوا طالما الزوجين مكملين يبقا بلاش نتدخل ونعدي الموضوع، وبعد شهور من الواقعة دي وفي ليلة مظلمة تكون عزة في موعِد مع ملك الموت ويجي أجلها ولكن بطريقة كلها غدر وندالة..

كان فيه فرح كبير في البلد في الليلة دي، وكان أغلب أهل البلد معزومين واللي منهم أهل عزة، وبالفعل يتواصل أهل عزة مع بنتهم اللي أكدت إنها هتحضر الفرح هي وإسلام جوزها، بس الغريب إن عزة وإسلام اتأخروا، ومحدش منهم حضر الفرح، ويرجع الأب لبيت بنته عشان يلاقي إسلام ومعاه مجموعة من الناس عمالين يدوروا على عزة ومش لاقينها، ولما سأل الأب إسلام عن سبب عدم حضورهم، إسلام رد وقاله إن عزة راحت تشتري فاكهة ومن وقتها مرجعتش وأنا عمال بدور عليها..

وهنا يظهر القلق الشديد على الأب ويبدأ يدور في كل مكان، وانتشر الخبر واتجمع عدد من الناس عشان يدوروا على البنت اللي الكل بيشهد بأخلاقها، ولمدة 7 ساعات كاملين مكنش حد قدر يوصل للبنت، حتى بعد ما نشروا على السوشيال ميديا لعل وعسى حد يلاقيها أو يتعرف عليها، ويتعمل بلاغ في قسم الشرطة عن اختفاء عزة، وبعد يوم كامل ينتشر كلام في البلد إنهم لقوا جثمان عزة غرقان في الترعة، ويتحرك أهل عزة فورًا عشان يتعرفوا عليها وكانت المصيبة، فعلًا هو جثمان عزة والبنت متوفية..

ويروح الجسمان بعدها للمشرحة مع صدمة الكل تقريبًا عشان يطلع تقرير مبدأي بيقول إن عزة ماتت نتيجة الغرق، واتجمهر وقتها عدد كبير من أهالي البلد قدام قسم الشرطة كنوع من أنواع الاعتراض على نتيجة التقرير اللي مكنش اكتمل، وده لأن عزة كانت مجروحة في منطقة الأنف والأذن..

وفي النهاية يطلع التقرير النهائي اللي يتقال فيه إن عزة عندها كسر في الأنف نتيجة ضربة قوية، وجرح في الأذن نتيجة نزع الحلق الدهب من ودانها، وإنها غالبًا حادثة سرقة، ويطلع في النهاية تصريح الدفن ويخرج أهالي البلد كلها يودعوا البنت في مشهد حزين جدًا، وحتى إسلام جوزها كان متأثر جدًا رغم إن كانت حوليه شكوك كتيرة جدًا..

وبعد أيام يكون في استدعاء لإسلام مرة تانية لقسم الشرطة بسبب إن المباحث عرفت تفصيلة مهمة أوي، تفصيلة التليفون اللي اتكسر، وسألوه إن كانت عملت فِعل سيء مثلًا خلاه يكسرلها التليفون، وهنا يظهر التردد عليه عشان رجال المباحث يزودوا التحقيق معاه ويعترف في النهاية إن هو اللي كان السبب في موتها في الليلة دي..

إسلام هو اللي بعتها تشتري الفاكهة من الراجل ده واللي موجود جمب الترعة، واختار يوم الفرح لأن البلد هتكون فاضية تقريبًا، ومشي وراها لحد ما اتمكن منها وضربها بقوة على منطقة الأنف ورماها في الترعة، بس مسرقش الحلق بتاعها، واتضح بعد كدا إن شخص كان معدي وشاف الجثمان فسرق منه الحلق وسابه ومشي، طيب إسلام عمل كدا ليه أصلًا..

عزة شافته بيعمل الفاحشة مع مرات أخوه، ولما طلبت الطلاق رفض إنه يطلقها، وقدرت بعدها إنها تصوره مرتين مع مرات أخوه وهددته بالفيديوهات إنها هتفضحه لو مطلقهاش، وعشان كدا خد منها التليفون وكسره وفضل يحايلها ويطلب السماح منها ومن جواه بيخطط ازاي يدفن معاها السِر ده للأبد، وبالفعل اختار يوم الفرح وقدر إنه يتمكن من البنت رحمة الله عليها، بس ربنا اسمه العدل، وجريمته اتكشفت وإن شاء الله ينال العقاب اللي يستحقه..

الفجور، وقلة الوازع الديني اللي يخلي شخص ميقدرش يتحكم في شهواته ويقرر إنه يخرجها زي البهيمة بتحوله لمسخ أسوأ وأضل من البهيمة وبتورطه في مصايب كبيرة في الدنيا ولعذاب كبير في الآخرة، عشان كدا ربنا حذر من الزنا بل وحذر من القُرب منها لأنه سبب كبير لهلاك الإنسان في الدنيا والآخرة.

[وَلَا تَقْرَبُوا الزِّنَا إِنَّهُ كَانَ فَاحِشَةً وَسَاءَ سَبِيلًا] سورة الإسراء آية ٣٢

بقلم: أحمد محمود شرقاوي

……………….

لو عندك أي حكاية غريبة أو مخيفة حصلت معاك أو مع حد تعرفه وعاوزني أكتب عنها في قصة بكرة كل اللي عليك إنك تبعتلي على الخاص على أكاونت أحمد محمود شرقاوي كل اللي تعرفه عن الحكاية أو الموقف المخيف ده بدون استئذان وتأكد اني هشوف رسالتك بأمر الله..

بقلم: أحمد محمود شرقاوي

……………….

متنساش لو عجبتك القصة تعمل لاف وتعليق برأيك في كومنت..