جاتلي مكالمه

جاتلي مكالمة من شوية ملخصها 4 كلمات قسموا قلبي نصين (كل شيء قِسمة ونصيب) والحقيقة إن دي مش أول مرة أسمع فيها الكلمة دي، دي سادس مرة تقريبا أسمعها بسبب وزني المُبالغ فيه واللي بيخلي أي بنت ترفضني، رغم إني بكون مقدم كل حاجة لأهلها، كل حاجة ممكنة من فلوس لشبكة كبيرة لشقة كويسة، بس وزني، الحاجة الوحيدة اللي مكنش ليها أي حل رغم إني حاولت مرة واتنين وعشرة، لدرجة إني كنت هعمل جراحة عشان أنزل من وزني بس في آخر لحظة اتراجعت لما شوفت حلم إني لو دخلت العمليات مش هخرج منها غير على القبر بتاعي.

واكتأبت من جديد، وصدقت فكرة إني خلاص مش هتجوز، هفضل عازب للأبد عشان مفيش واحدة قادرة تتقبل واحد وزنه داخل على ال120 كيلو تقريبا، لحد ما بدأ يتردد كلام إن انا معمولي عمل بوقف الحال وده اللي متسبب في الأزمة اللي انا واقع فيها دي، ولما سألت أكتر من حد قالي إن السحر بيعمل كل حاجة في الإنسان، من أول ضيق الصدر والخنقة لحد الموت، وإن الزيادة الكبيرة في الوزن ممكن تكون بسبب السِحر، وفضلت الفكرة في بالي مش عايزة تخرج منه.

لحد ما شوفتها وبقت بطلة أحلامي كلها (سلمى) البنت اللي اتمنيت اتجوزها وبعدين حياتي كلها تنتهي بعد كدا، ورغم إني اتقدمت لبنات كتير واترفضت بس كانت دي الاستثناء، اللي فعلا كنت عايزها بأي طريقة، كانت عميلة وبتاخد من المحل بتاعي شغل وعرضت عليها الجواز بدون أي لف أو دوران، وفورا بصت ناحية جسمي، وبالأخص بطني، وحسيت بالعار، وكأني واحدة حامل من الحرام وجوزها بيبص لبطنها، اترددت شوية وبعدين قالت انها هتفكر وهترد عليا، وكان واضح أوي انها مش هترد، والاحتمال الأكبر انها مش هتبقا عميلة عندي وهتشري مُنتجات من غيري.

بس الغريب انها بعد يومين ردت عليا، وقالتلي إنها مستعدة تتجوزني بس بشرط، نتخطب والخطوبة تبقا سنتين وأخد قرار إني أنزل وزني واليوم اللي هينزل فيه وزني ل70 كيلو هيبقا يوم كتب كتابنا.

وقتها زي ما بيقولوا حسيت ان الدنيا كلها بتضحك، وإني ولأول مرة أدوق طعم الفرح، روحت قابلت أهلها وطلبوا شبكة بمبلغ خرافي بس مش مهم، أي حاجة هي عاوزاها أنا هجبها مهما كانت، ومن أول يوم خطوبة وانا بقيت بصرف ببزخ عليها وعلى أهلها، هدايا ومناسبات وفلوس وفاكهة وشيكولاتات، كنت حاطط مرتب كامل شهري ليها ولأهلها شهريا، مانا مش عايز أخسرهم مهما كان ومهما حصل، وبدأت كورس في الجيم، ونظام تخسيس معين مكنش بيبوظ غير في زيارتي الاسبوعية لأنهم مكانوش بيبخلوا عليا وبيحطوا كمية أكل قدامي غير طبيعية، ولما كنت بكسل اسبوع كانت بتزعل مني أوي إني سبتها اسبوع كامل من غير زيارة.

وفضلت الشهور تعدي بدون أي نتيجة تُذكر، يمكن كنت بخس 3 كيلو في الشهر وأرجع أزيدهم تاني لأسباب غير معروفة، لحد ما اكتشفت إن كل حاجة بتتشفط من بين إيديا، وبدأت في السنة التانية، فلوسي بتخلص في الهدايا والعطايا وكمان لو طلبت نفترق بعد السنة التانية هيكون عندها حق بصراحة، ماحنا اتفقنا على سنتين.