لو كنت اعرف
منى خدي موبايلك وتعالي معايا
قالت
رايحين فين؟
قلت
البنك
قالت بخوف
دلوقتي؟
قلت
أيوه دلوقتي
أنا لازم أعرف كل جنيه خرج من الحساب ده راح فين
خرجنا من الشقة وأنا طول الطريق ساكتة
كنت بحاول أفتكر كل مرة نجلاء قالتلي فيها إن الحساب مفيهوش فلوس
كل مرة كنت بصدقها
ولما وصلنا البنك طلبت كشف حساب كامل من يوم وفاة سعاد لحد النهارده
الموظف بدأ يطبع الورق
ورقة
وراء ورقة
لحد ما حط قدامي ملف كامل
قلت له
لو سمحت ممكن تحددلي التحويلات اللي تمت من الحساب؟
قال
طبعا
وقعد يشاور على العمليات
في الأول كانت مصاريف بسيطة
أدوية
فواتير
تصليحات
وبعدين بدأت تظهر تحويلات بمبالغ كبيرة
خمسمية
ألف
ألفين
خمسة آلاف
وبين كل تحويل والتاني تحويلات صغيرة منتظمة
مبلغ ثابت تقريبا كل شهر
بصيت للموظف وقلت
التحويلات دي كانت بتروح لمين؟
قال
الأسماء موجودة في الكشف
مسكت الورقة
وأول اسم شوفته خلاني مش قادرة أتنفس
كان اسم نجلاء
بنتي
بصيت لمنى
لقيتها بتبصلي وهي مش فاهمة
قلت بصوت مبحوح
دي ماماكي
منى قربت مني وقالت
يمكن كانت بتدفع مصاريف الشقة يا تيتة
هزيت راسي
قلت
لا
المبلغ ده أكبر بكتير من مصاريف الشقة
وبعدين لقيت تحويل تاني باسم شخص ما أعرفوش
وبعده تحويل ثالث
وبعده رابع
وفي آخر الصفحة كان فيه تحويل بمبلغ كبير جدا
وقفت عنده وأنا مش قادرة أحرك إيدي
سألت الموظف
المبلغ ده اتحول إمتى؟
قال
من حوالي ست شهور
قلت
واتحول لمين؟
بص في الشاشة وقال
لحساب باسم…
وسكت لحظة
وبعدين نطق الاسم
وأول ما سمعته حسيت إن رجلي ما بقتش شايلاني
لأن الاسم ده ما كانش غريب عليا
ده كان اسم الشخص اللي نجلاء قالتلي من سنين إنه مات…
لكن واضح إن بنتي كانت بتدفع له فلوس من حساب أختي لحد النهارده.
بصيت للموظف وأنا مش قادرة أستوعب اللي سمعته وقلتله
إنت متأكد من الاسم ده؟
بص للشاشة تاني وقال
أيوه يا حاجة متأكد
قربت من الورقة أكتر وأنا إيدي بتترعش
الاسم كان “عادل”
نفس الاسم اللي نجلاء قالتلي من سبع سنين إنه مات في حادثة شغل
ساعتها افتكرت اليوم ده كويس
نجلاء دخلت عليا وهي بتعيط وقالتلي
ماما عادل مات
قلت لها وقتها
ربنا يرحمه
ومسألتش كتير
عادل كان جوز نجلاء السابق
اتطلقوا من سنين
وكنت فاكرة إنه اختفى من حياتنا تماما
لكن التحويلات اللي قدامي كانت بتقول حاجة تانية
قلت للموظف
ممكن أعرف التحويلات دي كلها اتعملت إزاي؟
