عصا..به

“القب.ض على عصا..بة تتا.جر بأعض.اء الأطفال وتد.فنهم في إحدى القرى سرًا”

– يا باشا والله العظيم فيه صوت عيال بتبكي جوة التربة..

– غور يا راجل يا مجنون أنت من هنا بدل ما ألبسك قضية..

– يا باشا بقولك فيه عيال ومرميين جوة..

– بقولك أمشي أحسن لك من هنا..

…………………

حاد.ث شهير جدًا هز الرأي العام من فترة ليست بالطويلة، ورغم غرابة الموضوع كله وعشان الدنيا متخربش أكتر وأكتر اتنسب الموضوع لعصابة تجارة أعض.اء بشرية، بس الموضوع كان أخط.ر من كدا بمراحل..

في قرية من قرى مصر واللي بتكون في الغالب عبارة عن عائلات، وكل عائلة بتكون واخدة مكان وأغلب أفراد العائلة جمب بعض، كل واحد باني بيته جمب التاني، وفي اجتماع عائلي بيحصل كل كام شهر جه راجل تبع العائلة بس من قرية تانية وكان معاه ضيف غريب شوية، ضيف حضوره ثقيل من حيث نظراته، ابتسامته، حتى طريقة كلامه..

في اجتماع العائلة ده كان فيه طقس من الطقوس وهو إن الكل يروح يزور قبر كبير العائلة اللي توفى من شهور بس، وبما إن العائلة كانت تقريبًا واخدة الشارع اللي بيطل على المقابر فكانت مجرد خطوات تدخلك لأول حارة من حارات المقابر, يومها بدأ الراجل ده يبص لمقبرة ما نظرات غريبة، نظرات خلت أغلب الموجودين يلاحظوا بل ويسألوا مين ده أصلًا..

ولما الراجل ده مشي تساءل الناس عنه، سألوا الراجل اللي من عائلتهم واللي كان اسمه ممدوح عنه، بس هو اتهرب من الإجابة، اتهرب من الإجابة عشان يقعد مع كبير العائلة الجديد ويبدأ يوصله فكرة جهنمية شوية..

قاله إن فيه مقبرة فرعونية موجودة في منطقة المقابر وبالأخص الحفر المفروض يبدأ من جوة القبر اللي كان باصص عليه الراجل الغريب واللي كان كشاف، كبير العائلة رفض إنه يدخل العيلة في أي أمر من الأمور دي بس ممدوح بدأ يقوله على أسرار في حياته..

قاله إنه بيشتغل مع الكشاف ده من سنة وقدروا يفتحوا تلت مقابر لحد دلوقتي، منهم اتنين طلعنا منهم دهب، وإن الكشاف ده متمكن لأبعد مدى، ولو المقبرة اتفتحت صح هتغني العيلة من أكبرها لأصغرها، وكمان هيقدروا يجيبوا سلاح كتير يعمل لهم هيبة وسط الناس كلها..

وإنك لو عملت ده هتكون أصلح شخص إنك تكون كبير العيلة  الخلاف اللي داير عليك في السر، وأنت عارف إن فيه ناس مش مقتنعة بيك من الأساس..

الكلام اللي كان بيتقال صح، وكان بيد.وس على الجر.ح، وده خلى كبير العيلة يستفسر عن التفاصيل، وممدوح طمنه جدًا، طمنه بالأخص إن القبر تابع للعيلة نفسها، كل اللي هيحصل إننا هنحفر أسبوع جوة القبر وهنقفل علينا باب الحوش كله..

محدش هيحس بينا خالص، والحفارين أنا عارف هجبهم منين، الموضوع بسيط، الموضوع كان مثير لكبير العيلة، وده لأنه متأكد إن فيه ناس تانية طلعت آثار في البلد كتير جدًا..

تاني يوم كانت المقابر بتتجهز في السر، الحوش الملفوف بسور جوة المقابر كان بيتعمل عليه ستار كامل يمنع الرؤية عنه، ووصل أربعة حفارين، والكشاف وممدوح وكبير العائلة..

الكل وقف قدام الضريح الكبير والمقفول بباب حديدي، المفروض إنهم هيدخلوا جواه ويحفروا في الأرض مسافة 8 متر عشان يوصلوا، بس المشكلة إن القبر ده كان مدفون فيه حد من العيلة..

راجل تقي وورع جدًا، وده خلى كبير العيلة يتردد كتير، بس ممدوح مسبش مجال إن الوقت يضيع، وفورًا فتح المقبرة اللي كانت شبيهة بغرفة على وجه الأرض وطلب من الحفارين يلموا العضم منها ينقلوه مقبرة تانية..

