العين السـ,ـحريه

بصوا، هي ديه العين السحرية عندي في باب الشقة من كام يوم حصل موقف مش قادر أصدقه لحد دلوقتي ، مش عارف دا كان وهم ولا حقيقي ، بس فيه علامات اكدتلي انه حقيقي ومع ذلك عقلي رافض يصدق.. الموضوع باختصار ان يوم الجمعة هدي مراتي متعودة تقضي اليوم عند أهلها وبترجع على ١٠ كده.

كنت قاعد بتفرج على التلفزيون والساعة جت ١٠ بالظبط لقيت باب الشقة بيتفتح وهدي داخلة وماسكة في ايديها شنطة سودة مليانة على اخرها ، دخلت وقفلت الباب من غير ما تفتح بوقها وراحت على المطبخ على طول

– طيب قولي سلام عليكم حتي

دا الي قولته لما شوفتها وهي داخلة من غير ما تعبرني ، مردتش عليا وكملت في طريقها للمطبخ ،
مفيش ثواني ولقيت جرس الشقة بيضـ,ـرب ،بصيت من العين السحرية اشوف مين الي بره لقيت هدي مراتي واقفة وماسكة في إيديها نفس الكيس الأسود..جتلي حالة من الصدمة ، مبقتش مصدق ، ديه لسه داخلة قدامي حالا !!

فضلت واقف متنح ، عمال ابص عليها من العين السحرية وارجع افكر هي فعلا دخلت ولا كان بيتهيألي؟..لحد لما أخيراً فتحت الباب

– ساعة ..ساعة عشان تفتحلي

قالت الكلمتين دول ودخلت على المطبخ وهي ماسكة في ايديها الكيس الاسود بنفس الطريقة ، مردتش عليها بس دخلت وراها وانا لسه في حالة صد.مة ، مش عارف انا اتجنـ..نت ولا ايه حصلي ، بس لو الي شوفته كان تهيؤات ازاي نفس الكيس الاسود شوفته قبل كده.. كانت مدياني ضهرها و واقفة قدام الرخامه وبتطلع حاجة من الكيس الي كان في ايديها مش عارف ايه هي ، قربت منها بهدوء عشان اعرف بتعمل ايه ..بس قبل ما اقرب اكتر ، لقيتها لفت وشها مرة واحدة وبصيتلي بصة عمري ما شوفت زيها خلال ٣ سنين جواز ، باصة حادة جداً ومرعبة.. لدرجة اني اتخضيت منها وانا اعصابي كانت سايبة أصلا لوحدها

– ممكن تخرج بره وتسيبني اخلص الي بعمله ؟

الحقيقة انا كنت متوتر وقلقان من الي حصل ، فا مقدرتش ارد عليها غير بحاضر،خرجت قعدت نفس القاعدة الي كنت قاعدها قدام التلفزيون ، باصص على المسلسل الي شغال بس لسه عقلي بيفكر في الي حصل ، خرجت هدي من المطبخ قعدت جنبي من غير ما تتكلم.. فضلت باصة قدامها والغريب انها مش بترمش ، كنت عمال ابص على التلفزيون وارجع ابص عليها..

– بقولك ايه يا هدي ، خلي القرآن شغال في الشقة على طول عشان انا بقي يتهيألي حاجات غريبة

من غير ما ترد هزت دماغها ، سكتت ورجعت ابص على التلفزيون ، عاوز احكيلها الي حصل بس هي أصلا مسألتنيش ايه الي الحاجات الغريبة الي بتتكلم عنها وكأنها مش مهتمة بالموضوع ..فات وقت كتير وهي مش عاوزة تنطق

– انا هقوم اعمل لنفسي كوباية شاي بدل الملل داه اعملك معايا

قولت الكلام دا وانا بستعد اني اقوم ، بس لقيتها حطيت ايديها على ايدي وقالتلي :

– خليك

اول مرة تنطق من نص ساعة ، بس لاحظت ان ايديها باردة بطريقة مش طبيعية زي ما يكون لوح تلج لمسني لدرجة اني مستحملتهاش وشيلتها من عليا بسرعة وقومت روحت ناحية المطبخ

– هعمل كوباية شاي يا دودو و هعملك معايا ،مش هتأخر

مشيت ناحية المطبخ وقبل ما ادخل لقيت ايد بتتحط على كتفي ، ايد هدي ، عرفتها لانها كانت متلجة ، استغربت لأني سايبها قاعدة مكانتش قامت ازاي لحقتني بالسرعة ديه من غير حتي ما اسمع صوت خطواتها ، بس مش مهم جت على ديه ما النهاردة يوم الحاجات الي مش مفهومة ..

