انتى ياانسة

فادية: انت اتجننت؟ ده فرح، والناس كلها شايفانا! ابعد عني، انت مجنون!
فارس: يا آنسة، مش تزعقي! أنا عارف إننا في فرح، هو أنا مش بشوف مثلًا؟
فادية: انت بتتكلم معايا كده ليه أصلًا؟
فارس: عشان في بنات، والمفروض إنكم صحاب، وفي فرح صحبتكم! يعني حتى لو معارف، مش هيضحكوا عليكي كده.
فادية: يضحكوا عليا؟ طب ليه؟ وعشان إيه؟
فارس: تعالي، متخفيش. أنا هلبسك الجاكت بتاعي، وروحي الحمام ظبطي نفسك، ومتسأليش ليه!
فادية (بغضب وفزع): حاضر.
فارس: أجي معاكي؟ أستناكي برّه؟
فادية: لا، استناني هنا، ممكن؟
فارس: هتيجي تلاقيني، مش همشي.
فادية: لو سمحت، كان في واحد واقف هنا دلوقتي، طويل، وشعره أسود وأبيض قوي… شُفته؟
شخص: لا، ما خدتش بالي، للأسف.
فادية: تمام، شكرًا.
فارس: طب ممكن نستنى شوية يا شباب؟
محمد: فين الجاكت بتاعك يا فارس؟
فارس: آه، الجاكت… في واحد قال هيتصور بيه ويرجعه تاني. هروح أشوفه وارجعلكم.
محمد: متتأخرش طيب.
فارس: راجع على طول.
(فادية في نفسها)
أنا تعبت من الانتظار، هو مش هيجي بقى؟ عشان أروح؟
أنا اتقفلت، ومبقتش قادرة أبص لحد تاني…
فادية: لو سمحت، لو سمحت… أنا هنا.
فارس: أول مرة أشوف القمر من قريب.
فادية (بكسوف): شكرًا، كله من ذوقك. مش عارفة أشكرك إزاي على اللي عملته معايا.
فارس: مفيش شكر يا…
فادية: اسمي فادية يا…
فارس: اسمي فارس.
فادية: اتفضل الجاكت يا فارس.
فارس: خليه معاكي. أكيد الفستان لسه منشفش، ويوم تاني تبقي تجيبيه… أو مش عايزة خالص.
فادية: عن إذنك.
فارس (بِهزار): طب مفيش رقم فون؟ رقم واتساب؟ عشان تعرفيني هتجيبيه إمتى؟ ولا حاجة!
طب خلاص، خلاص… بلاش التكشيرة دي، بهزر معاكي، أنا مش عايز الجاكت.
فادية: هبعته ليك أكيد. لو في نصيب أشوفك تاني، هرجعه ليك. بس أنا بعتذر عشان الرقم وكده… قلة ذوق مني، عارفة، لأن ده حقك.
فارس: الوقت اتأخر، لازم تروحي… مع السلامة.
(فادية في نفسها وهي ماشية)
مشيت وقلبي بيدق جامد… إيه الإحراج ده؟ طب أعمل إيه؟ أروح أديه رقمي؟ ولا أعمل إيه؟ يا نهار أبيض على الكسوف!
محمد: واقف لوحدك ليه؟
فارس: لا، أبدًا… مفيش. يلا عشان الوقت هيسرقنا كده.
زينب: العروسة كانت عاملة إزاي يا فادية؟ قوليلي، ويلا عشان ماما بتجهز العشا.
فادية: كانت عروسة… أمال هتبقى إيه يعني؟
زينب: مالك كده؟! والجاكت ده بتاع مين؟
فادية: تعالي الأوضة، واقفلي الباب، وهحكيلك.
محمد: فارس! يا ابني، سرحان في إيه؟
فارس: مفيش حاجة، ركّز في الطريق.
محمد: فين الجاكت بتاعك؟
فارس: ملقتش الشخص اللي خده… بس حاسس إني لقيت حاجة أكبر وأغلى من الجاكت.
محمد: لقيت إيه؟… يتبع