وبالفعل تم الأمر وبقت المقبرة نضيفة، وجاهزة إنك تحفر فيها عشان توصل لمقبرة تانية تحت منها، بس مليانة بالدهب والخير الوفير، اتحط كام كشاف كبير جوة المقبرة عشان تنور وبدأ الحفر بالليل وكان بينتهي مع شروق الشمس خوفًا إن حد يحس بيهم..

الموضوع كان سالك تمامًا، وكأن كل شيء بيمهد إنهم ياخدوا الدهب في أيام قليلة، وفعلًا وبعد أسبوع واحد بس كان الحفر وصل لتسعة متر كمان، وبدأت تظهر الصخرة، أو الباب زي ما بيقولوا، وطبعًا كل ما تضرب فيها فهي صلبة زي الماس، مفيش أي حاجة بتأثر فيها..

ونزل الكشاف يحاول يفك طلاسمها ويراضي الرصد الموكل بحراسة المقبرة الفرعونية، بس الأمر مكنش سهل، لأنها كانت مقبرة لكاهن مصري قديم وموكل بحراستها نوع قوي من الرصد، وبالأخص نوع طلباته مخيفة جدًا..

خرج الكشاف يقول لكبير العيلة وممدوح إن الصخرة مش هتتحرك مكانها غير بدم تلت أطفال، ويمكن أكتر، وبدأ الأمر يشتد صعوبة، ضمير كبير العائلة وخبث ممدوح والكشاف، وإننا لو وقفنا دلوقتي مش هينفع وإن لازم نكمل لحد النهاية، وإن ورا الصخرة دي في تابوت دهب مقدر قيمته بملايين الدولارات، ومع النقاش الخبيث استسلم تمامًا كبير العائلة، خاصة لما عرف إنه مش هيتدخل في أي حاجة خالص..

وتواصل ممدوح مع كبير البلطجية في منطقة عشوائية في قلب القاهرة، البلطجي ده كان مشغل تحته شبكة كاملة منها بلطجية ومتسولين وحرامية وتجار مخدرات، عالم كامل من الإجرام..

طلب وقتها منه تلت أطفال، والبلطجي طلب مبلغ وقدره، على كل طفل متين ألف جنيه، ودفع كبير العيلة، وجابوا تلت أطفال عمرهم ميزيدش عن خمس أو ست سنين، ودبحوهم على الصخرة بكل قسوة، وكأن الحفارين عملوا الموضوع ده ألف مرة قبل كدا..

وبالفعل الصخرة بدأت تلين للضربات وتتفتت، بس جزء منها اللي اتفتت والباقي فضل صلب، صلب جدًا، الصخرة دم تاني، وصرخ كبير العائلة إنه مش هيدفع تاني، خاصة إن الكشاف طلب تلت أطفال كمان..

ومع إصرار كبير العائلة إنه مش هيدفع قرروا الآتي، التلت أطفال هنجيبهم من البلطجي ونأخر سداد ثمنهم، بس في المقابل هناخد أعضائهم نبيعها لشخص تاني وندفع للبلطجي..

كانوا بيتكلموا في الموضوع وكأنه ماتش كورة، وكأنها حاجة في غاية البساطة، وبالفعل طلبوا دكتور فاسد عشان يستخرج أعضاء حية من الأطفال قبل دبحهم على المقبرة..

بس البلطجي رفض يبعت أطفال قبل ما ياخد فلوسه كاملة، ومع إصرارهم دفع كبير العائلة ستوميت ألف تانيين، على وعد إنهم هيرجعوله خمسوميت ألف من تجارة أعضاء الأطفال..

وجه الطبيب واستخرج أعضاء الأطفال، بس الصخرة فضلت ثابتة، اتفتت منها جزء بسيط كمان، وازاد الأمر سوء واتشحن الجو بالتوتر..

تاني يوم وصلهم تليفون إن الاعضاء اللي اتاخدت تقدر بميت ألف بس، وقتها كبير العائلة حس إنها لعنة، وإنه بيتنصب عليه نصباية كبيرة أوي، يومها عمل خناقة كبيرة مع ممدوح ودخلت شياطين الجن كلها بينهم، بس خلاص الفلوس اتدفعت، مليون ومتين ألف، ولازم نجيب أطفال كمان..

لازم على الاقل يسترد الفلوس دي، يومها اتصل كبير العيلة بالبلطجي بعد ما خد رقمه سرًا من تليفون ممدوح وكانت المفاجأة، الطفل تمنه ميت ألف جنيه بس، مش متين ألف جنيه..

ده معناه إن ممدوح والكشاف بيكسبوا من وراه في كل طفل، بينصبوا عليه وياخدوا فلوسه ويخلوه موصوم بعا.ر  أطفال قدام ربنا..

