ساعات

بقالي تلت ساعات تقريبا ممدد على السرير في الضلمة وحاسس بأرق فظيع ومش عارف انام، بس محبتش اقوم من مكاني عشان مراتي متصحاش لأن نومها خفيف نوعا ما، بس المخيف اني سمعت صوت مراتي برة في الصالة بتتكلم في الموبايل، تقريبا كنا في منتصف الليل..

امال مين دي اللي نايمة جمبي وحاسس بجسمها لامس جسمي، صدمة مخيفة خلت جسمي كله يتشل مكانه، انا حاسس وسامع صوت أنفاس ورايا فعلا مش بتخيل، أنفاس واحدة نايمة، بل وحاضنة ضهري بالكامل، فضلت مكاني مش قادر انطق، اهمس، اتكلم، في النهاية لقيت نور الاوضة اتفتح، بصيت بفزع لقيت مراتي داخلة الاوضة..

بصيت ورايا ملقتش حد خالص، وان كان ضهري لسة سخن من الجسم اللي كان لامسني، مراتي بصتلي بقلق وقالت:

– مالك، انت شوفت كابوس ولا ايه

– لا لا مفيش حاجة

قفلت النور ونامت جمبي على السرير، حاولت تقرب مني بس عنفتها عشان تبعد عني، انا في قمة التوتر والقلق، مش فاهم اي حاجة وان كنت واثق ان كانت فيه واحدة نايمة جمبي، ثقة تامة..

فضلت مكاني عمال افكر وافكر، لحد ما بدأت أسمع صوت انفاس مراتي، كانت نامت تقريبا، شوية ولقيتها قامت من تاني، لاحظت ان انا صاحي فقالتلي:

– انا هروح اخود دش عشان الجو حر اوي

وقامت تاخد الدش، حاولت اتجاهل الموقف اللي حصلي من شوية وانام شوية، وقبل ما اروح في النوم حسيت بمراتي بترجع تاني للسرير، فتحت عيني ورجعت غمضتها تاني عشان انام..

بس مفيش لحظات وسمعت صوت الدش، ايه الجنان ده، امال مين اللي جمبي دي، المكان كان ضلمة، وانا سامع صوت انفاسها، وحاسس بحرارة جسمها، بل ولقيتها بتقرب مني اوي، مفيش لحظات وسمعت صراخ مراتي جاي من الحمام..