اخته

جنيت على نفسي

اشتكيت لجوزي عشان يتصرف في أخته نهلة ويمشيها من شقتي بأي طريقة، بس زي ما بيقولوا ولا حياة لمن تُنادي، وقالي إن اخته هتعيش معانا ومش هيمشيها، ولو خيرته بيني وبينها هيختارها هي، وده بعد ما اتكلم معايا وفهمني انها بقت يتيمة وخايف عليها تعيش لوحدها كمان البنت مريضة وعندها مرض وراثي بيخليها تتعب كل شوية ولازم تبقا في رعايته، اقترحت عليه يوديها لأي حد من قرايبه رفض وقال أختي مش هسبها لحد ولو فتحت الموضوع تاني هيطلقني، ولقيت نفسي غصب عني مجبرة اتحمل بنت جامعية بتشاركني في شقتي، وبقت مفروضة عليا غصب عني، عشان كدا كرهتها، كرهتها من كل قلبي.

معرفش سبب الكراهية لأني مكملتش تعليمي وهو دخلت الكلية واتعلمت، ولا سبب الكراهية لأنها واخدة مكاني، حاولت أتعامل معاها وحش بس جوزي كان بالمرصاد وكان بيعرف أي حاجة، ولو زعلتها مرة كان بيبقا يوم سيء على دماغي، ولما راح اشتكى لأهلي أبويا وقف في صفه، وفضلت على الحال ده 6 شهور كاملين.

هي اة أغلب وقتها كانت في الجامعة أو في أوضتها، بس أوضتها دي في النهاية هي شقتي وأوضة ولادي اللي لسة مخلفتهمش، لحد ما نصحتني واحدة من صحباتي بعد ما اتكلمنا اني لو شديت حيلي وحملت هتبقا ورقة ضغط كبيرة على جوزي انه يمشيها، وكمان هتبقا الشقة قانونا بتاعتي وهتتغير كل الأمور.

وفعلا ورغم اتفاقنا انا وجوزي اننا نأجل الحمل سنتين قررت الغي المانع وحملت، في البداية استغرب جدا بس قولتله اني ممنعتش حاجة وده أمر الله، وفضلت مستنية يمهد لأخته عشان تمشي بسبب ابني اللي جاي في السكة، بس دايما كان بيفرحها ويقولها هتبقي عمة وهتفرحي أوي بإبني لما يجي.

ولما فاتحته مرة تانية عرفت ان ابني لما يكبر هيبقا مع عمته في الاوضة وانها برضه مش هتمشي، وقتها ولعت نار في قلبي كانت كفيلة تحرق الأخضر واليابس، وكلمت صاحبتي من تاني وقولتلها إني عاوزة أمشيها بأي طريقة حتى لو هسحرها، قالتلي ان الطريق ده غلط وبيأذي كل اللي بيقرب منه بس انا كان عندي إصرار كامل إني اتخلص منها بأي طريقة كانت، عشان كدا فضلت أدور لمدة شهركامل على حد بيعمل أسحار عشان أتخلص منها بأي طريقة كانت، وفي النهاية قدرت أوصل واعرف إن فيه راجل في بلد في محافظة تانية مشهور أوي وسره باتع زي ما بيقولوا.

اتصلت بقريبتي اللي عرفتني عليه وفعلا خدتلي ميعاد معاه وقالتلي المبلغ اللي أجيبه معايا والمطلوب، كانت شعرة أو حاجة من أطر البنت، ويا سلام لو كانت حاجة من دم الحيض بتاعها، منديل مثلا، وانا كان سهل أوصل لحاجة زي دي مش صعب لأني كل شوية في أوضتها.

وخدت المطلوب وروحت للراجل الصبح بدري عشان الحق أوصل بدون ما جوزي يشك فيا، وفعلا وصلت ودخلت على الشيخ، الراجل كان كبير أوي في السِن، كبير بدرجة مبالغ فيها، ولما دخلت عليه كلمني عن انه الأجل قرب وهيموت قريب أوي، وبما إنه آخر أعماله في الدنيا فهيعملي سحر يخلي البنت تموت في إسبوع واحد بس من شدة المرض، عشان تكون نهاية كويسة عملها في حياته، أو زي ما بنقول نهاية الخدمة.

فرحت أوي من جوايا لأن حظي وصل للدرجة دي إن الراجل يعمل حاجة معملهاش قبل كدا عشان اتخلص من نهلة للأبد، اداني حاجة سودة عاملة زي حتة الصلصال وقالي لازم البنت تبلعها بأي طريقة كانت، وانا عارفة ازاي هخليها تبلعها مع المشروب الصباحي بتاعها.

وقد كان فضلت يوم كامل بخطط لحد ما قدرت أخليها تبلع حتة الصلصال بتاعتها، وحسيت وقتها إني خلاص ارتحت تماما، وإني هتخلص منها للأبد، اسبوع واحد والبنت هتمرض وتموت ويبقا قضاء وقدر، وابني يجي للدنيا بدون عمة زي دي ويعيش في شقة أبوه براحته بدون قيود.

وعدت أول تلت ليالي بدون أي حاجة، كنت بسمع صوت غريب من أوضة البنت بس صوت ضعيف خالص، في اليوم الرابع لقيتها بتنادي عليا بصوت عالي وجوزي كان في الشغل، بتنادي بعصبية وكأني مثلا أختها الصغيرة وبتشتم كمان، تمالكت نفسي وروحتلها لقتها بتبصلي بصة غريبة وقالت:

(ايه التراب اللي فوق الدولاب ده كله ليه منضفتيش الأوضة كويس)

الكلمة خلتني أولع من جوايا، هو انا كمان مطالبة أنضفلها أوضتها، كانت فرصة عشان أطلع فيها الحقد اللي جوايا كلها، ولسة بشتمها وبقولها انها تعيش هنا زي الخدامة ومتتكلمش لقيت المنبه اللي على التسريحة راشق في راسي، لدرجة إني وقعت على الأرض، وقبل ما استوعب الصدمة مسكتني من شعري ومسحت بيا الشقة كلها، كانت وكأنها تلت رجالة في بعض مش بنت مر..يضة وهزيلة.