وقتها غضب الراجل، غضب غضب شديد، وفي الليلة دي قرر، مفيش مقابر هتتفتح خالص، ولو جابوا ميت طفل، ومع الضغط الشديد وفي الليلة الجديدة اللي بدأ فيها الحفر ومحاولة تفتيت الصخرة طلب ممدوح تلت أطفال تانيين من كبير العيلة، كبير العيلة اللي كان حاطط الطبنجة بتاعته في جيبه وهو عاقد العزم على أمر تاني خالص..

ووقت ما كان الحفارين تحت بيضربوا في الصخرة كان كبير العيلة مطلع طبنجته وقاتل ممدوح بطلقة في راسه، حتى الكشاف اللي ملحقش يتحرك من مكانه خد طلقة في بطنه وقعته في الأرض، وقبل ما يحس الحفارين اللي تحت على عمق كبير بحاجة اتفاجأوا بجثتين بيترموا عليهم من فوق..

وفي لحظات كان فيه بنزين بيترمي عليهم ونار ملتهبة بتنزل عليهم، وخرج كبير العيلة وقفل الباب كله على المقبرة باللي فيها، حتى جثث الأطفال اللي كانت مدفونة في نفس المقبرة اتقفل عليهم الباب..

بعد أيام بدأت حوادث غريبة تحصل في المقابر، محدش كان بيروح إلا ويسمع صوت بكاء أطفال كتير، بالليل بالنهار، الصبح، الضهر، في أي وقت..

حتى إن المقابر بالليل كانت بتتقلب لملعب، أطفال بيضحكوا ويجروا ورا بعض، أمور خلت أهل القرية كلهم يبدأوا يحكوا، يتكلموا، ناس شعرها شاب لما شافوا أطفال شكلها محروق ومخيف بتلعب بين القبور وبيجروا يمين وشمال..

البكاء موجود، أنين، وشوية وبتبقا صرخات، وبدأت الناس تحدد المكان اللي بتيجي منه الأصوات، حوش مقابر عائلة أبو غريب، هجر ناس كتير زيارة المقابر وراحت ناس تانية تبلغ الشرطة..

خاصة إن الموضوع تطور وبقا كل يوم فيه عيال بيجروا في المقابر ويلعبوا، أي حد كان بيشوفهم أجسام محروقة ورقبتهم مقطوعة بطريقة مخيفة جدًا..

الشرطة رفضت مرات ومرات بس مع كثرة البلاغات جه أمر من مسئول كبير بعد ما كذا برنامج اتكلم عن الأمور الغريبة دي بفتح مقابر عائلة أبو غريب..

وراحت قوة من الشرطة وناس من أهل البلد وفتحوا المقابر، وفتحوا المقبرة إياها وكانت الصدمة، حفرة عميقة فيها جثث كتير، ست أطفال وأربعة حفارين وممدوح والكشاف، وخرجت الجثث للتشريح وتحفظت الشرطة على المنطقة كلها لحين استكمال التحقيق..

وتم استدعاء كبير العيلة اللي كان على مشارف الجنون، كان يوميًا بيشوف كوابيس وجثث محروقة بتهاجمه في نومه، كان وصل لمرحلة من الهلاوس غريبة، ومع أول تحقيق حكى الأمر كله من البداية للنهاية، والصحافة خدت الخبر وذاعت فورًا، بس حادث زي ده كان هيقلب الدنيا كلها رأسًا على عقب..

عشان كدا تعقبت الشرطة البلطجي إياه ونسبوا ليه القضية كلها، تجارة أعضاء وبس، وإنه كان بيدفن في مقابر البلد دي عشان بعيدة جدًا، وبس، بس كانت بعض المقالات نزلت، وشهادة كبير العائلة خرجت، بعض الناس قالوا إن ده خيال صحفيين وإن الحقيقة هي اللي اتقالت في المحضر الرسمي..

“تم القبض على عصابة تتاجر بأعضاء الأطفال وتدفنهم في إحدى القرى سرًا”

وطبعًا لو أنت ركزت بذاكرتك شوية هتفتكر إن في ٢٠٠٦م موضوع تجارة الأعضاء ده قلب الدنيا في مصر والرأي العام كله اشتعل..

بس أنا حاولت أجبلك جزء ولو يسير من الحقيقة، الحقيقة اللي بتقول إن مفيش خير بيجي بطرق فيها معصية لله أبدًا،  الأطفال كان أكبر معصية، وأي خير بيجيلك بطرق مترضيش ربنا في حياتك تيقن إن فيه هلاكك إن لم تتب..

بقلم/ أحمد محمود شرقاوي

……………

لو حابب تشوف قصص حقيقية وغريبة ادخل اعمل متابعة للصفحة دي

بقلم: أحمد محمود شرقاوي

……………….

متنساش لو عجبتك القصة تعمل لاف وتعليق برأيك في كومنت..