مرة عملت كيكة

مرة عملت كيكة لجوزي بمناسبة ترقيته، حماتي أخدتها وقالت هوديها لبنتي عندي عشان نفسها فيها وبعد ساعة لقيت صورة الكيكة عند أخت جوزي ومكتوب عليها من إيد أمي!
أنا عمري ما كنت بحب أعمل مشاكل مع حماتي، بالعكس كنت دايمًا بحاول أكسبها حتى لو على حساب راحتي.
لكن اللي حصل يوم ترقية جوزي كان أول مرة أحس إني مش عايزة أسكت.
جوزي أحمد كان مستني الترقية دي من سنين، ولما رجع البيت وقالي إنه أخيرًا بقى مدير القسم، فرحت من قلبي.
قررت أعمل له كيكة بإيدي، وكتبت عليها اسمه وعبارة صغيرة
مبروك يا أحسن زوج في الدنيا
كنت لسه

بحط آخر لمسة عليها، لما حماتي دخلت المطبخ وبصت للكيكة.
قالت
ياااه شكلها حلو أوي.
ابتسمت وقلت
دي لأحمد، عشان ترقيته.
بصت لي شوية، وبعدين قالت بكل بساطة
طب هاتيها.
نعم؟
هوديها لأختك؟!
قالتها كأن الموضوع محسوم.
لا، هوديها لبنتي عندي نفسها فيها من زمان.
بصيت للكيكة، وبعدين لها.
بس دي أنا عملتها لأحمد.
ردت بضيق
يعني إيه؟ هو هيخلصها كلها؟ وبعدين بنتي أولى بيها.
ماحبتش أعمل مشكلة.
قلت
خلاص بس خلي أحمد ياخد حتة.
مدت إيدها وخدت الكيكة ومشيت.
بعدها بساعة تقريبًا، كنت قاعدة جنب أحمد في الصالة، وفجأة موبايلي رن.
فتحت السوشيال ميديا
ولقيت صورة للكيكة.
نفس الكيكة.
بنفس الكتابة اللي أنا كتبتها.
لكن الصورة كانت عند أخت أحمد، نهى.
وتحتها مكتوب
كيكة أمي من إيد أمي ربنا يخليكي لينا.
فضلت باصة للشاشة وأنا مش مصدقة.
أحمد شاف وشي وقال
في إيه؟
وريته الصورة.
اتغيرت ملامحه.
ماما قالت إنها هتوديها لنهى.
قلت بهدوء
وأنا وافقت.
أمال مالك؟
بصيت للصورة وقلت
مفيش بس واضح إن نهى ماقالتش إنها جابت الكيكة من عندي.
أحمد سكت.
وبعدين قال
يمكن هي قصدها إن ماما اللي جابتها.
ضحكت بسخرية
لا يا أحمد بص كويس.
كبرت الصورة.
كان واضح جدًا إن حماتي واقفة جنب الكيكة، وإيدها على كتف نهى.
لكن اللي شد انتباهي أكتر
إن نهى كانت ماسكة سكينة وبتقطع أول حتة.
وأحمد فجأة قال
استني
إيه؟
دي مش الصورة الوحيدة.
فتح حساب أخته.
كان فيه أكتر من صورة.
صور كيكة.
صواني أكل.
حلويات.
حتى تورته عيد ميلاد.
وكل مرة نفس الجملة تقريبًا
من إيد أمي.
بصيت لأحمد وقلت
هي كل ده من شغل امك؟
ماعرفش يرد.
لكن اللي خلاني أتوتر أكتر إن في كل الصور، الأكل كان متصور في بيت نهى
مع إن حماتي أصلًا كانت بتقضي معظم وقتها عندنا.
تاني يوم، حماتي جت وهي مبتسمة كأن مفيش حاجة حصلت.
وقالت لي
أحمد عجبه الكيك؟
رديت
جدًا.
قالت
الحمد لله نهى كانت مبسوطة أوي.
بصيت لها وقلت
هي قالت لك إيه؟
لمحة نيوز