ضـ،ـربتني علقة متضربتهاش في حياتي وراسي اتفتحت ونز…فت د…م، وهـ،ـ،ددتني وهي بتبص على بطني إني لو مسمعتش الكلام هتسقطني، هربت من إيديها عشان تنادي من تاني وتطلب مني أنضف الأوضة وإلا هتموتلي ابني، وهددتني لو قولت لجوزي هتدبحني.

كان جسمي متكسر وحاسة إني بموت من الوجع، لدرجة إني مقدرتش أصرخ واستغيث بالجيران، ورجع جوزي يسألني عن سبب الجرح اللي في راسي والعلامات اللي على وشي، انهرت وقولتله إنها أخته اللي عملت فيا كدا، وراحلها لقاها مريضة ونايمة على السرير تعبانة أوي، ولما سألها أنكرت وقالت اني نزلت اتخانقت في الشارع.

وصدقها وفضل يلح عليا يعرف مين عمل فيا كدا، ومن إصراراه وجنونه قولتله دي واحدة في السوق معرفهاش مسكتني وعملت فيا كدا، ونزل يجري في الشوارع يسأل البياعين عشان يعرف مين اللي ضـ،ـربتني بس موصلش لحل، ورجع وهو بيضـ،ـرب كف على كف.

وتاني يوم ومسافة ما نزل سمعت صراخ نهلة وهي بتشـ،ـتمني وبتطلب مني الفطار واني أنضف الشقة كلها، روحتلها وانا خايفة منها وعملتلها الفطار، ومن يومها بقيت شغالة زي الخدامة تحت رجليها، لدرجة إني من جناني وحقدي عليها حطتلها في مرة سم في الأكل بس اكتشفته وفضلت تضـ،ـرب فيا عشان تجـ،ـبرني أكل من الأكل المـ،ـسـ،ـموم وأموت انا وابني.

وياريت الموضوع وقف على كدا، نهلة بقت لما بتغضب وبتبص لأي حاجة في الشقة بتولع، أول مرة لما غضبت مني والبوتجاز ناره عليت ودراعي اتلسع لسعة مؤلمة أوي، وبعد كدا الستاير ولعت، وبعدها مرتبة السرير، كل ده وجوزي كل ما يجي يشوف مصيبة في البيت، كان هيتجنن ومش فاهم اللي بيحصل.

ولما انهرت وقولتله أختك ملبوسة وبتولع في عفش الشقة وهتحـ،ـ،ـرقنا مصدقنيش، وقالي انه شاكك إن انا سبب المصيبة دي كلها، لحد ما ثو..رت في يوم، ثورت ثورة غريبة عليها وحاولت أمـ،ـوتها وكانت أسوأ خطوة خدتها في حياتي.

النـ،ـار مسكت في الشقة كلها، والدخان بقا في كل حتة لدرجة إني وقعت في الأرض وبدأت أتخنق، الجيران كسروا الشقة ودخلوا وشالوني من وسط الدخان، بس كانت فيه الكـ،ـار.ثة الأكبر، كنت بنز…ف نز..يف غير طبيعي وحاسة إن حد ماسك سـ،ـكـ،ـينة وبيقطـ،ـع في بطني، وروحت المستشفى وأجـ،ـهـ،ـضت، الدكاترة بيقولوا الجنين كان متقطـ،ـع بطريقة غريبة وكان إجهـ،ـاض بشع مفيش دكتور شافه قبل كدا.

الشقة اتحـ،ـ،ـرقت، اجـ،ـهضت، وفضلت طريحة الفراش شهر كامل مبتحركش، جوزي متحسر عليا وبيروح ويجي عليا في بيت أهلي لحد ما طلبت الطلاق، وعشان يطلقني قولتله إني عملت سحر لأخته عشان تمـ،ـوت، بس أخته مماتتش دي بقت عاملة زي الحيوان المفـ،ـ،ـترس.

وطلقني، طلقني لأنه بقا شايفني شيطـ،ـ،ـانة، والعفش بتاعي كله اتحـ،ـ،ـرق وبعتهولي محـ،ـ،ـروق وهـ،ـددنا انا وأبويا لو اتكلمنا مش هيسكت وهيخـ،ـرب الدنيا على دماغنا، وأبويا كان راجل غلبان سكت ومتكلمش، وخد أخته وتعب معاها لحد ما اتعالجت تماما، عرفت بعدها بالصدفة إن الشيخ الدجال قبل ما يموت قرر يعمل حاجة خير على حظي أنا، فبدل ما يعمل سحر للبنت عشان تمر..ض ولا تمو..ت، عملها سحر بالحماية وبالأخص مني أنا، وكأنه بيتقرب من ربنا بآخر عمل في حياته، وده على حظي أنا، عشان كدا البنت اتلبست وبقت ملبوسة بجن بيحميها من أي شر، ومن شدة السحر كانت بتبص للحاجة تولع.

وخسرت كل حاجة في النهاية، بيتي وعفشي وابني واتطلقت، مش عارفة أتكلم ولا أقول نصيحة غير إن الست دايما جواها نزعة غيرة وحقد لو استسلمت ليها هتد..مر..ها تماما، ولازم تفهم إن ربنا قدرلها كل خطوة في حياتها ومش هتاخد أكتر من نصيبها.

تمت