– خليك..متدخلش

لفيت بسرعة وانا بشيل ايديها من على كتفي

– يابنتي جسمك متلج كده ليه .. عاوز اشرب كوباية شاي بقولك

قولت الجملة وعيني زغللت للحظات و حسيت اني دوخت وهقع بس رجعت لوعيي تاني بسرعة، في نفس اللحظة لقيتها واقفة قدامي بعد لما كانت ورايا ، بتبصلي من غير ما ترمش

– عشان خاطري متدخلش

هنا استغربت ، وبصلتها بنوع من الغضب وانا مستغرب فيه ايه جوا مش عوزاني اشوفه ، كلمتها المرادي بنبرة فيها نوع من العصبية

– هو فيه ايه جوا بالظبط مش عوزاني اشوفه!!

قولت الكلام وزقيتها من قدامي، حسيت نفس الاحساس لما حطيت ايدي عليها ، جسمها متلج بطريقة مش مفهومة ، بس مش دا الي شاغلني دلوقتي ، انا عاوز اعرف ليه مش عوزاني ادخل المطبخ..

– بقولك متدخلش

المرادي وهي بتقولها كانت لازقة في ضهري بالظبط وصوتها جنب ودني وكله حدة وعصبية وفيه بحة غريبة .. اتصدمت من الطريقة الي بتتكلم بيها ولفيت ضهري لقيت عينيها كلها شرار ، بلعت ريقي وقولتلها

– هدخل .. هدخل غصب عنك واشوف انتي مخبية ايه جوا .. وايه الي كنتي جيباه في الكيس الي في ايديكي داه..

قولت الكلام داه ودخلت المطبخ بصيت على الرخامه عشان اشوف الكيس الاسود الي كان في ايديها مفروش ومحطوط عليه اعضاء بشرية متقطـ..عة و الدم بينقط من طرف الرخامه نازل على الأرض وجنبهم سكـ..ينة كلها دم .. افتكرت لما دخلت عليها المطبخ اول لما جت من بره وهي مدياني ضهرها وبتطلع حاجات من الكيس ، ايوة كانت بتقطـ..ع الجثـ..ة

عيني وسعت على اخرها ومقدرتش انطق زي ما يكون لساني اتشـ..ل، قربت من الاعضاء ديه الي من الواضح انها لواحدة ست شعرها كان مغطي وشها المقطـ..وع ومحطوط جنب باقي الأعضاء ..مديت ايدي وهي بتترعش مسكت الشعر بطراطيف صوابعي وانا في حالة ذهول.. دددد..يه هدي.. وش هدي مراتي

اتفزعت ورميت وشها من ايدي وانا بصر.خ وبرجع لورا ، هدي مراتي الي متقطـ..عة امال مين الي كانت معايا بره.. فضلت ارجع بضهري لورا وانا عملت ابص عليي دماغها الي مرمية على الارض وباقي أعضاءها على الرخامه ، عمال ارجع لورا وانا بنهج ومنهار

لحد لما لقيت نفسي بخبط في حاجة صلبة وسمعت نفس صوتها بيتكلم جوا ودني

– مش قولتلك متدخلش

في نفس اللحظة الي قالت فيها كده وش هدي الي كان مرمي على الأرض عيونه فتحت بعد لما كانت مغمضة
، فتحت وبصلتي نفس البصة الي كلها شرار وشر ، اتفزعت ومسكت دماغي وطلعت من المطبخ وانا بصرخ بطريقة هستيريه .. التليفون كان بيرن ..حمدت ربنا وقولت ارد بسرعة اشوف مين واقوله يجي يلحقني من الي بيحصل .. ببب..بس لقيت اسم هدي.. هدي الي بترن عليا

بلعت ريقي وفتحت عليها وانا واقف مذهول