أخته
أخته بغل: أنت مش ناوي يبقى عندك ولد ولا إيه؟ مراتك خلفتها كلها بنات جابت خمس بنات، وأنت متمسك فيها على إيه؟
هو بحيرة: عايزاني أعمل إيه يعني؟ الحمد لله غيري مش طايل ضفر عيل، ومالهم خلفة البنات؟
بصتله أخته بضيق وقالت: يا بني افهم البنت مش زي الواد، هو اللي هيحمل اسمك وبيتحمل مسؤولية البيت ويصرف عليك لما تكبر، إنما البنات بيتجوزوا وبيتلهوا في بيتهم وأزواجهم وعيالهم لا هيدوك جنيه ولا حاجة
فأنت تروح تتجوز واحدة تخلفلك الولد، وأكيد هى مش هتعترض يعني، ولو فتحت بوقها طلقها وخلي دا السبب إنها بترد عليك ومش بتحترمك
وكملت كلامها كأنها خايفة على مصلحته وقالت: يا أخويا افهم أنا يهمني أمرك، وبعدين أبويا سمعته في يوم إن هيدي سليم نصيب في الورث أكتر منك لأنه عنده ولدين، وأنت بقى معندكش حتة ولد حتى
بصلها كرم بصدمة وقال: الكلام دا بجد؟ كدا هيكون بيظلمني أنا يا رنا
رنا بابتسامة: ماتخافش أنا مش هسمح بدا يحصل، اسمع بس كلامي وأنت هتكسب حاجتين ورث وولد
كرم بتفكير: خلاص هتجوز، بس مين هترضى تتجوز واحد متجوز وعنده خمس بنات؟
رنا بضيق: يعني مش هطلق مراتك بتاعت خلفة البنات دي؟
كرم: لأ عشان بناتي يا رنا يعني أرميهم ولا إيه؟
رنا بضيق: أهو بناتك دول هيسبوك بكرة ولا هيسألوا فيك يا أخويا
أنا همشي وماتخفش هلاقي عروسة وتتمنى رضاك
مشيت رنا بعد ما لعبت في عقله عشان بتكره مراته، وهو قعد يفكر في كلامها وجانب بيقوله دا الصح وجانب تاني بيقوله كلام أختك غلط
جت مراته ومعها صينية عليها ضيافة وقالت باستغراب: رنا راحت فين؟
كرم: مشيت يا نورا
نورا: ليه؟ دا أنا دخلت أقطع شوية فاكهة وجبت لها حلويات مشكلة أهي، هى كانت عايزه حاجة؟
كرم بعصبية: إيه يا نورا مش فايقلك دلوقتي أسئلتك ملهاش لازمة، أنا ماشي
مشي من قدامها وهى بتبصله بحزن، دي أول مرة مايطيقش كلامها كدا، هى أخته قالتله إيه عصبه كدا
دخلت الصينية تاني، وراحت تشوف بنتها الأخيرة كان عندها سنتين
أما بناتها الباقين في المدارس واللي قبل الأخيرة في الحضانة
بقلم إسراء إبراهيم (إيسو إبراهيم)
فات يومين واتصلت أخته عليه وقالتله: لقيتلك عروسة دا أنت محظوظ، وعندها استعداد كمان تقعد مع مراتك نورا في نفس الشقة وطيبة خالص يا كرم
كرم بتردد: بالسرعة دي؟
رنا: اها اومال هنقعد سنة ندورلك؟
كرم: مش قصدي بس ماقولتش لنورا عالموضوع دا، ولا هتجوزها من وراها يعني؟
رنا بضيق: يا بني افهم بقى أنت مايهمكش كلام مراتك وهى اللي هتمشي كلامها ولا إيه؟ ولا يكونش هامك رأيها؟
كرم: لأ مش قصدي يعني عشان تبقى عارفه
رنا: هتعرف لما تدخل عليها بيها يعني ماتستعجلش، دي تحمد ربنا إنك سبتها على زمتك يا أخويا، هاخدلك معاد مع أهل العروسة ماشي؟
كرم: ماشي، وقفل معها وهو بيفكر هيقول لنورا عالموضوع دا إزاي
جت نورا وقالت: خلصت طبيخ هتاكل يا كرم
لكن كرم ماكنش معها سرحان في موضوع الزواج دا، فنادت عليه بصوت أعلى
فبصلها بتوهان وقال: ها عايزه حاجة يا نورا؟
نورا باستغراب: كنت بقولك هتاكل؟ هو أنت كويس؟
كرم بتوهان: اها كويس كويس يا نورا، ومشي من قدامها وخرج من البيت كله، مضايق حاسس بخنقة
أما نورا بتبص على مكانه بسرحان في طريقته اللي اتغيرت وبقى بيسرح كتير وأحيانا بيتخانق معها، ومش بيقعد مع بناته زي الأول وممكن يزعق لهم
دعت إن ربنا يهديه، وقامت تشوف وراها إيه
فات يومين والحال زي ما هو، لغاية ما جت أخت جوزها فتحت لها ورحبت بيها
رنا بضيق: اومال فين كرم؟
اتضايقت نورا من طريقة كلامها معها وقالت: جوا في الأوضة، ادخلي لما أدخل أناديه ليكي
دخلت رنا وقالت: لا هدخله أنا ولا حضرتك مفكراني ضيفة، لا يا حبيبتي دا بيت أخويا وأدخل في أي مكان فيه
نورا: ما قولتش حاجة، ومش قصدي حاجة عشان بس لما بتيجي بتقوليلي ادخلي ناديه
رنا: طب وسعي كدا ياختي مش هتحكي معايا
ودخلت رنا ونورا بتبص لأثرها باستغراب، وافتكرت من يوم ما جت آخر مرة وجوزها متغير معها، بقت شاكة فيها ومش مستريحة لها
قررت تسأل جوزها بعد لما أخته تمشي عن سبب تغيره وإيه الموضوع
دخلت المطبخ تجيب حاجة لرنا تشربها
أما عند رنا دخلت لأخوها لقته نايم صحته فقام وقال باستغراب: رنا؟ خير في حاجة؟
رنا: جاية أقولك إني حددت معاد مع عم العروسة
كرم بصدمة: بتقولي إيه؟ أنا لسه ماخدتش قرار أكيد للموضوع دا
