بنتى متجوزة

قلت له بهدوء وثبات:
أبوها باعت لها فلوس في جيبها، تشتري اللي هي عايزاه.
صاح في وشي بعصبية وشوش:
كل الحوارات واللوع ده عشان ما تجيبوش زيارة لأمي؟! طب قسمًا بالله، ما هتدخلي البيت ده تاني إلا لما تجيبي زيارة معاكي لأمي صاحبة البيت!
نزلت والمصيبة في قلبي، بس ما لحقتش أستوعب اللي حصل. بعد أسبوع واحد بس، بنتي كلمتني وهي بتبكي وبتموت من الألم. الحمل كان تقيل عليها في الشهور الأولى، وتعبانة ومش قادرة تقف على حيلها.
ما استحملتش، أخدت بعضي وجريت عليها. قلت أقعد معاها يومين أخدمها وأعمل لها لقمة دافية.
وأنا واقفة في المطبخ بعمل لها شوربة، لقيت الباب بيتفتح وأمه داخلة، ست قاسية وعينيها زي الصقر. بصت لي بقرف، وقالت بصوت طالع من مناخيرها:
إيه ده؟ إنتي جيتي تاني؟ بقولك إيه يا حمات ابننا، خدي بنتك عندك، ولما تولد أبقي هاتيها! تولد عندكم، وبكده مالهاش مصاريف عندنا، ولا نوجع دماغنا بتعبها!
وقفت مصدومة، وبصيت لمجدي مستنية يراددها أو يقول كلمة يستر بيها مراته، لقيته هز رأسه بمنتهى البجاحة وقال:
أيوه، كلام أمي صح 100%! بنتكوا، وإنتوا تصرفوا عليها. أنا مش ملزم بتعبها ولا قرف الحمل ده!
بصيت له وأنا مش مصدقة عينيا ولا ودانيا:
يا بني، اتقِ الله! دي مراتك وفي لحمك وشايلة ابنك! ولسه الحمل طويل، ده غير علاجاتها ومتابعة الدكاترة ومصاريف الولادة!
رد وهو بيلف وشه الناحية التانية:
قلت اللي عندي. مش عاجبكم خدوها، ورجعوها لما تولد!
أخدت بنتي في إيدي، كانت ماشية تبكي وتتكركر، وسندتها بالعافية لحد ما وصلنا بلدنا.

أول ما دخلنا البيت، وشافنا أبوها وإخواتها الولاد، والدموع مغرقة وش بنتي ومش قادرة تمشي، البيت اتقلب مرجل نار. إخواتها كانوا هيتجننوا وعايزين يروحوا يطربقوا الشقة على دماغه ودماغ أمه، بس أبوها مسكهم بالعافية وقال:
صحتها وصحة اللي في بطنها الأول، وحسابنا معاه بعدين.
مرت الشهور ثقيلة زي الجبل. إحنا اللي شايلين المصاريف، الدكاترة، التحاليل، الأدوية، والأكل والشرب، ولا حس ولا خبر منه، ولا حتى مكالمة يسأل فيها هي عايشة ولا ميتة.
وفي ليلة من أصعب الليالي، بنتي جابها الطلق. جراوي وإسعاف ومستشفى، وليلة كاملة في العمليات، ونار زايدة في قلوبنا.
ولدت بنتي بالسلامة، وجابت ولد زي القمر، حتة سكرة نسيتنا التعب كله.
وأول ما طلعت من غرفة العمليات وبدأنا نتنفس الصعداء، تليفون بنتي رن. كان اسم مجدي على الشاشة.
مسكت التليفون وفتحت السبيكر، وحطيتها جنب أذن بنتي، وأبوها وإخواتها واقفين حواليها وساكتين تمامًا.
الكاتب_رومانى_مكرم_
صوت مجدي جه من الناحية التانية، لا فيه لهفة، ولا مباركة، ولا سؤال عن صحتها. قال ببرود ويقين:
سمعت إنك ولدتي… مبروك. بس خلي باباكي وياكي في الصورة، أنا مش هدفع مليم واحد في مصاريف المستشفى ولا الولادة، ولا ليا دعوة بأي حوارات مادية… إنتوا اللي اخترتوا تولدوا عندكم!
يا ترى، أبوها وإخواتها هيسكتوا على البجاحة دي، ولا الحق اللي ضاع بالحياء هيرجع بالنار والقوة؟…
يتبع