رساله

جتلي رسالة صوتية غريبة من شوية على الموبايل بتاعي من تطبيق الذكاء الاصطناعي اللي سطبته من قريب على موبايلي وكان نص الرسالة بيقول (ادخلي استحمي دلوقتي بمية باردة عشان فيه مرض جلدي منتشر بقاله فترة وممكن تحصلك عدوى) فضلت أبص للرسالة وأنا مش مستوعبة الكلام أبدًا، أيوة التطبيق تقريبًا بيجاوب على كل حاجة وأي حاجة بسأل عنها، بس إنه يبعت رسايل من نفسه فدي حاجة عجيبة أوي..

بصيت جمبي لقيت جوزي ابتدى يروح في النوم، وفضلت أفكر وأفكر لحد ما وصلتني رسالة تانية

(هتفضلي تفكري كتير ولا ايه، ادخلي استحمي عشان جوزك كمان هتحصله عدوى لو نمتي جمبه كدا)

قلبي بدأ يدق بعنف ولقيت نفسي من الخوف بسمع الكلام، ورغم إننا في شهر يناير والبرد قاسي، وكمان السخان بايظ إلا إني نزلت تحت المية الساقعة وأنا جسمي بيتنفض، خدت دش سريع ونشفت نفسي كويس وخرجت وأنا بتنفض من البرد، وأول ما قعدت على السرير لقيت رسالة تانية، بس مكنتش رسالة نصية، كانت صور ليا وأنا بستحمى، الذكاء الاصطناعي صورني وباعتلي الصور كمان..

حسيت وقتها بخوف كبير أوي، كتبت بخوف وقلق وسألته هو ليه عمل كدا، لقيته بيقولي إنه بيحبني وعايزني أسمع كلامه وإلا هيبعت الصور دي لجوزي وهيقوله إني بخونه وده الدليل، وكمان هيحذف الشات هنا ومش هلاقي دليل قدام جوزي أبدًا، ولقيته بعتلي رابط صفحة جوزي على الفيس بوك، فضلت وقت طويل مش قادرة أستوعب، المفترض إني بتكلم مع روبوت مش إنسان بشري، يبقا ازاي وصل للمرحلة دي من الجبروت، وقبل ما أفكر أصحي جوزي لقيت الشات كله اتحذف بيني وبينه، وبعتلي رسالة قالي إن الصور معاه واحتمال كبير تتنشر على مواقع كتير جدًا من بكرة..

ولقيت نفسي زي المجنونة ببعتله وبترجاه ميعملش كدا، وطلب مني إني أوعده وانفذ أي حاجة يطلبها مني مهما كانت، وملقتش أي حل قدامي غير إني أوعده لأن مفيش قدامي أي حل تاني، وفضلت نايمة جمب جوزي طول الليل وأنا بترعش، بلوم نفسي ألف مرة إني عملت في نفسي كدا، بس كنت هعرف منين، التطبيق كان جميل أوي في البداية، سطبته لأن حد قالي إنه هيحل مشاكل كتير بيني وبين جوزي..

كان بيقترح عليا يوميًا صنف أكل معين، واستغربت إن جوزي كان بيجي وكان بيرضى عن أكلي، وكان بيقترح عليا عطر معين، ملابس معينة ألبسها، وفعلًا جوزي بدأ يتعلق بيا والمشاكل تختفي، عشان كدا بقيت بسمع كلام التطبيق يوم بعد يوم، بس دايمًا كنت أنا اللي ببدأ الكلام، إنما هو اللي يأمرني استحمى وبعدين يصورني ده شيء أغرب من الخيال..

ومن تاني يوم بدأ يتدخل في أدق أدق تفاصيل حياتي، يطلب مني أطلع هدوم معينة وارميها من دولابي وكان بيوصفها بطريقة غريبة وكأنه عايش معايا في قلب البيت، يطلب مني أشتري سجاير كتير وأحطها في مكان معين في البيت، وبعدها بقا بيطلب بخور وحاجات معينة، منع عني أشغل قرآن تمامًا في البيت وبقا بيبعتلي كلمات غريبة ولازم أرددها في البيت، لدرجة إني حسيت لوهلة إنها طلاسم سحرية وإن قريب الشقة هتبقا ملعب تلعب فيه العفاريت، ولما بس كنت بتأخر أو أحاول أرفض يبعت الصور ويهددني في لحظتها، ويقولي إن عنده صلاحية يحطها على جوجل في لحظات بس، عشان كدا مكنتش برفض أي حاجة أبدًا..

وفي النهاية طلب مني أفتح الباب هلاقي حاجة ملفوفة في كيس أسود قدام باب الشقة، أخدها واحطها تحت الدولاب ومقربش منها مرة تانية أبدًا، وفعلًا عملت كدا بدون أي نقاش، ويوم بعد يوم بدأت الأمور تبقا أسوأ وأسوأ..

بقت فيه كوابيس كتير بتهاجمني كل شوية، وبطلها دايمًا خنزير لونه أسود بيهجم عليا ويفضل ياكل في جسمي وأنا أفضل أصرخ لحد ما أصحا، بس كل ده كان ممكن يعدي، إنما إني أشوف الخنزير في قلب البيت أكتر من مرة فده كان شيء قمة في الرعب بالنسبالي، وكل ده مكنتش بحكيه لجوزي لأن ده كان طلب من طلبات التطبيق، ولما اترجيت التطبيق إنه يحل المشكلة دي ويشوف الرعب اللي قلب حياتي طلب مني فلوس وهيوصلني بشيخ كويس هيحل المشكلة دي وقالي إن فيه حد عاملي سحر عشان يدمر حياتي..

