ابويا
_ابويا اتجوز امك؟
-قبل ما تتكلمي بس وتهلفطي ، انا زيي زيك لا قابل الموضوع ولا الجوازة ولا قابلك شخصيًا
_انت عبيط صح! جاي تقولي ان ابويا اتجوز امك عادي كدا ، دا ازاي وعلى اساس اي اصلا
-ما انا لو اعرف هقولك
-“قرب مني وزق كتفي وهو بيكرر الجملة” انا لو اعرف هتصرف يا آلاء ، انما دول حطونا قدام الأمر الواقع ، بيتعاملوا على انهم عيال مراهقين ، مش عواجيز عندهم ولاد زينا
“ابتديت اتعصب وافرك في ايدي من التوتر والعصبية ، وشي احمر ودماغي هتنفجر من التفكير ، وقفت وانا بحط شنطتي على كتفي”
_انا مش هسكت على الموضوع دا ،ابويا انا هعرف اتكلم معاه واخليه ينهي الموضوع دا في اسرع وقت ، وانت اتعامل مع امك ي دكتور، ولو هو عاجبك وجايلك ع الطبطاب ف صدقني مش هسكت غير لما اقلب الدنيا فوق دماغك
“اتحركت خطوتين ووقفت لفيت ليه”
_انت وامك يا يوسف
“ما اديتلوش فرصة يقل أدبه وسيبته النار هتطلع من دماغه ومشيت ، مشيت وانا جوايا غضب الدنيا كلها”
_اتغصب على خطوبتي منه ، وانا اللي عمري ما اتغصبت على حاجة واقول ماشي فترة وهطهقه في عيشته لحد ما يحل عني ، انما امه تتجوز ابويا ومن ورايا ، دا اللي مش هسمح بيه ي ملك ، بيلووا دراعي يعني ولا ايه مش فاهمة ، انا عمر ماحد غصبني اجيب له كوباية ماية ، اتحط في الموقف دا
وديني يا ملك ، وديني ما هيتهنى لا هو ولا أمه
*اهدي بس يا آلاء اهدي وفكري في الموضوع من نقطة تانية ، شوفي السبب اللي باباكي عمل كدا عشانه طيب ، مش يمكن عمل كدا عشان مصلحتك
“ابتسمت بسخرية وحطيت ايدي على دماغي”
_مصلحتي! وهي فين مصلحتي من كل دا ،هو مفكرش غير في مصلحته ، عارف كويس اني مبحبهوش ، دانا حتى مبقبلش اسمع سيرته ف يعمل اي بقا ، بدل ما يخلصني منه
لا يتجوز امه ، عشان يفضل رابطني بيه العمر كله
*اهدي دلوقت وروحي اتكلمي مع اونكل يمكن عنده كلام يقوله ، انتي لازم تتكلمي معاه وتسمعي منه .
“مشيت وسيبتها وانا كل الدنيا مقفلة في وشي ، مكنتش اتخيل اني في يوم اتخطب لحد غير مصطفى ، مكنتش اتخيل انه يمشي وميرجعش تاني زي ما ماما عملت ، واخرها انا ابقى لغيره ، وواحدة تانية تبقى مكان ماما ، موضوع صعب ، ومكنش ينفع يحصل اصلا “
