من صغري

من صغري وابويا كان دايما بيحاول يعلمني حاجتين وفضل على مدار سنين مبيعلمنيش غيرهم:

“تسع أعشار الربح في التجارة”

“واحفظ أموال الناس وإياك تلمس قرش حرام”

وفضل والدي يعلمني المبدأ ده في حياتي ويفهمني ان التجارة مربحة جدا, بس التجارة مع الله مربحة أكتر, وأول حاجة عشان تتاجر مع الله ان فلوسك تكون حلال ومفيهاش أي شبهة حرام, خليك مظلوم في جرام أو اتنين أو حتى كيلو, بس إياك تبخس حق حد في حاجة, وبدأت أشتغل مع ابويا وحبيت التجارة جدا جدا..

خاصةً اننا كنا بنتاجر في الفاكهة, ومش أي فاكهة كمان, إحنا كنا بنتاجر في الفاكهة المستوردة والفاكهة رقم واحد في السوق, كنا بننزل على سوق العبور نشتري الفاكهة بعد الفجر مباشرةً وننزل نوزع على التجار ونكسب مكسب كويس جدا جدا, خاصةً ان والدي كان مشهور بالأمانة والكرم وده خلى سمعته زي الجنيه الدهب, وخلته دايما مطلوب عند كل التجار..

بس ابويا كان كرمه زايد, وكنت بتضايق منه كل شوية لما بيجامل ويعدي حاجات كتير في الشغل وبيقلل من الربح بتاعنا, ولما كنت بعترض كان بيفهمني إن هي دي التجارة مع الله, الرضا ومحبة الناس وتقسيم الربح بينا بيخلي ربنا يبارك فيه, رغم اننا كنا محتكرين أصناف معينة وسهل نغلي عليهم, بس كان بيرضى بربح زهيد من كل قفص بننزله, وفضلت مش راضي على شغل أبويا ولا وضعه بس كملت معاه للأسف..

لحد ما وصلت للعشرينات وبدأت أحس بانجذاب ناحية الجنس الآخر, وحسيت نوعا ما إني محتاج أتجوز, دورت في البنات وملقتش أحسن من بنت عمي سالم, بنت اسمها غادة وعندها 20 سنة تقريبا وجميلة جمال مُبالغ فيه, بس الغريب إني أول ما صارحت أبويا بالموضوع رفض رفض قاطع, وقالي ان النبتة دي فاسدة وأكيد هتجيب عيال فسدة, مكنتش فاهم ليه ابويا بيقول كدا على بنت أخوه, بس فهمت لما بدأ يحكيلي هو ليه ساب الشراكة مع أخوه وبقا بيتاجر لوحده..

قالي ان عمي كانت تجارته فاسدة, بيقبل الفلوس الحرام وبيغش التجار وبينقص في الميزان, وكان قابل يدخل على عياله فلوس حرام, ولما عارضته كان شايف ان ده حقه وان دي شطارة منه, ولما قربت من عياله فترة عرفت انهم شاربين السم من أبوهم, الشباب برضه سمعتهم مشبوهة في السوق, والبنات اسلوبهم مش حلو وآخر حاجة بيبصولها رضا ربنا..

مكنتش مقتنع بكلام ابويا خالص, بس مكنتش هقدر أعترض رغم ان غادة كانت أنثى بحق وحقيقي, وانا ابن عمها وشايف اني أولى بيها من أي حد, بس عدت الأيام نوعا ما, ويوم بعد يوم كنت بتعلق بيها أكتر, خاصةً ان البيوت كانت قريبة من بعض..

في الفترة دي بدأ أبويا يتعب وغصب عنه يهمل في الشغل, وبعد ما كشفنا عليه لقينا مشاكل في القلب ومحتاج عملية قلب مفتوح, حاول يأجل العملية كتير من خوفه منها بس حالته كانت بتسوء كل شوية, وللأسف في النهاية اضطرينا نحجزه بالعافية, ودخل أبويا العمليات, بس أبويا مرجعش تاني, أو بالأخص خرج منها جثة هامدة, أبويا مات, مات فجأة بدون أي مقدمات..

الغريب ان عمي وقف معايا في موته وقفة كبيرة هو وعياله, لدرجة اني حسيت ان ابويا كان ظالمهم, وبعد ما عدت الأيام قررت أتقدم لبنت عمي, ورحبوا بيا ترحيب كبير وفعلا اتجوزنا, خاصةً انها كانت دايما في صفي مش في صف اخواتها, وشايفة ان الحلال أحسن وان حاجات كتير بيعملوها مش عجباها..

في الوقت ده طلب عمي اننا نتشارك في الشغل ولما حسيت بالأمانة من ناحيته قررت اننا نتشارك, بس الغريب ان من أول يوم شغل وكأن لعنة نزلت علينا, نص التجار بعد موت أبويا رفضوا يتعاملوا معانا, والنص التاني بدأ يقل مع الأيام..

ابن عمي كان اسلوبه فظ, وعمي بدأت اتأكد انه بيستنصح بزيادة وده خلاه مكروه في السوق, وانا كنت وسطهم لا حول لي ولا قوة, وبدأ الشغل يقل, والأرباح تقل يوم بعد يوم, لدرجة ان الشغل بدأ يتحول لخسارة أكتر منه مكسب, وحسيت انهم بياكلوا حقي وبزيادة كمان..

لحد ما كل حاجة خربت تقريبا في سنة واحدة, وبقت التكلفة عليا أكبر من الفلوس اللي بجبها, وكأن فيه لعنة فعلا نزلت عليا, مراتي وقتها كانت دايما بتتهم أهلها وشايفة انهم غلط في غلط, وكانت شايفة انهم سبب دمار شغلي واني المفروض أطالب بحقي منهم..