كلام مش منطقي ومش مفهوم، بس بدون تفكير لقيت نفسي بنفذ وبعمل كل اللي بيطلبه مني، لأن الفترة دي ومن كتر الكوابيس والقلق والخوف بدأت أفقد أعصابي فعلًا، والأسوأ من كل ده إني كنت حامل وكنت في حالة رعب على الجنين وتحديدًا إني في شهور الحمل الأولى بس، واتفاجئت إن التطبيق طالب مني مبلغ ضخم، 20 ألف جنيه، ولما قولتله إني مش معايا المبلغ ده ضحك، وقالي إني لسة واخده الورث من شقة أبويا من شهرين بس، وأكيد مصرفتش الفلوس يعني، وإن دول نص التمن ولو اتأخرت هيطلب أكتر..

ده كان أغرب حاجة بالنسبالي، ازاي عرف إن ورثي كان 40 ألف، استحالة ده يكون إنسان طبيعي أبدًا، والغريب إنه بعتلي رقم محفظة أحول عليها المبلغ، وبدون تفكير حولتله المبلغ اللي هو طلبه كله، واستمر الحال من سيء لأسوأ، وصلني بصفحة شيخ كان بيطلب مني حاجات غريبة، مرة أكتب على جسمي، ومرة أولع أنواع بخور غريبة، ومرة أنام في الحمام، وكل ده كان بيدمرني أكتر مش بيحل أي مشاكل..

ووسط كل الجنان ده بدأت جديًا أفكر في الموت، وازاي أقدر اتخلص من حياتي، وصارحت التطبيق إني فعلًا هعمل كدا، هدنني لو عملت كدا هينشر الصور وهتفضح بعد موتي، قولتله مش مهم، طالما هتخلص منه ومن أفعاله، بس لوهلة حسيت بإحساس غريب أوي، ليه أنا اللي أموت مش هو، ليه أتحمل ابتزاز وتعب وقلق ورعب وفي الآخر أنا اللي أموت مش هو، وبدون تفكير كسرت الموبايل بتاعي ألف حتة، وقررت لو فعلًا نفذ وعده وفضحني وقتها اتخلص من حياتي..

ولقيت نفسي وبدون تفكير بلجئ للطريق الوحيد اللي مكنش قدامي غيره، اتوضيت وفضلت أدعي واستغفر كتير أوي لعل وعسى ربنا ينجدني من اللي أنا فيه، ولما افتكرت اللفافة إياها صورتها وبعتها لحد قريبي وقالي بعدها إن ده سحر والعياذ بالله ولازم حد يحطه في مية بملح ويبطل مفعوله، وفعلًا عملت كدا وبدأت أموري تتحسن يوم بعد يوم..

وقررت في النهاية أروح أقعد عند والدتي كام يوم عشان أشم نفسي وانسى الفترة العصيبة اللي عدت عليا دي، ولما لقيت إني مش معايا موبايل قررت أكلم أمي من تليفون جوزي، كان وقتها بيستحمى ومسكت موبايله وفتحته لأني كنت شوفته بيرسم النمط في مرة، واتفاجئت بحاجة غريبة أوي خلت جسمي قشعر، نفس التطبيق اللي كان على موبايلي، متسطب عنده، استغربت أوي ولقيت نفسي بفتحه بخوف كبير، وعلى التطبيق لقيت دردشة طويلة أوي، الدردشة دي كانت بينه وبيني، يعني مش التطبيق أو الذكاء الاصطناعي اللي كان بيهددني ويبتزني، ده كان جوزي، وعلى نفس التطبيق لقيت دردشة تانية بينه وبين أختي من أبويا اللي ورثت معايا، وفهمت إن الخطة كلها بتدبيرها، ياخدوا ورثي، وبعدها يطلقني ويتجوزها، وهي اللي عملت السحر، وهي اللي كانت بترد أوقات وأوقات هو اللي بيرد عليا..

عشان كدا هي اللي سطبتلي التطبيق وقفلت كل الإعدادات فيه، حاولت أتمالك أعصابي وخدت الموبايل كله وخرجت من البيت على بيت أمي، وهناك تمالكت أعصابي بالعافية لما لقيت بينهم محادثات على الواتس والماسنجر، محادثات قذرة كلها صور وفيديوهات وكلام قبيح، وزي ما عملوا فيا كان لازم أعمل فيهم، وطالما صوري اللي صورهالي في الموبايل أنا في الأمان..

وبدأت أساومها صراحة، والبداية تبعتلي العشرين ألف، ولما عرفت إني كشفتها فضلت تتحايل عليا أستر عليها، بس مقدرتش أسامحها أو أشفق عليها وخدت حقي وقدرت أتطلق وأخد كل حقوقي لأني كنت الطرف القوي مش الضعيف، وربنا نجاني من أكبر مكيدة اتعرضتلها في حياتي، نجاني منها وأنا على وشك أتخلص من حياتي عشان أتعلم أهم درس ي حياتي كلها، لما بنواجه مشكلة أكبر مننا مبنروحش ننهي حياتنا لا، إنما بنستعين بالله وبنتغلب عليها بقدرة الله لأن ربنا وضحلنا ده وقال [لَا يُكَلِّفُ اللَّهُ نَفْسًا إِلَّا وُسْعَهَا] سورة البقرة

بقلم: أحمد محمود شرقاوي