وفضلت الظروف تبقا صعبة معايا أكتر واكتر لحد ما ربنا كرمني وجتلي سفرية برة, جت بالصدفة البحتة, وقررت فورا أسيب التجارة وأقدم أوراق السفر وأسافر, دعيت ربنا كتير وفعلا عرفت اني بعد أسابيع هسافر, بس في الوقت ده عمي اتوفى, ومن تالت يوم بدأت مناوشات من ولاده على الوِرث, مكنتش عارف تفاصيل بس مراتي كانت بتتحول وقتها, وبتقسم انها هتاخد حقها وزيادة عشان تجيب حقي من اخواتها اللي ضيعوه في شراكة التجارة..

وكلها أيام وعرفت انهم نصبوا على اختهم الغلبانة وخدوا حقها, وجت مراتي بدون ذرة تأنيب ضمير تحكيلي, ومش بس كدا, دي قدرت تاخد من حقوق اخواتها الشباب تحت مناوشات وتهديدات غريبة..

وقتها بس حسيت بضربة شديدة في دماغي, ولقيت صورة أبويا بتظهر قدامي, كان بيفكرني بوعوده وتربيته ليا, كان بينبه عليا من أكل أموال الناس بالأخص, واني مسكتش على حاجة زي دي, ولما مراتي شافت ترددي ثارت, كانت شايفة ان ده حقي, وان اخواتها شياطين وانهم ظلمونا, حاولت أبص للجانب الإيجابي واعتبر ان ربنا رزقني بزوجة بتحبني وبتعمل أي حاجة عشاني, وعديت الموضوع في النهاية وسافرت..

وبدأت أشتغل بكل طاقتي عشان أقدر أجمع أكبر ثروة ممكنة في أقل وقت وانزل بيها على بلدي, وكانت مراتي معايا أول بأول في كل حاجة, وخططنا اننا هنشتري شقتين ونأجرهم, وفعلا بدأت ابعتلها مقدم أول شقة وهي كانت بألف راجل, وقفت واشترت وبدأت كمان تشوف المستأجر, كنت فرحان ومبسوط بيها أوي..

سنتين كاملين كملنا فيهم تمن الشقتين واشتريناهم وقررت أخيرا اني آخر السنة هنزل خالص, بس جالي تليفون غريب أوي وقتها, تليفون بيقولي ان مراتي ماتت مقتولة في شقتها, نزلت من سفري وانا هتجنن, واتصدمت بمراتي جثة مدبوحة والشرطة عندي وبيحققوا في موتها, انهرت, بكيت, واتهمت اخواتها وحكيت في النيابة موضوع الوِرث كله, كنت شاكك انه حد من اخواتها اللي عمل كدا..

بس بعد تلت أيام النيابة استدعتني وابتسم ظابط المباحث وقال:

– انت شاكك في مين

قولتله فورا:

– حد من اخواتها

رد وقتها بابتسامة أكبر وقال:

– احنا خلاص اتأكدنا من اللي قتلها

رديت بلهفة وقلت:

– مين

– انت

واجهوني بقتل مراتي, ووقعت زي الهر الساذج في قبضتهم, جالي تليفون من شهور من محامي معرفة بيحذرني ان مراتي وثقت الشقق في الشهر العقاري بإسمها هي, والسعر كان أقل من اللي بعته ليها ب80 ألف جنيه كاملين, وقتها اتأكدت وعرفت انها نبتة فاسدة فعلا وهتاكل حقي, خاصةً لما أخوها المتخانق معاها بلغني انها فعلا بتخطط لكدا..

ضربت جواز سفر بإسم تاني ونزلت, وفي نص الليل هجمت عليها وطعنتها, وخلتها تتنازل عن عقود الشقق ليا, ودبحتها, وروحت استخبيت في فندق قريب بحيث لما يكلموني أرجع عليهم وكأني كنت مسافر..

بس ظابط المباحث كان ذكي, ولما عرف حكاية الشقق من اخوها شك فيا, راجع اسماء اللي رجعوا من المطار يوم مانا ما رجعت ملقاش اسمي, راجع لشهر فات ملقاش إسمي, يبقا ازاي انا جيت, شغلوا كاميرات المطار يوم الجريمة وراجعوها, وظهرت في الصور, وقتها مقدرتش أعمل حاجة غير إني أعترف, اعترف اني نزلت بجواز سفر مضروب, واتحكم عليا بالإعدام..

وقتها اتأكدت ان الحلال والصح هو النجاة في الدنيا وبس, انا اللي رضيت بواحدة أكلت ورث اخواتها, واحدة شيطانة, رضيت على غيري بالظلم والخراب فكانت نتيجة حياتي الخراب, وشربت من نفس الكاس للأسف، وعرفت ان القرش الحرام بيدخل البيت يلعن كل أصحابه وبيهلك الحر والنسل..

بقلم: أحمد محمود شرقاوي

…….

(ولا تأكلوا أموالكم بينكم بالباطل)

لو عندك أي حكاية غريبة أو مخيفة حصلت معاك أو مع حد تعرفه وعاوزني أكتب عنها في قصة بكرة كل اللي عليك إنك تبعتلي على الخاص على أكاونت أحمد محمود شرقاوي كل اللي تعرفه عن الحكاية أو الموقف المخيف ده بدون استئذان وتأكد اني هشوف رسالتك بأمر الله..

بقلم: أحمد محمود شرقاوي

…………

متنساش لو عجبتك القصة تعمل لاف وتعليق برأيك في كومنت..